ដោយ៖​ លី បេឡា​ | ថ្ងៃព្រហស្បតិ៍ ទី3 ធ្នូ 2015
http://vodhotnews.com

ប្រមាណជាង១០០នាក់​រុញបំបាក់របងសាលាដំបូងខេត្តរតនគិរីដើម្បីទាមទារឲ្យមន្ត្រីតុលាការខេត្តនេះដោះលែងតំណាងពួកគេ​៣នាក់វិញដែលសមត្ថកិច្ចចាប់ខ្លួនពាក់ព័ន្ធករណីជម្លោះដីធ្លី។​

មន្រ្តីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តរតនគិរីលោក ឆាយ ធី ​ពលរដ្ឋ៣នាក់ដែលត្រូវបានចាប់ ខ្លួន​មាន​ឈ្មោះថាលោក​ សូត្រ សឿត​ លោក ​ឯម ចាន់ និងលោក​ ជ្រិក ទូច រស់នៅក្នុងភូមិបរឡយ ឃុំ​កេះ​ចុង ស្រុកបកែវ ខេត្ត​រតន​​គិរី។ លោក​បញ្ជាក់ថាការចាប់សកម្មជនដីធ្លីទាំង៣រូបនេះជាមូលហេតុនាំឲ្យប្រជាពលរដ្ឋ​នាំគ្នាសម្រុកចូលក្នុងបរិវេណ​តុលាការដើម្បីទាមទារឲ្យដោះលែងតំណាងពួកគេវិញ។​

ទាក់ទងនឹងបញ្ហានេះចៅក្រមតុលាការខេត្តរតនគិរីលោកស្រី ជ័យ មាលា បានឲ្យដឹងថាការចាប់​ខ្លួន​ពលរដ្ឋ៣នាក់នេះទាក់​ទង​នឹង​ករណី​រំលោភ​កាន់កាប់អចលនៈទ្រព្យ​របស់អ្នកដទៃដែរប្ដឹងដោយតំណាងប្រជា​ពល​រដ្ឋ​​ជនជាតិដើមភាគ​តិច១៧គ្រួសារ​ដែលមានប្លង់រឹងកាន់កាប់។ លោកស្រីបន្ថែមថា៖ «យើងចេះតែស្ដាប់​ទៅ​លើ​អ្វី​ដែល​គាត់និយាយហ្នឹងថា ហ៊ាង​ សុជាតិ តែនៅពីក្រោយហ្នឹង​មាន១៦នាក់ទៀតដែលប្រជាជនដូចគ្នាដែលជាជនជាតិដើមភាគតិច»។

ពលរដ្ឋ៣នាក់ដែលជាតំណាងឲ្យពលរដ្ឋប្រមាណជាង១០០នាក់នោះត្រូវ​បានសាលាដំបូងខេត្តរតនគិរីផ្តន្ទាទោសឲ្យជាប់ពន្ធនាគារចំនួន២ឆ្នាំពីបទរំលោភ​លើទ្រព្យជាកម្មសិទិ្ធអ្នកដទៃតាមមាត្រា២៤៧ ២៤៨ និង២៥៣នៃច្បាប់ភូមិបាល។  ជម្លោះដី​ធ្លីដែលឈានដល់ការចាប់ខ្លួននេះគឺកើតឡើងរវាងប្រជាពលរដ្ឋនិងពលរដ្ឋ​ពីរក្រុម​នៅក្នុងស្រុកបកែវតាំងពីឆ្នាំ២០១៣។​

សូម​សរសេរ​មកកាន់​លោក លី បេឡា តាមរយៈ  bela@vodhotnews.com