ដោយ៖ ហ៊ុន សិរីវឌ្ឍន៍ | ថ្ងៃពុធ ទី2 ធ្នូ 2015, 04:13 PM
http://vodhotnews.com
សត្វប្រភេទទុងប្រផេះនៅតំបន់ព្រែកទាល់ (រូបថតដោយក្រសួងបរិស្ថាន)
តំបន់ស្នូលព្រែកទាល់ដែលជាជម្រកពងកូនសត្វស្លាបទឹកធំជាងគេនៅតំបន់អាស៊ីអាគ្នេយ៍ ត្រូវបានដាក់បញ្ចូលជាតំបន់ដីសើមដែលមានសារៈសំខាន់ជាអន្តរជាតិដែលគេឲ្យឈ្មោះថាតំបន់រ៉ាមសារ។
សេចក្តីប្រកាសព័ត៌មានរបស់ក្រសួងបរិស្ថានចេញនៅថ្ងៃពុធនេះឲ្យដឹងថាតំបន់ស្នូលព្រែកទាល់នៃបឹងទន្លេសាបដែលគ្របដណ្តប់លើផ្ទៃដី២១៣៤២ហិកតា ត្រូវបានទទួលស្គាល់ដោយលេខាធិការដ្ឋានរ៉ាមសារស្តីពីតំបន់ដីសើមនាពេលថ្មីៗនេះ។ សេចក្តីប្រកាសព័ត៌មានបន្តថាក្នុងឆ្នាំ១៩៩៩ តំបន់ស្នូលព្រែកទាល់ ដែលមានទីតាំងនៅស្រុកឯកភ្នំ ខេត្តបាត់ដំបង ត្រូវបានក្រសួងបរិស្ថានសហការជាមួយសមាគមអភិរក្សសត្វព្រៃ ដើម្បីការពារបន្ទាយពងកូនសត្វស្លាបទាំងនោះ។
បើតាមសេចក្តីប្រកាសព័ត៌មាន តំបន់ស្នូលព្រែកទាល់ជាតំបន់តែមួយគត់ផងដែរនៅអាស៊ីអាគ្នេយ៍ដែលមានសត្វប្រភេទទុងប្រផេះបន្តពូជនិងមានចំនួនសត្វប្រភេទត្រដក់ធំជិតពាក់កណ្តាលនៃចំនួនសត្វលើពិភពលោក ហើយក៏មានវត្តមានអំបូររនាលនិងស្មោញរាប់ពាន់ក្បាលនៅទីនោះ។
រដ្ឋមន្រ្តីក្រសួងបរិស្ថាន លោក សាយ សំអាល់ បានមានគូសបញ្ជាក់នៅក្នុងសេចក្តីប្រកាសព័ត៌មាននោះថា៖ “ការទទួលស្គាល់តំបន់ស្នូលព្រែកទាល់ជាតំបន់រ៉ាមសារ មិនត្រឹមតែផ្តោតទៅលើភាពសំខាន់ជាអន្តរជាតិនៃតំបន់ដីសើមនេះប៉ុណ្ណោះទេ ប៉ុន្តែវានឹងជាស្ពានសម្រាប់កម្ពុជាក្នុងដាក់បញ្ចូលតំបន់ដីសើមច្រើនទៀតទៅជាតំបន់រ៉ាមសារនាពេលអនាគត”។
ប្រធានសមាគមអភិរក្សសត្វព្រៃ លោក Ross Sinclair មានប្រសាសន៍ក្នុងសេចក្តីប្រកាសព័ត៌មានថា៖ “ប្រទេសកម្ពុជាគួរមានមោទនភាពដែលតំបន់ស្នូលព្រែកទាល់ត្រូវបានដាក់បញ្ចូលជាតំបន់ដីសើមដែលមានសាៈសំខាន់ជាអន្តរជាតិ។ ការដាក់បញ្ចូលនេះគឺជាការទទួលស្គាល់នូវកិច្ចខិតខំប្រឹងប្រែងអភិរក្ស ដែលបានធ្វើឡើងដោយមានកិច្ចសហការរវាងរាជរដ្ឋាភិបាលកម្ពុជា សហគមន៍និងអង្គការមិនមែនរដ្ឋាភិបាល ហើយវាក៏ជាការបើកផ្លូវសម្រាប់កិច្ចសហការរបៀបនេះជាច្រើនឆ្នាំទៅមុខទៀត ដើម្បីស្តារនិងការពារតំបន់ស្នូលព្រែកទាល់ឱ្យក្លាយជាតំបន់អច្ឆរិយធម្មជាតិនៃប្រទេសកម្ពុជា”។
សត្វប្រភេទត្រដក់ធំ(រូបថតផ្តល់ដោយក្រសួងបរិស្ថាន)
នាយកកម្មវិធីអង្គការជីវិតសត្វស្លាបប្រចាំកម្ពុជាលោក ប៊ូ វរសក្ស មានប្រសាសន៍ថា៖ “បន្ថែមលើតម្លៃផ្នែកជីវចម្រុះតំបន់ស្នូលព្រែកទាល់ក៏ជាតំបន់ដែលមានសារសំខាន់សម្រាប់សត្វស្លាប ដែលផ្តល់នូវសេវាអេកូស៊ីជាច្រើនពិសេសគឺ ទិន្នផលត្រីដែលទ្រទ្រង់ដល់ជីវភាពរស់នៅរបស់សហគមន៍ភូមិបណ្តែតទឹក ហេតុដូច្នេះ យើងមានការរីករាយជាខ្លាំងចំពោះលទ្ធផល ដែលទទួលបានមកពីកិច្ចប្រឹងប្រែងក្នុងការដាក់បញ្ចូលតំបន់ស្នូលព្រែកទាល់នេះជាតំបន់រ៉ាមសារដែលនឹងអាចទាក់ទាញសហគមន៍អន្តរជាតិឱ្យចាប់អារម្មណ៍បន្ថែមទៀតដល់ តំបន់ដ៏អស្ចារ្យមួយនេះ”។
ចាប់តាំងពីប្រទេសកម្ពុជាបានក្លាយជាភាគីហត្ថលេខីនៃអនុសញ្ញារ៉ាមសារស្តីពីតំបន់ដីសើមក្នុងឆ្នាំ១៩៩៩មក មានតំបន់ដីសើមចំនួន៣កន្លែងដែលត្រូវបានចាត់បញ្ចូលជាតំបន់រ៉ាមសារដែលក្នុងនោះមានតំបន់រ៉ាមសារបឹងឆ្មានិងប្រព័ន្ធព្រែក តំបន់រ៉ាមសារកោះកាពិនិងតំបន់រ៉ាមសារស្ទឹងត្រែង។
បើតាមក្រសួងបរិស្ថាន តំបន់រ៉ាមសារព្រែកទាល់បានទាក់ទាញភ្ញៀវទេសចររាប់ពាន់នាក់ក្នុងមួយឆ្នាំៗ ហើយក៏ជាតំបន់ដែលទ្រទ្រង់ដល់ការរស់នៅរបស់ត្រីនៅបឹងទន្លេសាបដែលផ្តល់ផលយ៉ាងសម្បើមផងដែរ។
នាពេលបច្ចុប្បន្នមានតំបន់រ៉ាមសារជាង២២៤០កន្លែងនៅទូទាំងពិភពលោក ដែលនេះគឺជាបណ្តាញគ្រប់គ្រងតំបន់ដីសើមសម្រាប់ការអភិរក្សដ៏ធំជាងគេបំផុត៕
សរសេរមកកាន់លោក ហ៊ុន សិរីវឌ្ឍន៍ តាមរយៈhunsirivadh@gmail.com