ដោយ៖ ទូច សុខា | ថ្ងៃអង្គារ ទី1 ធ្នូ 2015
http://vodhotnews.com
រដ្ឋាភិបាលនៅឆ្នាំ២០១៦នឹងផ្តល់ថវិកាដល់ក្រសួងកសិកម្ម ប្រមាណជា៤៧លានដុល្លារ ដែលកើនឡើងជាង២៥ភាគរយ បើប្រៀបធៀបទៅនឹងឆ្នាំ២០១៥ ខណៈដែលវិស័យនេះត្រូវបានរដ្ឋាភិបាលចាត់ទុកថាជាវិស័យអាទិភាពមួយក្នុងយុទ្ធសាស្រ្តចតុកោណរបស់ខ្លួន។
រដ្ឋសភាកម្ពុជាដែលមានតែសមាជិកមកពីគណបក្សប្រជាជនកម្ពុជា កាលពីថ្ងៃទី៣០ ខែវិច្ឆិកា ឆ្នាំ២០១៥ បានអនុម័តសេចក្តីព្រាងច្បាប់ស្តីពីការគ្រប់គ្រងថវិកាសម្រាប់ឆ្នាំ២០១៦។ បើតាមសេចក្តីព្រាងច្បាប់នោះ រដ្ឋាភិបាលគ្រោងចំណាយថវិកាប្រមាណជា៤៣០០លានដុល្លារសម្រាប់ឆ្នាំ២០១៦ ក្នុងនោះក្រសួងកសិកម្មទទួលបានថវិកាប្រហែលជា៤៧លានដុល្លារ។
ក្នុងយុទ្ធសាស្រ្តចតុកោណដំណាក់កាលទី៣ របស់រាជរដ្ឋាភិបាល វិស័យកសិកម្មជាវិស័យអាទិភាពមួយក្នុងចំណោមវិស័យអាទិភាពបីផ្សេងទៀតរបស់រដ្ឋាភិបាលកម្ពុជា។ បើតាមយុទ្ធសាស្រ្តចតុកោណដំណាក់កាលទី៣ រដ្ឋាភិបាលនឹងបន្តអភិវឌ្ឍនិងបង្កើនតម្លៃបន្ថែមលើវិស័យកសិកម្ម តាមរយៈការបង្កើនតម្លៃបន្ថែមនៃការផលិតនិងនាំចេញអង្ករ បង្កើនផលិតកម្ម ទំនើបកម្មកសិកម្ម និងជំរុញវិនិយោគលើវិស័យកសិកម្មជាដើម។
អ្នកនាំពាក្យក្រសួងកសិកម្ម លោក អ៊ាង សុផល្លែត មានប្រសាសន៍ថាថវិកាដែលរដ្ឋាភិបាលផ្តល់ឲ្យក្រសួងកសិកម្មនេះ នឹងត្រូវយកទៅបម្រើដល់សកម្មភាពចុះអប់រំ ផ្សព្វផ្សាយ និងបណ្តុះបណ្តាលជំនាញកសិកម្មកដល់កសិករកម្ពុជានៅទូទាំងប្រទេស។ លោកចាត់ទុកថាថវិកាដែលរដ្ឋាភិបាលផ្តល់ឲ្យក្រសួងកសិកម្មនេះនឹងជួយដល់ការរីកដុះដាលវិស័យកសិកម្មនេះបន្ថែមទៀត។
លោកឲ្យដឹងថាបម្រែបម្រួលអាកាសធាតុជាឧបសគ្គចម្បងមួយក្នុងវិស័យកសិកម្មនៅកម្ពុជា។ លោកបន្ថែមថា៖ "ប្រឈមខ្លាំងជាងគេគឺបញ្ហាអាកាសធាតុ ប្រែប្រួលអាកាសធាតុ ភ្លៀងមកមិនទៀងទាត់តាមរដូវកាល ហើយកម្ពស់កម្រិតទឹកផ្លៀងមានការប្រែប្រួលពីខ្ពស់ ទៅតិច ពីតិចទៅច្រើន កត្តាហ្នឹងហើយដែលរដ្ឋាភិបាលកំពុងនឹងជំរុញការអភិវឌ្ឍវិស័យហេដ្ឋារចនាសម្ព័ន្ធស្រោចស្រព ដើម្បីជួយសម្រួលដល់កសិករផងនិងជួយសម្រួលដល់ការរីកចម្រើនផ្នែកសិកម្មហ្នឹងផង”។
បណ្ឌិតសេដ្ឋកិច្ច លោក គី សេរីវឌ្ឍន៍ យល់ថាថវិកាប្រមាណជា៤៧លានរបស់ក្រសួងកសិកម្មនេះ នឹងមិនគ្រប់គ្រាន់សម្រាប់បណ្តុះបណ្តាលកសិករកម្ពុជានោះទេ ដោយលោកថាកសិករភាគច្រើននៅមានចំណេះដឹងទាបនិងមានចំនួនច្រើន។ លោកឲ្យដឹងទៀតថាកម្ពុជាមានលក្ខណៈអំណោយផលដល់វិស័យកសិកម្ម ប៉ុន្តែលោកថាប្រព័ន្ធធារាស្រ្តនៅមានការខ្វះខាត ដែលលោកថាធ្វើឲ្យវិស័យកសិកម្មនៅមានលក្ខណៈអន់ថយនៅឡើយ។
លោកបន្ថែមថា៖ “អ៊ីចឹងខ្ញុំគ្រាន់តែស្នើថាដើម្បីបំពេញវិស័យកសិកម្មបានល្អគឺប្រព័ន្ធទឹកហ្នឹងឯងយើងមានប្រភពទឹកសម្រាប់ផ្ទៃដីកសិកម្មតែ៥០ភាគរយទេ …ខុសពីហ្នឹងទៅគឺពឹងលើមេឃទាំងអស់ ហេតុនេះហើយបានជាយើងពិបាកជំរុញឲ្យវិស័យកសិកម្មយើងរីកចម្រើនលឿន”។
បើតាមយុទ្ធសាស្រ្តចតុកោណរបស់រដ្ឋាភិបាល ប្រព័ន្ធធារាស្រ្តនៅកម្ពុជានៅមិនទាន់ឆ្លើយតបពេញលេញទៅនឹងសេចក្តីត្រូវការក្នុងវិស័យដាំដុះនោះទេ ដែលរដ្ឋាភិបាលត្រូវធ្វើការវិនិយោគលើវិស័យនេះបន្ថែមទៀត។
ទាក់ទងនឹងប្រព័ន្ធធារាស្រ្តសម្រាប់ស្រោចស្រប់ផ្ទៃដីកសិកម្មនេះ អ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា មានប្រសាសន៍ថាផ្ទៃធ្វើស្រែប្រាំងនិងវស្សានៅកម្ពុជាមានប្រហែលជា៣លានហិកតា ហើយលោកបញ្ជាក់ថាប្រព័ន្ធធារាសាស្រ្តដែលមានសព្វថ្ងៃអាចធ្វើការស្រោចស្រប់បានពី៥១ ទៅ៥២ភាគរយនៃផ្ទៃដីទាំងនោះ។ លោកបន្តថាក្រសួងកំពុងតែខិតខំកសាងប្រព័ន្ធធារាស្រ្តបន្ថែមទៀតសម្រាប់កសិករកម្ពុជា ដែលលោកថាប្រហែលជា១០ឆ្នាំទៀតកម្ពុជាអាចមានប្រព័ន្ធធារាសាស្រ្តស្រោចស្រប់ដំណាំកសិកម្មបានទូទាំងប្រទេស។
លោកឲ្យដឹងថាទោះបីជាក្រសួងបានទទួលថវិកាប្រមាណជា២៣លានដុល្លារសម្រាប់ឆ្នាំ២០១៦ ក៏ដោយ ក៏លោកថា ក្រសួងអាចកសាងប្រព័ន្ធធារាស្រ្តបានច្រើនតាមរយៈដៃគូអភិវឌ្ឍន៍ដូចជា ចិន កូរ៉េ បារាំង ឥណ្ឌា និងជប៉ុនជាដើម។
លោកបន្ថែមថា៖ “យើងទទួលស្គាល់ ទាំងអស់គ្នា ការខ្វះខាតហ្នឹងយើងទើបគ្របដណ្តប់បានលើផ្ទៃដី៥១ទៅ៥២ភាគរយប៉ុណ្ណឹងទេ ហើយយើងកំពុងតែបន្ត…យើងប្រឹងធ្វើការកសាងបន្តទៀតដើម្បីឈានទៅដល់ការគ្របដណ្តប់នៅទូទាំងប្រទេសបាទ”។
របាយការណ៍របស់ធនាគារពិភពលោកមួយចេញផ្សាយកាលពីខែឧសភា ឆ្នាំ២០១៥ ឲ្យដឹងថាដំណាំកសិកម្មកម្ពុជាមិនទាន់មានប្រព័ន្ធធារាសាស្រ្តគ្រាប់គ្រាន់នៅឡើយ។ ធនាគារពិភពលោកបបង្ហាញតួលេខក្នុងរបាយការណ៍នោះថាប្រព័ន្ធធារាសាស្រ្តសម្រាប់ស្រោចស្រប់ដំណាំកសិកម្មនៅកម្ពុជាមាន៧,៩ភាគរយនៃផ្ទៃដីកសិកម្មប្រមាណជា៤លានហិកតា។
របាយការណ៍របស់អង្គការFAOដែលធ្វើការលើវិស័យកសិកម្មនិងស្បៀងអាហារ ចេញផ្សាយកាលពីឆ្នាំ២០១៤ឲ្យដឹងថាបើគិតក្នុងឆ្នាំ២០១២ ប្រជាពលខ្មែររស់នៅជនបទមាន៧៩,៩ភាគរយនៃប្រជាពលរដ្ឋសរុបជាង១៤លាននាក់។ របាយការណ៍ដដែលឲ្យដឹងទៀតថាកម្លាំងពលកម្មដែលបម្រើការក្នុងវិស័យកសិកម្មមាន៦៥ភាគរយនៃកម្លាំងពលកម្មសរុបរបស់កម្ពុជាក្នុងឆ្នាំ ២០១២៕
សូមសរសេរមកកាន់លោក ទូច សុខា តាមរយៈ sokha@vodhotnews.com