ដោយ ហង្ស សាវយុត
2016-04-13
RFA
ស្ដាប់ ឬ ទាញយកសំឡេង
កម្លាំងសមត្ថកិច្ចនៃខេត្តសៀមរាប ត្រៀមរក្សាសន្តិសុខ និងសណ្ដាប់ធ្នាប់ក្នុងឱកាសសង្ក្រាន្តឆ្នាំថ្មី។ រូបថតថ្ងៃទី១៣ ខែមេសា ឆ្នាំ២០១៦ RFA/Hang Savyouth
បុណ្យចូលឆ្នាំថ្មីប្រពៃណីជាតិ ឆ្នាំវក នឹងចូលមកដល់នៅម៉ោង ៨យប់ថ្ងៃទី១៣ ខែមេសា នេះ។ កាលពីម៉ោងជាង ៧ព្រឹកថ្ងៃទី១៣ មេសា នៅមុខប្រាសាទអង្គរវត្ត ខេត្តសៀមរាប មានធ្វើពិធីបួងសួងដល់ទេវតា និងបារមីនៃវត្ថុស័ក្តិសិទ្ធិ ឲ្យប្រទាននូវសេចក្តីសុខសេចក្តីចម្រើន ដើម្បីឈានទៅដល់ការបើកព្រឹត្តិការណ៍អង្គរសង្ក្រាន្តអបអរសាទរឆ្នាំថ្មី។
មន្ត្រីរដ្ឋាភិបាលថ្នាក់ជាតិ ថ្នាក់ខេត្ត និងសហភាពសហព័ន្ធយុវជនកម្ពុជា បានរួមគ្នាធ្វើពិធីបួងសួងសុំសេចក្តីសុខគ្រប់ប្រការ ដើម្បីឲ្យបារមីនៃវត្ថុស័ក្តិសិទ្ធិ ជួយប្រទានពរជ័យបវរសួស្ដី ព្រមទាំងបើកផ្លូវឆ្ពោះទៅរកការបើកព្រឹត្តិការណ៍អង្គរសង្ក្រាន្ត អបអរសាទរ និងទទួលទេវតាឆ្នាំថ្មីចាប់ពីពេលនេះតទៅ។
ពិធីបួងសួងនៅមុខប្រាសាទអង្គរវត្ត គឺមានការចូលរួមជាអធិបតីពីឧបនាយករដ្ឋមន្ត្រី អ្នកស្រី ម៉ែន សំអន និងលោក យឹម ឆៃលី ព្រមទាំងប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី កាលពីវេលាម៉ោង ៧ និង ៣០នាទីព្រឹកថ្ងៃពុធ ទី១៣ ខែមេសា៖ «បក់ផ្លិតឲ្យដំណើរ អង្រឹងជើងស្នែង ទសបារមី វត្ថុស័ក្តិសិទ្ធិ មកហើយគ្មានឋានៈ គ្មានបុណ្យស័ក្តិ សូមអស់លោកចាំទទួលនៅខាងក្រៅ»។
ពិធីបួងសួង ធ្វើឡើងរយៈពេលជាង ១ម៉ោង គឺបានសំបូងសង្រូងដល់អារុក្ខអារក្ខអ្នកតា ទេវតា ម្ចាស់ទឹក ម្ចាស់ដី និងវត្ថុស័ក្តិសិទ្ធិ ជួយការពារ និងប្រទានសេចក្តីសុខចម្រើនដល់ព្រឹត្តិការណ៍អង្គរសង្ក្រាន្តអបអរឆ្នាំថ្មី ដែលនឹងប្រព្រឹត្តទៅរយៈពេល ៣ថ្ងៃនៅខេត្តសៀមរាប ចាប់ពីថ្ងៃទី១៤ រហូតដល់ថ្ងៃទី១៦ ខែមេសា។
មន្ត្រីនគរបាលជាតិ ឲ្យដឹងថា រដ្ឋាភិបាលបានរាយបណ្ដាក់កម្លាំងសន្តិសុខប្រមាណ ៣.០០០នាក់នៅជុំវិញទីក្រុងសៀមរាប ព្រលានយន្តហោះអន្តរជាតិខេត្ត ព្រមទាំងតាមបរិវេណនៃប្រាសាទបុរាណ ដើម្បីការពារសន្តិសុខសុវត្ថិភាពក្នុងឱកាសព្រឹត្តិការណ៍អង្គរសង្ក្រាន្តរយៈពេល ៣ថ្ងៃនេះ។
មន្ត្រីសេនាធិការនៃស្នងការនគរបាលខេត្តសៀមរាប លោក ក័ន សម្បត្តិ មានប្រសាសន៍ថា កម្លាំងប៉ូលិស និងកងរាជអាវុធហត្ថរបស់ខេត្តសៀមរាប ជាង ១ពាន់នាក់ ក៏រាយបណ្ដាក់ជួយការពារសន្តិសុខដែរ៖ «ពង្រាយនៅគ្រប់គោលដៅ មានអង្គរវត្ត បាយ័ន អង្គរឃ្យុងយូ និងនៅផ្លូវផប់ស្ទ្រីត (Pup Street) ជាប់បរិវេណផ្សារចាស់ កណ្ដាលក្រុងសៀមរាប»។
ចំណែកអ្នកនាំពាក្យព្រឹត្តិការណ៍អង្គរសង្ក្រាន្ត លោក សោម រតនា ឲ្យដឹងថា មានយុវជនស្រីប្រុសជាង ៣.៥០០នាក់មកចូលរួមលេងល្បែងប្រជាប្រិយជាច្រើនប្រភេទ បង្ហាញក្បាច់គុនខ្មែរ ព្រមទាំងបង្ហាញពីវប្បធម៌ប្រពៃណីផង៖ «យុវជនភាគច្រើនមកពីភ្នំពេញ ហើយយុវជនមួយចំនួនទៀតមកពីខេត្តសៀមរាប។ ពួកគេនាំគ្នាលេងល្បែងប្រជាប្រិយខ្មែរជាច្រើនប្រភេទ»។
ព្រឹត្តិការណ៍អង្គរសង្ក្រាន្ត គ្រោងនឹងប្រព្រឹត្តទៅនៅព្រឹកថ្ងៃទី១៤ ខែមេសា គឺលោកនាយករដ្ឋមន្ត្រី ហ៊ុន សែន គ្រោងនឹងអញ្ជើញធ្វើជាអធិបតីនៃការបើកព្រឹត្តិការណ៍នេះ ដោយរំពឹងថា អាចនឹងមានភ្ញៀវជាតិ និងអន្តរជាតិច្រើនម៉ឺននាក់ចូលរួមដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
ក្រុមរបាំអប្សរា រាំជូនពរ បន្ទាប់ពីអាចារ្យ បានធ្វើពិធីថ្វាយភ្លេងនិងបួងសួងនៅមុខប្រាសាទអង្គរ។
មន្ត្រីរាជរដ្ឋាភិបាល និងប្រធានសហភាពសហព័ន្ធយុវជនកម្ពុជា អុជធូប ទៀន ធ្វើពិធីបួងសួង នៅមុខប្រាសាទអង្គរវត្ត ដើម្បីចាប់ផ្ដើម ព្រឹត្តិការណ៍អង្គរសង្ក្រាន្ត។
ក្លោងទ្វាអង្គរសង្ក្រាន្ត ដែលគេធ្វើនៅច្រកទ្វាចូលខាងត្បូង នៃប្រាសាទអង្គរវត្ត។
សាលាឆទាន និងផ្ទះខ្មែរ ដែលគេធ្វើដាក់បង្ហាញ ក្នុងព្រឹត្តិការណ៍អង្គរសង្គ្រាន្ត នៅបរិវេណប្រាសាទបាយ័ន។
យុវតី និងយុវជន មកពីសកលវិទ្យាល័យ ភូមិន្ទវិចិត្រសិល្បៈ នាំគ្នាសម របាំស្វានៅលើរោងមហោស្រព។
ក្រុមយុវជន បាននាំគ្នាលេង ល្បែងប្រជាប្រិយលាក់កន្សែង នៅទីធ្លាមុខប្រាសាទអង្គរវត្ត។
ក្រុមប្រជាពលរដ្ឋ នាំគ្នារៀនធ្វើ នំផ្លែអាយ នៅជិតព្រះអង្គចេក ព្រះអង្គចម ក្នុងទីក្រុងសៀមរាប។
ចង្កៀងគោម ដែលគេធ្វើសម្រាប់អុជបំភ្លឺពេលយប់ ក្នុងព្រឹត្តិការណ៍អង្គរសង្ក្រាន្តនៅមុខប្រាសាទបាយ័ន។
ក្រុមម៉ូតូ នៃប៉ូលិសចរាចរណ៍ បានដាក់ពង្រាយនៅតាមគោលដៅសំខាន់ៗ ដើម្បី ធ្វើអន្តរាគមន៍ចរាចរណ៍ ក្នុងពេលចាំបាច់។
អត្ថបទដែលទាក់ទង
- អាជ្ញាធរខេត្តបាត់ដំបងរៀបចំកម្មវិធីប្រគំតន្ត្រី៤យប់អបអរសាទរបុណ្យចូលឆ្នាំថ្មី
- អាជ្ញាធរខេត្តកំពង់ចាមប្ដេជ្ញារក្សាសន្តិសុខឲ្យបានល្អជូនពលរដ្ឋក្នុងឱកាសបុណ្យចូលឆ្នាំថ្មី
- អាជ្ញាធរខេត្តព្រះសីហនុព្រមានចាត់វិធានការក្រុមយុវជនជិះម៉ូតូជះទឹកនិងប៉ាតម្សៅ
- ជំនឿរបស់ពលរដ្ឋចំពោះឆ្នាំវក ឬឆ្នាំស្វា
- រណ្ដាប់ទទួលទេវតាឆ្នាំថ្មី
- អាជ្ញាធរខ្មែរ-ថៃត្រៀមរៀបចំពិធីបុណ្យចូលឆ្នាំថ្មីនៅតាមព្រំដែនដើម្បីរឹតចំណងមិត្តភាព
- អាជ្ញាធរខេត្តព្រះសីហនុសម្អាតឆ្នេរសមុទ្ររង់ចាំទទួលទេសចរពេលបុណ្យចូលឆ្នាំ
- អត្ថន័យបទចម្រៀងភិសវង់នៅរដូវបុណ្យចូលឆ្នាំថ្មីប្រពៃណីជាតិ
- សមាគមចុងភៅត្រៀមអង្ករនិងម្សៅដំណើប២តោនធ្វើនំផ្លែអាយនិងបាយទ្រាបនៅអង្គរសង្ក្រាន្ត