ដោយ៖​ ស៊ុន ណារិន​ | ថ្ងៃអង្គារ ទី1 ធ្នូ 2015
http://vodhotnews.com

លោក ហ៊ុន ម៉ានី ទទួល​ពានរង្វាន់​នៅប្រទេសហ្វីលីពីន (រូបថតពីហ្វេសប៊ុក​របស់​លោក ហ៊ុន សែន)

លោកនាយករដ្ឋមន្រ្តី ហ៊ុន សែន បានថ្លែង​អំណរគុណ​ដល់​មន្រ្តីរាជការ កងកម្លាំងប្រដាប់អាវុធនិង​ប្រជា​ពល​រដ្ឋ​ ដែលបានគាំទ្រ​កូនប្រុស​របស់លោក ហ៊ុន ម៉ានី ដោយ​លោក​ថា​លោក​មានមោទនភាព​ដែលកូនបានទទួល​ពានរង្វាន់The Gusi Peace Prize កាលពីថ្ងៃទី២៥ខែវិច្ឆិកា ឆ្នាំ​២០១៥។​

លោក ហ៊ុន សែន បាន​សរសេរ​នៅ​លើ​ហ្វេសប៊ុក​របស់ខ្លួននៅព្រឹកថ្ងៃអង្គារនេះ​ថា​៖ “​ក្នុងនាមជាមាតា បិតា ហ៊ុន ម៉ានី ដែលទើបទទួលបានពានរង្វាន់The Gusi Peace Prizeថ្មីៗនេះ យើងខ្ញុំសុំថ្លែងអំណរគុណយ៉ាងជ្រាលជ្រៅជូនចំពោះថ្នាក់ដឹកនាំមន្ត្រី រាជការ កងកម្លាំងប្រដាប់អាវុធ ប្រជាជនគ្រប់ស្រទាប់វណ្ណៈពិសេសយុវជនដែលបានគាំទ្រដល់ម៉ានីក្នុងការបំពេញភារកិច្ចកន្លងមក ដែលធ្វើឲ្យ​ ហ៊ុន ម៉ានី ឈានជើងទៅទទួលយកពានរង្វាន់ដ៏មានកិត្តិយសនេះ”។ លោក​បន្ថែម​ថា៖ “ពានរង្វាន់នេះមិនមែនជារបស់ ហ៊ុន 
ម៉ានី ម្នាក់ឯងទេ តែជារបស់អ្នកគាំទ្ររាប់លាននាក់។ ខ្ញុំមានមោទនភាពដែលយុវជនយើងនៅទូរទាំងប្រទេសបានប្រឹងប្រែងងើបឈរឡើងក្នុងឋានះជាយុវជននៃប្រទេសដែលធ្លាប់មានប្រវត្តិដ៏រុងរឿងពីអតីតកាល”។

លោក ហ៊ុន សែន បានសរសេរ​បន្ថែម​ថា៖ “ខ្ញុំសង្ឃឹមថាយុវជនយើងទាំងនៅទីក្រុងទាំងនៅជនបទទូ​ទាំងព្រះរាជា​ណាចក្រកម្ពុជានឹងខិតខំចូលរួមកាន់តែខ្លាំង កាន់តែធំទូលាយ កាន់តែស៊ីជម្រៅ និងកាន់តែមានប្រសិទ្ធ​ភាពនៅក្នុងគ្រប់កិច្ចការទាំងអស់របស់ជាតិយើង”។

ក្រោយទទួល​បាន​ពានរង្វាន់ លោក​ ហ៊ុន ម៉ានី បានថ្លែង​ថា​ពាន​រង្វាន់​ដែល​លោក​ទទួល​បាន​នេះ​គឺ​ជា​រប​ស់​ប្រ​ជាជន​ខ្មែរទាំង​អស់​គ្នា ដែលលោក​ថាជា​មោទនភាព​ជាតិ និងជាតម្លៃរបស់​ជាតិ។ លោក​បន្ថែម​ថា៖ “Gusi Peace Prize នេះគឺជាអ្វី​មួយ​ដែលបង្ហាញ​ពី​ទាំង​អស់​គ្នា​ក្នុង​ការ​ធ្វើ​ការ​ងារស្ម័គ្រចិត្ត…វាបាន​នាំ​មក​នូវ​ការ​អបអរសាទរ និងការរួបរួមគ្នា​មួយ…ហើយ​ថា​តម្លៃ​នៃ Gusi Prize  នេះមិន​មែន​ថាជាពានរង្វាន់​មួយ​ទេតែជា​តម្លៃ​មួយ​នៃ​កា​ររួប​រួម​ជាតិ និង​តម្លៃ​របស់​ជាតិ"។​ ​

ក្នុង​ឆ្នាំ​២០១៥នេះ បេក្ខជន​១៩​នាក់​បាន​ទទួលពានរង្វាន់​សន្តិភាព​នេះទៅ​លើ​ផ្នែក​ផ្សេង​ៗគ្នា​ដូជាការលើកកម្ពស់មរតក​​វប្បធម៌ ការស្រាវជ្រាវផ្នែក​វិទ្យា​សាស្រ្ត វិជ្ជសាស្រ្ត គណិតវិទ្យា សារព័ត៌មាន សិទ្ធិមនុស្ស និង​ទស្សនវិជ្ជាជាដើម។ បេក្ខជនទាំងនោះ​មាន​មក​ពី​ប្រ​ទេស​អូទ្រីស២នាក់  បង់ក្លាដេស បេឡារុស កម្ពុជា ចិន សាធារណៈរដ្ឋ​ឆែក ហ្សកហ្ស៊ែ អាល្លឺម៉ង់ ជប៉ុន កាហ្សាក​ស្ថាន គីហ្ស៊ីស្ថាន ហូឡង់ ហ្វីលីពីន ព័រទុយកាល់ កាតា រុស្ស៊ី អ៊ុយក្រែននិង​សហរដ្ឋ​អាមេរិក។​

​​គួរបញ្ជាក់​ថាGusi Peace Prize ជាស្ថាប័ន​មួយ​មាន​ទី​តាំង​នៅ​ទីក្រុង​ម៉ានីល ប្រ​ទេស​ហ្វីលីពីន ហើយ​ពាន​រង្វាន់នេះចាប់​ផ្តើម​បង្កើត​ឡើង​តាំង​ពី​ឆ្នាំ​២០០២។ ស្ថាប័ននេះ​បង្កើត​ឡើង​ក្នុងគោលបំណងផ្តល់​នូវ​ការ​ទទួល​ស្គាល់​ស្នាដៃ​ដល់​អ្នក​ដែល​មាន​ស្នាដៃ​ពិសេសៗមកពីប្រទេសជុំ​វិញ​ពិភព​លោក៕

សរសេរមកកាន់លោក ស៊ុន ណារិន តាមរយៈsun_narin@vodhotnews.com