ដោយ៖ ញឹម សុខន | ថ្ងៃអង្គារ ទី1 ធ្នូ 2015, 05:11 PM
http://vodhotnews.com
អនុប្រធានគណបក្សសង្គ្រោះជាតិ លោក កឹម សុខា (ដោយ ទេព សូនី)
មេដឹកនាំបក្សប្រឆំាងស្វែងរកការជួបគ្នានៅក្រៅប្រទេសមុនមានជំនួបផ្លូវការជាមួយមេដឹកនាំគណបក្សកាន់អំណាចតាមរយៈវប្បធម៌សន្ទនាខណៈស្ថានការណ៍នយោបាយក្នុងប្រទេសកំពុងឡើងកម្តៅ។
អ្នកនាំពាក្យគណបក្សសង្គ្រោះជាតិលោក យ៉ែម បុញ្ញឫទ្ធិ ឲ្យដឹងថាប្រធានស្តីទីលោក កឹម សុខា បានចេញទៅក្រៅប្រទេសកាលពី២ថ្ងៃមុននេះ។ លោកបន្តថាដំណើរទៅក្រៅប្រទេសរបស់លោក កឹម សុខា នៅពេលនេះដើម្បីពិភាក្សាជាមួយលោក សម រង្ស៊ី ដែលកំពុងស្នាក់នៅក្រៅប្រទេសមុនជួបជាមួយតំណាងភាគច្រើនក្នុងសភារបស់គណបក្សកាន់អំណាចដើម្បីរកដំណោះស្រាយនយោបាយតាមរយៈវប្បធម៌សន្ទនា។
ស្ថានការណ៍នយោបាយនៅកម្ពុជាបានឡើងកម្តៅមួយរយៈនេះបន្ទាប់ពីតុលាការចេញដីកាឲ្យតាមចាប់ខ្លួនប្រធានគណបក្សសង្គ្រោះជាតិលោក សម រង្ស៊ី និងអនុប្រធានលោក កឹម សុខា ត្រូវបានតំណាងរាស្ត្របក្សកាន់អំណាចបោះឆ្នោតទម្លាក់ចេញពីតំណែងអនុប្រធានទី១នៃរដ្ឋសភា។
បន្ថែមពីនេះតំណាងរាស្ត្របក្សប្រឆាំងពីររូបគឺលោក ញ៉យ ចំរើន និងលោក គង់ សភា ត្រូវបាតុករដែលគេដឹងថាគាំទ្រគណបក្សកាន់អំណាចវាយឲ្យរងរបួសធ្ងន់ខណៈសកម្មជន១៥នាក់របស់បក្សប្រឆាំងត្រូវតុលាការឃុំខ្លួននៅពន្ធនាគារព្រៃស។
សហគមន៍អន្តរជាតិបានបង្ហាញការព្រួយបារម្ភថាជាការឡើងកម្តៅនយោបាយដល់កម្រិតគ្រោះថ្នាក់មួយ ហើយសភាសហភាពអឺរុបគំរាមផ្តាច់ជំនួយរហូតជិត៤៥០លានដុល្លារដល់រដ្ឋាភិបាលបើគ្មានការសម្របសម្រួលផ្នែកនយោបាយណាមួយធ្វើឲ្យមេបក្សប្រឆាំងបានចូលស្រុក។
យ៉ាងណាក៏ដោយមកដល់ពេលនេះគណបក្សជាប់ឆ្នោតទាំងពីរមិនទាន់បានកំណត់ថ្ងៃជួបគ្នាជាថ្មីដើម្បីបន្ថយកម្តៅនយោបាយនៅឡើយទេបន្ទាប់ពីលុបចោលគម្រោងជួបគ្នាកាលពីថ្ងៃចន្ទម្សិលមិញ។ សម្រាប់អ្នកនាំពាក្យរបស់គណបក្សសង្គ្រោះជាតិវិញអះអាងថាលោក កឹម សុខា នឹងវិលចូលកម្ពុជាវិញនៅសប្តាហ៍នេះដើម្បីត្រៀមជួបពិភាក្សាជាមួយតំណាងសមាជិកសភាសំឡេងភាគច្រើនរបស់បក្សកាន់អំណាចលើដំណោះស្រាយនយោបាយ៕
សូមសរសេរមកកាន់លោក ញឹម សុខន តាមរយៈ sokhorn@vodhotnews.com