ដោយ៖​ ណុល ដារ៉ា​
ថ្ងៃអាទិត្យ ទី24 សីហា 2014
http://vodhotnews.com

មើលរូបភាពបន្ថែម

ការចុះចែកអំណោយមនុស្សធម៌ដល់ប្រជាពលរដ្ឋ មានជម្លោះដីធ្លីសហគមន៍បឹងឈូក (រូបដោយ៖ លោក ងិន ពៅ)

​បណ្ដាញ​សហគមន៍​សន្តិភាព​ការពារ​ដីធ្លី​ខ្មែរ​អមតៈ នៅ​ថ្ងៃ​អាទិត្យ​នេះ​ចុះ​ចែក​អំណោយ​សប្បុរស ដែល​ទទួលបាន​ពី​សហគមន៍​ខ្មែរ​នៅ​ក្រៅប្រទេស ដល់​ប្រជាពលរដ្ឋ​មាន​ជម្លោះ​ដីធ្លី​នៅ​ភូមិ​បឹង​ឈូក សង្កាត់​គីឡូម៉ែត្រ​លេខ ៦ ខណ្ឌ​ឫស្សីកែវ​។​

​តំណាង​បណ្ដាញ​សហគមន៍​សន្តិភាព​ការពារ​ដីធ្លី​ខ្មែរ​អមតៈ លោក​ពេជ្រ លឹម​ឃួន ឲ្យ​VOD ដឹងថា អតីត​អ្នករងគ្រោះ​ដោយសារ​ជម្លោះដីធ្លី​ចំនួន​បួន​សហគមន៍ បាន​ចងក្រង​គ្នា​ជា​បណ្ដាញ​នេះ​ឡើង ដើម្បី​ជួយ​ដល់​ជនរងគ្រោះ​ដោយសារ​ជម្លោះដីធ្លី​នៅ​ទូទាំង​ប្រទេស​កម្ពុជា​។ លោក​ពេជ្រ លឹម​ឃួន ឲ្យដឹង​បន្ត​ទៀត​ថា នៅ​ព្រឹក​ថ្ងៃអាទិត្យ ទី​២៤ សីហា នេះ បណ្ដាញ​សហគមន៍​សន្តិភាព​ការពារ​ដីធ្លី​ខ្មែរ​អមតៈ​របស់លោក កំពុង​ចុះ​ចែក​អំណោយ ដែល​ទទួលបាន​ពី​សប្បុរសជន​នៅ​ក្រៅប្រទេស ជូន​ដល់​អ្នកភូមិ​បឹង​ឈូក​ចំនួន​៣៩ គ្រួសារ ដែល​ប្រជាពលរដ្ឋ​អ្នក​ភូមិ​បឹង​ឈូក​ទាំងនេះ រងគ្រោះ​ដោយសារ​ជម្លោះ​ដីធ្លី​អូសបន្លាយ​អស់​រយៈពេល​ជាង​៥​ឆ្នាំ​មកហើយ​។​

​អ្នកស្រី​ខៀវ ចិន្ដា តំណាង​ប្រជាពលរដ្ឋ​រងគ្រោះ​ដោយសារ​ជម្លោះដីធ្លី​នៅ​សហគមន៍​បឹង​ឈូក ឲ្យ​VOD​ដឹងថា អ្នកស្រី ក៏​ដូចជា​ពលរដ្ឋ​រង​គ្រោះ​ទាំងអស់ មាន​ក្ដី​រីករាយ ដែល​បាន​ទទួល​អំណោយ​សង្គ្រោះ​ពី​សហគមន៍​ខ្មែរ​នៅ​ក្រៅប្រទេស តាមរយៈ​បណ្ដាញ​សហគមន៍​សន្តិភាព​ការពារ​ដីធ្លី​ខ្មែរ​អមតៈ​នេះ​។  

​សូមជម្រាបថា បណ្ដាញ​សហគមន៍​សន្តិភាព​ការពារ​ដីធ្លី​ខ្មែរ​អមតៈ បង្កើតឡើង​ដោយ​ជនរងគ្រោះ​ជម្លោះដីធ្លី​ចំនួន​៤​សហគមន៍ ក្នុងនោះ​មាន​អ្នក​បុរី​កីឡា អតីត​អ្នក​បឹងកក់ តំណាង​សហគមន៍​៣៤៧ និង​តំណាង​សហគមន៍​ត្រពាំង​អញ្ចាញ​។​

សូមសរសេរមកកាន់លោក ណុល ដារ៉ា តាមរយៈ dara@vodhotnews.com​