សមត្ថកិច្ចរកឃើញទណ្ឌិតគំរាមទារប្រាក់ចេញពីពន្ធនាគារ។ រូបថត Fresh News
Wed, 19 July 2017
នៀម ឆេង
ភ្នំពេញប៉ុស្តិ៍
កណ្តាលៈ បន្ទាប់ពីធ្វើការស៊ើបអង្កេតសមត្ថកិច្ចបានរកឃើញជនសង្ស័យជាទណ្ឌិតម្នាក់ដែលមានលទ្ធភាពលេងហ្វេសប៊ុកនៅក្នុងពន្ធនាគារ ហើយបានគំរាមបង្ហោះវីដេអូអាក្រាតកាយរបស់ស្ត្រីម្នាក់ដែលបានលង់ស្នេហ៍លើទណ្ឌិតរូបនោះប្រសិនបើស្ត្រីរូបនោះមិនផ្ញើប្រាក់ឲ្យខ្លួនចំនួន ៥ ពាន់ដុល្លារ។
លោក អ៊ាវ ចំរើន ស្នងការខេត្តកណ្តាលបានឲ្យដឹងកាលពីម្សិលមិញថា ក្រោយពេលទទួលពាក្យបណ្តឹងពីស្ត្រីម្នាក់ឈ្មោះ ស.ណ.ជ អាយុ ៤៥ ឆ្នាំរួចមកសមត្ថកិច្ចខេត្តកណ្តាលបានស្រាវជ្រាវរយៈពេល ៥ ថ្ងៃ និងបានរកឃើញជនសង្ស័យម្នាក់មានឈ្មោះ យ៉ែម ប្រុស អាយុ ៤៣ ឆ្នាំដែលជាទណ្ឌិតកំពុងអនុវត្តទោសនៅពន្ធនាគារខេត្តព្រៃវែងដែលជននេះបានគំរាមថានឹងបង្ហោះវីដេអូអាក្រាតរបស់ស្ត្រីខាងលើ បើសិនជាជនរងគ្រោះមិនផ្ញើប្រាក់ឲ្យខ្លួន។
ការស្រាវជ្រាវរហូតដល់កំណត់បានមុខសញ្ញាខាងលើនេះធ្វើឡើងតាមពាក្យបណ្តឹងរបស់ជនរងគ្រោះដែលបានប្តឹងទៅសមត្ថកិច្ចខេត្តកណ្ដាលដោយបានលើកឡើងថាកាលពីចុងខែមិថុនាម្ចាស់ហ្វេសប៊ុកម្នាក់មានអាខោនឈ្មោះ Pros Na បានធ្វើជាមិត្តភក្តិរបស់នាងតាមហ្វេសប៊ុក។
ក្រោយពេលបានស្គាល់គ្នាហើយនៅថ្ងៃទី ៧ ខែកក្កដា ឈ្មោះនេះបានឲ្យនាងថតរូបអាក្រាតផ្ញើឲ្យគេ។ ក្រោយពេលផ្ញើហើយនៅថ្ងៃទី ១២ ខែកក្កដាឈ្មោះនេះបានទូរស័ព្ទមកទារលុយ ៣ ពាន់ដុល្លារ ប៉ុន្តែនាងបានផ្ញើឲ្យតែ ៥០០ ដុល្លារប៉ុណ្ណោះ។
បន្ទាប់មកនៅថ្ងៃទី ១៣ ខែកក្កដាឈ្មោះនេះបានទូរស័ព្ទមកម្តងទៀតដោយទារប្រាក់ ៥ ពាន់ដុល្លារ និងគំរាមបង្ហោះរូបតាមហ្វេសប៊ុក បើសិនជានាងមិនព្រមឲ្យ។
ប៉ុន្តែលោក អ៊ាវ ចំរើន បានបញ្ជាក់ថាជនសង្ស័យជាទណ្ឌិតរូបនេះបានប្រើប្រាស់ប្រព័ន្ធទំនាក់ទំនង Line ដើម្បីធ្វើសកម្មភាពអាក្រាតកាយរៀងៗខ្លួនជាមួយស្ត្រីរងគ្រោះ។ ឆ្លៀតពេលនោះជននេះបានយកទូរស័ព្ទមួយគ្រឿងមកថតសកម្មភាពដើម្បីទុកគំរាមទារប្រាក់។
លោកបានបញ្ជាក់ថា តាមការសាកសួររបស់សមត្ថកិច្ចជនសង្ស័យ យ៉ែម ប្រុស បានប្រាប់ថាខ្លួនជាប់ពន្ធនាគារក្នុងបទល្មើសប្លន់ ៨ ករណីដែលត្រូវជាប់ពន្ធនាគារ ១០ ឆ្នាំចាប់តាំងពីឆ្នាំ ២០១០ នៅពន្ធនាគារខេត្តកំពតហើយត្រូវបានផ្ទេរមកកាន់ខេត្តព្រៃវែង។
ជននេះបានប្រាប់សមត្ថកិច្ចថា៖ «នៅក្នុងពន្ធនាគារខេត្តព្រៃវែងពេលដែលរូបខ្ញុំចេញមកក្រៅបន្ទប់ឃុំឃាំងគឺអាចលេងកុំព្យូទ័រ និងទូរស័ព្ទបាន ពីព្រោះទទួលបានការអនុញ្ញាតពីលោក អ៊ុំ រ៉ាយឿង អនុប្រធានពន្ធនាគារខេត្តព្រៃវែង កន្លងមកខ្ញុំធ្លាប់ទិញសម្ភារប្រើប្រាស់មួយចំនួនឲ្យគាត់។ នៅក្នុងពន្ធនាគារខ្ញុំបានប្រើប្រាស់ទូរស័ព្ទ ៣ គ្រឿង និងកុំព្យូទ័រ Laptop មួយគ្រឿង»។
ជនសង្ស័យបន្តថា ខ្លួនបានប្រើប្រាស់គណនីហ្វេសប៊ុកចំនួន ៥ ដែលមានឈ្មោះ pros na, Bong rin, Sothea ra, ឈ្មោះ បឺតភា កូនម៉ាក់មុំ, និងឈ្មោះ Chang Chang។ នៅពេលគំរាមឲ្យស្ត្រីរងគ្រោះផ្ញើប្រាក់ ៥០០ ដុល្លារតាមវីង ខ្លួនបានឲ្យមន្ត្រីពន្ធនាគារម្នាក់ឈ្មោះ ចែ ម៉ៅ ទៅបើកលុយមកឲ្យខ្លួន ហើយក្រោយមកបានទទួលប្រាក់ពីជនរងគ្រោះ ២០ ដុល្លារទៀតដោយឲ្យមន្ត្រីពន្ធនាគារឈ្មោះ គង់ ជាអ្នកទៅបើក។
លោក អ៊ាវ ចំរើន បានបន្តថា៖ «នៅក្នុង Laptop ជនល្មើសនៅមានរូបវីដេអូអាក្រាតរបស់នារីដែលវាទាក់ទងស្នេហាមិនក្រោម ៥-៦ នាក់ទៀតហើយនៅក្នុងគណនីហ្វេសប៊ុកជនល្មើសមានមិត្តភក្តិសុទ្ធតែជានារីក្នុងមួយគណនីជាង ១៥០ នាក់ផងដែរ»។
យោងតាមហ្វេសប៊ុកអាខោនមួយដែលមានឈ្មោះ Pros Na មានមិត្តភក្តិជាស្ត្រីចំនួន ១២៤ នាក់ដែលស្ទើរតែជាស្ត្រីទាំងអស់។ អាខោនហ្វេសប៊ុកនេះបានកំណត់ទីតាំងថានៅខេត្តព្រៃវែង។
ហ្វេសប៊ុកមួយទៀតដែលមានឈ្មោះថា «បឺតភាកូនម៉ាក់មុំ» មានដាក់រូបជនសង្ស័យខាងលើ និងមានស្ត្រីម្នាក់អាយុប្រហែលជាង ៤០ ឆ្នាំ។
លោកស្នងការខេត្តកណ្តាលបានឲ្យដឹងថាលោកមិនដឹងថាឈ្មោះនេះបានប្រព្រឹត្តអំពើបែបនេះតាំងពីពេលណាទេ។ លោកថាជនសង្ស័យពេលនេះកំពុងស្ថិតនៅពន្ធនាគារខេត្តព្រៃវែង ខណៈសមត្ថកិច្ចកសាងសំណុំរឿងបញ្ជូនទៅតុលាការ។
លោកថ្លែងថា៖ «មុខសញ្ញាវានៅក្នុងគុកស្រាប់ហើយ មិនចាំបាច់ទៅចាប់ទេ វាជាទណ្ឌិតកំពុងអនុវត្តទោស។ ទាក់ទងនឹងមន្ត្រីពាក់ព័ន្ធហ្នឹងអាស្រ័យលើអង្គភាពរបស់គាត់ហើយទីពីរជាឆន្ទានុសិទ្ធិរបស់ចៅក្រម។ ក្នុងចំណោមជនរងគ្រោះ ៥ ទៅ ៦ នាក់ អត់មានអនីតិជនទេ។ ខ្ញុំមើលទៅសាច់ឈាមគាត់អាយុប្រហែលជា ៣០ ឬ ៤០ ជាង ឬក្រោម ៥០ ឆ្នាំភាគច្រើនមេម៉ាយ។ នៅពេលតុលាការចាត់ការតាមនីតិវិធីហើយប្រធានអយ្យការប្រហែលលោកឲ្យបំផ្លាញចោលហើយមិនទុកទេ ព្រោះដើម្បីរក្សាកេរ្តិ៍ឈ្មោះគាត់»។
លោក នុត សាវនា អគ្គនាយករងពន្ធនាគារថ្លែងថាមន្ត្រីរបស់លោកនឹងចុះទៅស្រាវជ្រាវករណីនេះក្នុងសប្តាហ៍នេះហើយថាអ្នកដែលពាក់ព័ន្ធអាចប្រឈមបទសម្រួលដល់ជនល្មើសដើម្បីប្រព្រឹត្តបទល្មើស។
លោកថ្លែងថា៖ «ទីមួយសុទ្ធតែជារឿងបទល្មើសពាក់ព័ន្ធព្រហ្មទណ្ឌ សម្រួលដល់ការប្រើប្រាស់វត្ថុហាមឃាត់នៅក្នុងពន្ធនាគារមួយទៀតបណ្ដោយឲ្យជនជាប់ឃុំទៅប្រព្រឹត្តបទល្មើសផ្តល់ជាមធ្យោបាយអនុញ្ញាត ឬផ្តល់ឱកាសធ្វើឲ្យវាអាចប្រព្រឹត្តបទល្មើសបានអាហ្នឹងវាជាប់ពាក់ព័ន្ធដែរ។ អាហ្នឹងទាំងបទល្មើសព្រហ្មទណ្ឌ ទាំងបទល្មើសរដ្ឋបាល ហើយខ្ញុំកំពុងតែរៀបចំដើម្បីចុះទៅធ្វើការងារហ្នឹង»។
ទោះយ៉ាងណា លោក សាវនា មានការមិនពេញចិត្តដែលសមត្ថកិច្ចបានបញ្ចេញព័ត៌មាននេះជាសាធារណៈ។
លោក ជួប សារីម ប្រធានពន្ធនាគារខេត្តព្រៃវែងមិនអាចសុំការបំភ្លឺបានទេពីម្សិលមិញ៕
Contact author: នៀម ឆេង