ដោយ៖​ លី បេឡា​ | ថ្ងៃពុធ ទី2 ធ្នូ 2015, 07:28 PM​
http://vodhotnews.com

ប្រជា​ពលរដ្ឋ​ជាង​១០០នាក់​តវ៉ា​នៅមុខ​តុលាការ​ខេត្ត​រតនគិរី នៅថ្ងៃ​ទី​២ខែធ្នូ ឆ្នាំ​២០១៥ (រូបថតដោយប្រជា​ពលរដ្ឋ​អ្នក​សារព័ត៌មានខេត្តរតនគិរី)

ប្រជា​ពលរដ្ឋ​​ជាង​១០០នាក់ នៅរសៀលថ្ងៃពុធនេះ បាន​​រុញបំបាក់ទ្វាររបង​សាលាដំបូងខេត្តរតនគិរី ដោយ​ពួកគេ​ទាមទារឲ្យមន្ត្រីតុលាការខេត្តនេះដោះលែងតំណាងពួកគេ៣នាក់វិញដែលតុលាការ​កាត់ទោស​ឲ្យ​ជាប់​ពន្ធនាគារ​២ឆ្នាំ​ ករណីជម្លោះដីធ្លី​ជាមួយ​ប្រជា​ពលរដ្ឋ​ផ្សេង​ទៀត។​

មន្រ្តីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តរតនគិ​រី លោក ឆាយ ធី មានប្រសា​សន៍ថាការចាប់ខ្លួន​និង​ការ​កាត់ទោស​ពលរដ្ឋ​ទាំង​៣រូបនោះ​ជាមូលហេតុនាំឲ្យប្រជាពលរដ្ឋ​នាំគ្នាសម្រុក​ចូលក្នុងបរិវេណតុលាការដើម្បីទាមទារឲ្យដោះលែងតំណាងពួកគេវិញ។

​​​ពលរដ្ឋ៣នាក់ដែលត្រូវបានចាប់ខ្លួន​មាន​ឈ្មោះថាលោក ​សូត្រ សឿន​ លោក ​អែម​ ចាន់ និងលោក​ ជ្រឹង ទូច រស់នៅក្នុងភូមិរ៉យ​ ឃុំ​កិ​​ចុង ស្រុកបរកែវ ខេត្ត​រតន​​គិរី ។ ពួកគេ​​ត្រូវ​បានសាលាដំបូងខេត្តរតនគិរីប្រកា​សសាលក្រម​នៅថ្ងៃពុធនេះ ដោយ​ផ្តន្ទាទោសឲ្យជាប់ពន្ធនាគារចំនួន២ឆ្នាំពីបទរំលោភ​លើទ្រព្យជាកម្មសិទិ្ធអ្នកដទៃតាមមាត្រា ២៤៧ ២៤៨ និង២៥៣ នៃច្បាប់​ភូមិបាល។ 

ពលរដ្ឋ​ដែល​ចូលរួមតវ៉ា លោក លាង ស្រេង​ មានប្រសាសន៍ថា​តុលាការបានហៅតំណាងពលរដ្ឋ​៣នាក់​ចូលទៅក្នុង​បន្ទប់សវនាការ រួច​ហើយ​ពលរដ្ឋ​បាន​ដំណឹង​ថា​តុលាការ​បានកាត់ទោស​និង​​បញ្ជូន​ពួកគេ​ទៅឃុំខ្លួន​ ទើប​នាំ​ឲ្យ​ប្រជា​ពលរដ្ឋ​ខឹងសម្បារ។​

លោក សឿន​ សុត ដែល​ជា​កូនរបស់​ពលរដ្ឋម្នាក់ដែលត្រូវ​បាន​តុលាការ​ផ្តន្ទាទោស សូត្រ សឿន​ ប្រាប់វីអូឌី​ថា​តុលាការកាត់ទោស​ដោយអយុត្តិធម៌ចំពោះ​ឪពុក​របស់លោក។​

ចៅក្រមតុលាការខេត្តរតនគិរី លោកស្រី ជ័យ មាលា មានប្រសាសន៍ថាការចាប់​ខ្លួន​ពលរដ្ឋ៣នាក់នេះទាក់ទងនឹង​ករណី​រំលោភ​កាន់កាប់អចលនៈទ្រព្យ​របស់អ្នកដទៃដែលប្ដឹងដោយតំណាងប្រជា​ពល​រដ្ឋ​​ជនជាតិដើមភាគ​តិច១៧គ្រួសារដែលមានប្លង់រឹងកាន់កាប់។ លោកស្រីបន្ថែមថា៖ “យើងចេះតែស្ដាប់​ទៅ​លើ​អ្វី​ដែល​គាត់និយាយហ្នឹង​ថា  ហ៊ាង​ សុជាតិ(ពលរដ្ឋអះអាង​ថា​ជាអ្នកជំនួញ​) តែនៅពីក្រោយហ្នឹង​មាន១៦នាក់ទៀតដែលប្រជាជនដូចគ្នាដែលជាជនជាតិដើមភាគតិចដែលគេមានប្លង់កាន់កាប់ត្រឹមត្រូវ”។

លិខិត​របស់រដ្ឋសភា ករណី​ពលរដ្ឋ​ស្នើ​សុំ​ដំណោះស្រាយ​(រូបថតដោយប្រជា​ពលរដ្ឋ​អ្នក​សារព័ត៌មានខេត្តរតនគិរី)

បើ​តាម​របាយការណ៍​របស់អង្គការ​លីកាដូចេញផ្សាយ​នៅថ្ងៃពុធនេះ ពលរដ្ឋ​ទាំងបីនាក់នោះ​ត្រូវបាន​កោះហៅ​សាកសួរ​ដំបូងនៅ​ខែឧសភា ឆ្នាំ២០១៥។ របាយការណ៍​បន្ត​ថាកម្មករ​របស់​អ្នកជំនួញ​ម្នាក់​ឈ្មោះ ហ៊ាង សុជាតិ បាន​ឈូសឆាយ​ដីរាប់រយ​ហិកតារបស់ពលរដ្ឋ​ដែល​ចូល​រួមតវ៉ា។

​​កាលពីខែធ្នូ ឆ្នាំ​២០១២​ ប្រ​ជាពលរដ្ឋធ្លាប់​​បាន​ដាក់​ពាក្យ​បណ្តឹង​ទៅ​រដ្ឋសភា ដោយ​ស្នើ​សុំ​ជួយ​ដោះស្រាយ​ការផ្តល់ដីលំនៅឋាន​និងដីចម្ការ​ ដែលមានទំនាស់ជាមួយ​ប្រជា​ពលរដ្ឋ​ផ្សេង​ទៀត៕

សរសេរមកកាន់លោក លី បេឡា តាមរយៈbela@vodhotnews.com