ដោយ៖ ជន ស្រីណុច
ថ្ងៃអង្គារ ទី6 ខែឧសភា ឆ្នាំ2014
http://vodhotnews.com
មើលរូបភាពបន្ថែម
ប្រធានអង្គការសេដាក លោកបណ្ឌិត យ៉ង សាំងកុមារ (រូបភាពដោយជន ស្រីណុច)
អង្គការសេដាក CEDAC នៅថ្ងៃអង្គារនេះ អំពាវនាវជាថ្មីទៀត ឲ្យប្រជាកសិករនៅប្រទេសកម្ពុជា ងាកមកអនុវត្តប្រព័ន្ធប្រពលវប្បកម្មកសិកម្ម ប.វ.ស តាមគោលការណ៍ធម្មជាតិ ឲ្យបានកាន់តែច្រើន ដើម្បីនិរន្តរភាពនៃមុខរបរកសិកម្ម ហើយមានជីវភាពរីកចម្រើនជាងមុន។
ការអំពាវនាវនេះ ធ្វើឡើងក្នុងសិក្ខាសាលាជ្រើសរើសកសិករឆ្នើម ប.វ.ស ប្រចាំឆ្នាំ២០១៣ នាព្រឹកថ្ងៃអង្គារទី០៦ ខែឧសភា នៅរាជធានីភ្នំពេញ ។
ប្រធានអង្គការសេដាក លោកបណ្ឌិត យ៉ង សាំងកុមារ មានប្រសាសន៍ថា បច្ចុប្បន្នកសិករដែលធ្វើស្រែអនុវត្តតាម ប្រព័ន្ធ ប.វ.ស ក្នុងប្រទេសកម្ពុជា នៅមិនទាន់ច្រើនទៅតាមចំនួនប្រជាជននៅឡើយទេ បណ្តាលមកពីកត្តាមួយចំនួន ប្រជាជនគិតថា ការធ្វើស្រែតាមបែបធម្មជាតិ មិនសូវទទួលបានផលច្រើន ។ លោក អំពាវនាវឲ្យប្រជាកសិករផ្លាស់ផ្នត់គំនិតបែបនេះ ដោយលោកមានប្រសាសន៍ថា ការធ្វើស្រែតាមបែប ប្រពលវប្បកម្ម គឺធ្វើតិចបានច្រើន ហើយមិនប្រើប្រាស់ជាតិគីមីទេ មិនតែប៉ុណ្ណោះអាចជួយបង្កើនដីស្រែឲ្យប្រែក្លាយទៅជាមានគុណភាពលើសឆ្នាំមុនៗ។
កសិករគំរូមកពីខេត្តតាកែវ ដែលអង្គការសេដាកជ្រើសរើសឲ្យជាប់ចំណាត់ថ្នាក់ លោក កែប ចន មានប្រសាសន៍ថា ចាប់តាំងពីលោកអនុវត្តធ្វើកសិកម្មតាមការណែនាំ របស់អង្គការសេដាក គ្រួសាររបស់គាត់ មានជីវភាពធូរធារជាងមុន ជាពិសេសការអនុវត្តប្រព័ន្ធប្រពលវប្បកម្មកសិកម្ម ប.វ.ស ធ្វើស្រែក្នុងទំហំដីតូចតែទទួលបានផលច្រើន។ លោកបន្តថា ប្រជាពលរដ្ឋនៅក្នុងភូមិរបស់លោក បានអនុវត្តតាមការណែនាំរបស់អង្គការសេដាកស្ទើរគ្រប់គ្នា គិតទៅមានចំនួន៩០ភាគរយ ។
ស្រដៀងគ្នានេះដែរពលរដ្ឋគំរូម្នាក់ទៀត មកពីខេត្តកំពត លោក សិត ឆាន មានប្រសាសន៍ថា ចាប់តាំងពីលោកធ្វើស្រែតាមប្រព័ន្ធប្រពលវប្បកម្ម ប.វ.ស មក ការប្រមូលផលបានកើនទ្វេរដង ខណៈការចំណាយដើមទុនអស់តិចតួចបំផុត មិនតែប៉ុណ្ណោះកូនចៅរបស់គាត់ អាចជួយចុះទៅអនុវត្តផ្ទាល់។
ស្របពេលដែលអង្គការសេដាក ជំរុញកសិករឲ្យធ្វើស្រែតាមបែបប្រព័ន្ធប្រពលវប្បកម្ម ប.វ.ស នៅថ្ងៃអង្គារនេះ សេដាកបានត្រៀមផ្តល់រង្វាន់ដល់កសិករ ដែលអនុវត្តបានជោគជ័យខ្លាំងជាងគេមកពីតាមបណ្តាខេត្តនានា ក្នុងនោះអ្នកជាប់ចំណាត់ថ្នាក់លេខ១ទទួលបានមេគោចំនួន៣ក្បាល អ្នកលេខ២បានមេគោចំនួន២ក្បាល និងអ្នកលេខ៣ បានមេគោ១ ក្បាល ។
បើតាមលោកយ៉ង សាំងកុមារឲ្យដឹងថា ប្រជាពលរដ្ឋដែលអនុវត្តកសិកម្មតាមប្រព័ន្ធប្រពលវប្បកម្ម ប.វ.ស រួមមានខេត្តតាកែវ កំពត និងកំពង់ស្ពឺជាដើម ហើយសរុបនៅលើផ្ទៃប្រទេសមានប្រមាណ២សែនគ្រួសារ ស្មើរនិង១០ភាគរយ ៕
សរសេរមកកាន់កញ្ញា ជន ស្រីណុច តាមរយៈchornsreynoch@vodhotnews.com