ដោយ លោក ពេជ្រ ចំរុង​​ | ថ្ងៃព្រហស្បតិ៍ ទី១ ខែមីនា ឆ្នាំ២០១៨​
http://vodhotnews.com

នយោបាយ | សិទ្ធិមនុស្ស

លោក Chris Bowen សមាជិក​សភា​អូស្ត្រាលី​មក​ពី​បក្ស​ប្រឆាំង (រូបភាពពី AFR)

សមាជិកសភាអូស្ដ្រាលីម្នាក់ គាំទ្រការតវ៉ាប្រឆាំងវត្តមានលោកនាយករដ្ឋមន្ដ្រី ហ៊ុន សែន នៅឯ​កិច្ចប្រជុំកំពូលមួយនៅ​ក្នុង​ខែ​មីនានេះ បន្ទាប់ពីមេដឹកនាំកម្ពុជា បាន​ថ្លែង​គំរាម​​ប្រើ​អំពើ​ហិង្សា​លើ​ក្រុម​អ្នក​តវ៉ា​ប្រឆាំង​នឹង​រូប​លោក​នៅ​លើ​ទឹក​ដី​អូស្ត្រាលី។

ថ្លែងក្នុងកិច្ចប្រជុំសភា កាលពីថ្ងៃពុធម្សិលមិញ លោក Chris Bowen សមាជិក​សភា​អូស្ត្រាលី​មក​ពី​បក្ស​ប្រឆាំង បានទទូចទៅរដ្ឋាភិបាលប្រទេសមួយនេះ ឲ្យគាំទ្រសហគមន៍ខ្មែរ-អូស្ដ្រាលី ដែល​ត្រៀមធ្វើបាតុកម្មអហិង្សាប្រឆាំងវត្តមានលោក ហ៊ុន សែន។ នេះ​បើ​តាម​វីដេអូ​មួយ​ដែល​ត្រូវ​បាន​បង្ហោះ​លើ​ហ្វេសប៊ុក​របស់​សមាជិក​សភា​រូប​នេះ​កាល​ពី​ថ្ងៃ​ម្សិល​មិញ​នេះ។

ក្នុង​វីដេអូ​នោះ លោកថ្លែងថា ទោះបីលោក ហ៊ុន សែន ជាមេដឹកនាំអាស៊ាន ប៉ុន្ដែភាសាគំរាមកំហែង​ដែលលោកប្រើនោះ មិនគួរត្រូវបានស្វាគមន៍លើទឹកដីអូស្ដ្រាលីឡើយ។

សមាជិកសភាអូស្ដ្រាលីរូបនេះ ក៏ថ្លែងរិះគន់ការដឹកនាំរបស់លោក ហ៊ុន សែន ថា ពោរពេញដោយការរំលោភសិទ្ធិមនុស្ស គៀបសង្កត់បក្សប្រឆាំង និងអង្គការសង្គមស៊ីវិល។

លោកថ្លែងថា៖ «លោក ហ៊ុន សែន កាលពីពេលថ្មីៗនេះ បានបង្ក្រាបទៅលើសិទ្ធិបញ្ចេញមតិដោយសេរី។ គាត់បិទស្ថាប័ន​ព័ត៌មាន​ដែលរិះគន់គាត់ គាត់ចាប់ដាក់គុកសមាជិកបក្សប្រឆាំង ហើយអ្វីជាក្ដីព្រួយបារម្ភជាងនេះទៀតនោះ គឺលោក ហ៊ុន សែន បានថ្លែងសន្ទរកថា ដែលក្នុងសន្ទរកថានោះ គាត់ថា បើមានការតវ៉ាប្រឆាំង ឬដុតរូបទីងម៉ោងមានរូបគាត់នោះ គាត់នឹងឲ្យគេតាមពួកគេដល់ផ្ទះ វាយពួកគេ និងចាប់ពួកគេ ហើយពួកគេត្រូវដឹងថា សភាមួយនេះ មិនអនុញ្ញាតឲ្យមានភាសាបែបនេះ​ពីនរណាម្នាក់ បើទោះជាពួកគេជាប្រមុខរដ្ឋាភិបាលប្រទេសណាមួយក៏ដោយ។ យើងនឹងឈរនៅជាមួយសហគមន៍ខ្មែរ-អូស្ដ្រាលី និងសិទ្ធិរបស់ពួកគេ ក្នុងការតវ៉ាដោយសន្ដិវិធី។ បើទោះគាត់ជានាយករដ្ឋមន្ដ្រី គាត់មិនអាចមកប្រទេសយើង ហើយប្រកាន់អាកប្បកិរិយាដូចនេះបានឡើយ»។

ថ្លែងក្នុងពិធីមួយពីខេត្តកំពង់ចាម នៅថ្ងៃព្រហស្បតិ៍នេះ លោក ហ៊ុន សែន រំឭកឲ្យរដ្ឋាភិបាលអូស្ដ្រាលី ការពារសុវត្ថិភាពរបស់លោក ដោយថា អាចមានក្បួនតវ៉ាណាមួយ នៅពេលលោកចូលរួមកិច្ចប្រជុំកំពូលអាស៊ាន-អូស្ដ្រាលីខាងមុខនេះ។

លោកថ្លែងថា៖ «ក្នុងស្រុកខ្មែរអត់ហ៊ានស្រែកទេ ហ៊ានស្រែកក្រៅប្រទេស ប៉ុន្ដែ ខ្ញុំព្រះករុណាខ្ញុំ​ទៅប្រទេសអូស្ដ្រាលី រដ្ឋាភិបាលប្រទេសអូស្ដ្រាលី ក៏ត្រូវមានការទទួលខុសត្រូវ មិនមែនខ្ញុំទៅជិះតាក់ស៊ីទេ ជិះឡានដាក់ទង់ជ័យកម្ពុជា ក្នុងឋានៈជានាយករដ្ឋមន្ដ្រី​នៃប្រទេសឯករាជ្យ អធិបតេយ្យភាព ហើយក៏ជាសមាជិកអាស៊ាន»។

យ៉ាងណាក៏ដោយ សន្ទុះនៃការតវ៉ាប្រឆាំងវត្តមានលោក ហ៊ុន​ សែន បានកើនឡើង បន្ទាប់ពីលោក ហ៊ុន សែន ថ្លែងគំរាមឲ្យកម្លាំងតាមពួកគេដល់ផ្ទះ បើហ៊ានដុតទីម៉ោង ដែលភ្ជាប់រូបលោកនាយករដ្ឋមន្ដ្រីនោះ។

ពលរដ្ឋខ្មែរនៅអូស្ដ្រាលី ដែលមិនពេញចិត្តការដឹកនាំរបស់លោក ហ៊ុន​ សែន បានប្រកាសថា ពួកគេនឹងធ្វើបាតុកម្មប្រឆាំងវត្តមានរបស់លោក ដែលនឹងចូលរួមកិច្ចប្រជុំកំពូលអាស៊ាន-អូស្ដ្រាលី នៅថ្ងៃទី១៧-១៨ខែមិនាខាងមុខនេះ៕

សរសេរមកកាន់ លោក ពេជ្រ ចំរុង តាមរយៈ chamrong@vodhotnews.com