ដោយ៖ វង្ស សុម៉ាលីន | ថ្ងៃអង្គារ ទី1 ធ្នូ 2015, 07:32 AM
http://vodhotnews.com
(រាប់ពីស្តាំ) លោក ស៊ិន ចន្ទឆាយ៉ា ប្រធាននាយកដ្ឋានភាពយន្តប្រចាំក្រសួងវប្បធម៌ វិចិត្រសិល្បៈនិងលោកលោក សោម សុគន្ធ ប្រធានគណៈកម្មការមហោស្រពភាពយន្តជាតិលើកទី៤
នៅក្នុងវេទិកាសន្និសីទកាសែតដើម្បីត្រៀមខ្លួនបើកដំណើរព្រឹត្តិការណ៍មហោស្រពភាពយន្តលើកទី៤កាលពីថ្ងៃ៣០ខែវិច្ឆិកា មន្ត្រីជំនាញជាគណៈកម្មការវាយតម្លៃភាពយន្តបានរិះគន់ចំៗទៅលើការផលិតភាពយន្តនាពេលបច្ចុប្បន្នរបស់ផលិតករខ្មែរ។ ជាពិសេសគឺភាពយន្តបែបកំប្លុកកំប្លែង ដោយក្រុមមន្ត្រីជំនាញបានហៅភាពយន្តទាំងនោះថាជោគជ័យដោយចៃដន្យនិងព្រមានថានឹងធ្វើឲ្យការផលិតទាំងនោះអស់ផ្លូវមិនយូរមិនឆាប់ បើទោះជាផលិតករដែលអួតថាងើបលុយស្រួលពីការផលិតភាពបែបនោះងាយស្រួលកើបប្រាក់ចំណេញ។
លោក ស៊ិន ចន្ទឆាយ៉ា ប្រធាននាយកដ្ឋានភាពយន្តប្រចាំក្រសួងវប្បធម៌ វិចិត្រសិល្បៈ និងជាសមាជិកអចិន្ត្រៃយ៍នៃគណៈកម្មការរៀបចំមហោស្រពភាពយន្តជាតិលើកទី៤ បានរិះគន់ចំៗទៅលើការផលិតភាពយន្តរបស់ផលិតករបច្ចុប្បន្ន ដោយលោកថ្លែងថាវត្តមានភាពយន្តកាន់តែច្រើននាប៉ុន្មានឆ្នាំចុងក្រោយ គឺមិនជួយឲ្យវិស័យភាពយន្តខ្មែរមានសន្ទុះលើផ្នែកបច្ចេកទេសនិងគុណភាពនោះទេ។ លោកបានសង្កត់ធ្ងន់ភាគច្រើនទៅលើភាពយន្តដែលផោ្តតលើភាពកំប្លុកកំប្លែង។ លោកបញ្ជាក់ថាទម្រង់សម្ដែងរបស់តួអង្គនៅក្នុងរឿងទាំងនោះគឺផ្ទុយស្រឡះពីទម្រង់ភាពយន្តដែលមានក្បួនខ្នាតច្បាស់លាស់។
លោកមានប្រសាសន៍ថា៖ “តួឥឡូវសម្ដែងប៉ាតណាប៉ាតណី ហើយបើតួអ្នកកំប្លែងវិញ គឺសម្ដែងឬនិយាយអត់មានប៉ារ៉ូលទេ នឹកឃើញអីនិយាយនឹង ដល់អញ្ចឹងគេអត់ហៅថាភាពយន្តទេ ព្រោះភាពយន្តគឺមានប៉ារ៉ូលច្បាស់លាស់ មានការដឹកច្បាស់លាស់ មិនមែនពេលខុសរកប្លង់រកសម្ដីអីមកសម្ដែងឡើងវិញអត់បានដូចរឿងឥឡូវទេ!”។
យ៉ាងណាមិញ លោកបានសម្ដែងការកោតសរសើរចំពោះរឿងមួយចំនួនដែលបានយកចិត្តទុកដាក់ទៅលើគុណភាព បើទោះជាទីផ្សារតម្រូវការហាក់ចាញ់រឿងដែលផលិតបែបកំប្លុកកំប្លែង ដែលលោកហៅថាជារឿងមិនត្រូវស្ដង់ដារនោះក៏ដោយ។ ក្រៅពីចំណុចតួសម្ដែង លោកថាបញ្ហាពន្លឺ បច្ចេកទេសសំឡេង បច្ចេកទេសប្លង់ ក៏សឹងនឹងមានបញ្ហាភាគច្រើននៅក្នុងខ្សែរឿងភាគច្រើននោះដែរ ទើបធ្វើឲ្យវិស័យភាពយន្តខ្មែរនៅតែមានកម្រិត។ លោកថាភាពយន្តបច្ចុប្បន្ន មានការផលិតច្រើន ប៉ុន្តែបើឲ្យត្រូវកម្រិតដែលអាចទទួលយកបាន គឺមានចំនួនតិចណាស់។ លោកបន្ថែមថាគណៈកម្មការរបស់លោក រកឃើញតែរឿងចំនួន៨ប៉ុណ្ណោះ ដែលអាចចូលប្រកួតប្រជែងនៅក្នុងមហោស្រពភាពយន្តលើកទី៤ ដែលនឹងប្រព្រឹត្តទៅចាប់ពីថ្ងៃទី៤ ដល់ថ្ងៃទី១០ខែធ្នូនោះ។ លោកថាបរិបទឥឡូវនេះ ប្រទេសកម្ពុជាមានរោងកុនល្អ មានទស្សនិកជន ប៉ុន្តែការផលិតរឿងគឺល្អភាគតិចបំផុត ទើបពលរដ្ឋកម្ពុជាបានងាកទៅគាំទ្រខ្សែរឿងបរទេសមិនថានៅតាមរោងកុននិងតាមកញ្ចក់ទូរទស្សន៍។ លោកព្រមានចំពោះភាពយន្តដែលផ្ដោតទៅលើភាពកំប្លុកកំប្លែង ហើយមិនយកចិត្តទុកដាក់លើប៉ារ៉ូល បញ្ហាប្លង់និងទម្រង់ស្ដង់ដាររបស់ភាពយន្ត ថានឹងធ្វើឲ្យអ្នកទស្សនាបាត់បង់ការគាំទ្រ នៅពេលអ្នកនិយមភាពយន្តក្នុងស្រុកកាន់តែឃើញពីគុណភាពរបស់ភាពយន្តបរទេសក្នុងពេលបន្តបន្ទាប់។ លោកទទួលស្គាល់ថា ក្នុងនាមក្រសួងវប្បធម៌ មិនមានចំណាត់ការដើម្បីគាបសង្កត់ទៅលើផលិតករទាំងនោះ ឲ្យចោលទម្លាប់ផលិតរឿងដោយមិនគិតពីគុណភាពដូចរាល់ថ្ងៃបានទេ ដោយសារតែបរិបទជាក់ស្ដែង គឺខាងក្រសួងគឺបានត្រឹមតែផ្ដល់ជាមតិយោបល់ប៉ុណ្ណោះ ប៉ុន្តែការអនុវត្តជាក់ស្ដែង គឺផលិតករជាអ្នកទទួលយក ឬមិនទទួលយកដោយខ្លួនឯង។ លោកថាមានតែទស្សនិកជន និងពេលវេលាប៉ុណ្ណោះ ដែលអាចកែប្រែទម្លាប់ផលិតរឿងរបស់ផលិតករទាំងនោះ នៅពេលខ្សែរឿងដែលគ្មានស្ដង់ដារទាំងនោះ បាត់បង់ការគាំទ្របន្តិចម្ដងៗ រហូតប្រែពីការចំណេញក្លាយជាខាត។
មិនខុសគ្នាដែរ លោក សោម សុគន្ធ ប្រធានគណៈកម្មការមហោស្រពភាពយន្តជាតិលើកទី៤ បានថ្លែងបញ្ជាក់ថា ចំណុចខ្វះចន្លោះរបស់ភាពយន្តបច្ចុប្បន្នគឺជាកត្តាធ្វើឲ្យក្រសួងវប្បធម៌ និងវិចិត្រសិល្បៈ បង្កើតឲ្យមានមហោស្របភាពយន្តជាលើកទី៤នេះឡើង ដើម្បីជំរុញទឹកចិត្តផលិតករឲ្យងាកមកផលិតរឿងដែលមានស្ដង់ដារនិងគុណភាពជាជាងផលិតរឿងតម្រូវតែតាមទីផ្សារ ហើយមិនសំឡឹងមើលនិរន្តភាពអនាគត។ លោកទទួលស្គាល់ថាមហោស្រពភាពយន្ត៣លើកកន្លងមក មិនបានកែប្រែទម្លាប់របស់ផលិតករដែលនិយមផលិតរឿងដោយមិនមានស្ដង់ដារច្រើនទេ ប៉ុន្តែផលិតករទាំងនោះនឹងមានការភ្ញាក់រឭកនៅពេលផលិតកម្មរបស់ខ្លួន ផលិតរឿងក្នុងមួយឆ្នាំជាច្រើនរឿង ប៉ុន្តែមិនមានរឿងណាមួយ ដើម្បីបង្ហាញខ្លួននៅក្នុងមហោស្រពភាពយន្ត។ លោកបន្តថានៅពេលពលរដ្ឋកម្ពុជាកាន់តែយល់ពីគុណតម្លៃនៅក្នុងភាពយន្ត គឺស្ថានភាពក្នុងការផលិតពិតជាផ្ដោតលើសាច់រឿង ប្លង់រឿង ប៉ារ៉ូលរឿង និងបច្ចេកទេសផលិតដោយឯងៗ។
ផលិតករម្នាក់ លោក អ៊ិន សុភិន បានទទួលស្គាល់ការផលិតភាពយន្តនាពេលបច្ចុប្បន្នហាក់ផ្ដោតលើការតម្រូវទីផ្សារជាជាងយកចិត្តទុកដាក់លើបញ្ហាស្ដង់ដារ។ យ៉ាងណាក៏ដោយ លោកថាផលិតករភាពយន្តគួរតែដល់ពេលរួមគ្នាលើកកម្ពស់គុណភាពក្នុងការផលិតភាពយន្ត ជាជាងគិតរឿងតែរឿងទីផ្សារដូចដែលបានធ្លាប់ធ្វើទៀតហើយ។ លោកថាខ្លួននឹងផ្អាកការផលិតរឿងបែបកំប្លែកកំប្លែងដែលតម្រូវឲ្យតួអង្គនិយាយខ្លួនឯងប៉ាតណាប៉ាតណី ដូចក្នុងរឿង«ខ្មោចថតកុន» ដើម្បីកុំឲ្យបាត់បង់ប្រជាប្រិយភាព នៅពេលគុណភាពទាំងសាច់រឿង ទាំងតួសម្ដែង ទាំងការដឹកនាំថត និងប្លង់កាមេរ៉ា ត្រូវបានយកចិត្តទុកដាក់៕
សរសេរមកកាន់លោក វង្ស សុម៉ាលីន តាមរយៈvongsomalin@yahoo.com