តារាសម្ដែងកញ្ញា នី មុនីនាថ។ ហុង មិនា
Wed, 2 December 2015
ស៊ូ វុទ្ធី
ភ្នំពេញប៉ុស្តិ៍
ភ្នំពេញ: ដំណើរបណ្តើរគ្នាដូចលលក ញីឈ្មោលតាំងពីដីក្រុង ធ្លាយដល់ចុងកាត់មាត់ញកជាមួយបុរសអាណិកជនអាមេរិក ឈ្មោះ សូឡា បានឃ្លាតពីភ្នែកមហាជន ក្រោយពីបុរសអាណិកជនម្នាក់នេះហោះហើរត្រឡប់ទៅទឹកដីអាមេរិកវិញ ជាមួយព័ត៌មានល្បីថា ស្នេហាក៏ប្រែបែរខ្នងមិនទាន់បានប៉ុន្មានខែផង។
ពេលនេះក៏ផ្ទុះដំណឹងថា បុប្ផាលើដីសុវណ្ណភូមិរះលើវិថីសិល្បៈ ងារកំពូលតារាទឹកភ្នែកជាដើមទុន កញ្ញា នី មុនីនាថ កំពុងទទួលបានកាដូស្នេហ៍លួងចិត្តពីបុរសម្នាក់ពាក់ផ្កាយពីរលើស្មា។
ដំណឹងពីចំណងស្នេហ៍ឆ្លងទ្វីបរវាង កញ្ញា នី មុនីនាថ និងបុរសអាណិកជនអាមេរិក រូបសង្ហាវ័យ ៤០ ឆ្នាំឈ្មោះ សូឡា ប្រែបែរខ្នងដាក់គ្នាវិញ ក៏ធ្លាយព័ត៌មានបោកបក់បញ្ច្រាសវិញថា «បុរសអាណិកជនរូបនេះ មិនអាចទទួលយកអតីតលរបស់ស្រីស្រស់នី មុនីនាថ គ្រាដឹងថាធ្លាប់មានទំនាក់ទំនងស្នេហាជាមួយតារាសម្តែងជើងចាស់លោក កែវ កុសល»។
ប៉ុន្តែការអះអាងពីម្តាយនាងថា៖ «គ្មានរឿងបែបនោះទេ។ លោក សូឡា គាត់ត្រឡប់ទៅធ្វើការងារគាត់វិញ។ពួកគេគ្រាន់តែរាប់អានគ្នាធម្មតា តែបើថ្ងៃមុខមើលឃើញថាល្អអាចឈានដល់ស្នេហានោះ ក៏មិនដឹងដែរ»។
នៅក្រោយសម្ដីការពារភាពស្អាតស្អំរបស់កូនស្រីនេះក៏ស្រាប់តែថ្មីៗនេះល្បីថា នី មុនីនាថ កំពុងព្យាយាមលុបស្រមោលអនុស្សាវរីយ៍អាណិកជនអាមេរិក លោក សូឡា ចេញពីបេះដូង ដើម្បីយកកន្លែងដាក់អ្នកថ្មី។ប្រភពបង្ហើបថា៖ «នី មុនីនាថ កំពុងចាប់អារម្មណ៍ស្នេហាលើបុរសលោកផ្កាយពីរក្នុងស្រុកវិញទេ នោះគឺមកពីបុរសរូបនេះចិត្តល្អដៃទូលាយ ហើយគេបានចំណាយមកលើនាងមិនខ្លាចធូរហោប៉ៅឡើយ»។
ប្រភពពីអ្នកសិល្បៈដដែលនេះបន្ដថា៖ «ប៉ុន្តែការឆ្លើយតបជាក់ស្ដែងលើព័ត៌មាននេះ នី មុនីនាថ នៅមិនមានភាពក្លាហានបង្ហាញរឿងនេះទេ ក្រៅពីអ្នកសិល្បៈស្និទ្ធៗនឹងគ្នា ព្រោះថា ទើបកើតឡើងថ្មីដែរ»។
យ៉ាងណាព័ត៌មាននេះ ម្តាយកញ្ញា នី មុនីនាថ ច្រានចោលទាំងស្រុង ដោយបញ្ជាក់ថា៖ «កូនស្រីខ្ញុំមិនបានបង្កើតចំណងស្នេហ៍ជាមួយលោក ផ្កាយពីរម្នាក់ណាទេ»។
ជាមួយសម្ដីថ្លែងថា៖ «លុយ ដុល្លារ អ្នកណាក៏ចង់បានវា ម្នាក់ៗខំរាល់ថ្ងៃដោយសារអាហ្នឹង (លុយ)» នោះ អ្នកស្រី សុភាលី ក៏បានប្រកែកទៀតថា៖ «មិនមែនជាការពិតទេ ពីព័ត៌មាននេះ ហើយពួកយើងក៏មិនដែលបានស្គាល់លោក ផ្កាយពីរម្នាក់ណាដែរ»។
អ្នកម្តាយតារាសម្ដែង នី មុនីនាថ ដែលរមែងរួមដំណើរជាមួយកូនស្រីថតកម្មវិធីទាំងយប់ថ្ងៃគ្រប់ច្រកល្ហកនោះ ក៏ទទួលស្គាល់ដែរថា កូនស្រីជាតារាសិល្បៈ និងជាមនុស្សរបស់មហាជន គេចមិនផុតពីព័ត៌មានអេចអូចទេ។
ប៉ុន្តែអ្នកស្រីបានសម្ដែងក្ដីបារម្ភឡើងថា៖ «វាធ្វើឲ្យប៉ះពាល់កិត្តិយសដល់គ្រួសារ និងកូនស្រី ហើយដែលល្បីតែពីរឿងអាស្រូវពីមួយទៅមួយ ហើយរឿងថ្មីនេះល្បីថា ដោយសារឃើញដុំដុល្លារក៏ទោរទន់រកគេនោះ»។
អ្នកស្រី សុភាលី បញ្ជាក់បន្ថែមទៀតថា៖ «ការពិតវាគ្មានបែបនោះទេ សូម្បីតែរឿង ជាមួយ សូឡា នៅអាមេរិក ក៏គ្នាគ្រាន់តែរាប់អានគ្នាថា គ្នាមានស្នេហានឹងគ្នាដែរ»៕