លោកនាយករដ្ឋមន្ត្រី ហ៊ុន សែន ពេលជួបសំណេះសំណាលជាមួយកម្មករកន្លងមក។ រូបថត ហ្វេសប៊ុក
Tue, 10 April 2018
បែន សុខហ៊ាន
ភ្នំពេញប៉ុស្តិ៍
ភ្នំពេញៈ លោកនាយករដ្ឋមន្ត្រី ហ៊ុន សែន បានចាត់ទុកឆ្នាំ ២០១៧ កន្លងទៅគឺជាឆ្នាំដែល «បដិវត្តន៍ពណ៌» ត្រូវទទួល «បរាជ័យយ៉ាងធ្ងន់ធ្ងរ» នៅកម្ពុជាជាអ្វីដែលលោកបានអធិប្បាយថា ជាឧបាយកលរបស់អតីតគណបក្សប្រឆាំងក្នុងការឃុបឃិតជាមួយបរទេសដើម្បី «ប៉ុនប៉ងផ្តួលរំលំរាជរដ្ឋាភិបាលស្របច្បាប់»។
ប៉ុន្តែអតីតមន្ត្រី អតីតគណបក្សសង្គ្រោះជាតិបានចាត់ទុកវោហារស័ព្ទរបស់លោកនាយករដ្ឋមន្ត្រីថា គ្រាន់តែជាការ «លាបពណ៌» ដើម្បីបង្ក្រាបគណបក្សប្រឆាំងតែប៉ុណ្ណោះ។
ក្នុងសារលិខិតដែលមានចំនួន ៥ ទំព័រផ្ញើជូនជនរួមជាតិនាឱកាសបុណ្យចូលឆ្នាំខ្មែរខាងមុខដែលចុះកាលបរិច្ឆេទកាលពីថ្ងៃទី ៣ ខែមេសា ហើយទើបតែត្រូវបានផ្សព្វផ្សាយជាសាធារណៈកាលពីម្សិលមិញ លោកនាយករដ្ឋមន្ត្រី បានចាត់ទុកឆ្នាំ ២០១៧ ថាជាឆ្នាំដែល «បដិវត្តន៍ពណ៌» ត្រូវទទួលបរាជ័យយ៉ាងធ្ងន់ធ្ងរនៅកម្ពុជា ដោយលោកសំដៅសកម្មភាពរបស់អតីតគណបក្សសង្គ្រោះជាតិ។
តុលាការកំពូលកាលពីពាក់កណ្តាលខែវិច្ឆិកា ឆ្នាំ ២០១៧ បានប្រកាសរំលាយគណបក្សសង្គ្រោះជាតិ និងហាមឃាត់ឥស្សរជនជាន់ខ្ពស់របស់គណបក្សនេះចំនួន ១១៨ រូប មិនឲ្យធ្វើនយោបាយរយៈពេល ៥ ឆ្នាំ ខណៈលោក កឹម សុខា ប្រធានគណបក្សនេះ កំពុងជាប់ពន្ធនាគារក្រោមការចោទប្រកាន់ពីបទ «ក្បត់ជាតិ»។
លោក ហ៊ុន សែន បានសរសេរថា៖ «ក្នុងឆ្នាំកន្លងទៅទោះបីកម្ពុជាបានប្រឈមមុខនឹងឧបសគ្គគ្រប់បែបយ៉ាងទាំងក្នុង និងក្រៅប្រទេសក៏ដោយ ក៏ខឿនការពារជាតិរបស់ប្រជាជន និងខឿនសន្តិសុខជាតិត្រូវបានពង្រឹងយ៉ាងរឹងមាំធានាដល់កិច្ចការពារបូរណភាពដែនដី ការពារសន្តិសុខ ស្ថិរភាពនយោបាយ និងភាពសុខដុមរមនានៃសង្គមជាតិទាំងមូលជាពិសេសឧបាយកលបដិវត្តន៍ពណ៌របស់គណបក្សប្រឆាំងដែលឃុបឃិតជាមួយបរទេស ប៉ុនប៉ងផ្តួលរំលំរាជរដ្ឋាភិបាលស្របច្បាប់ក៏ត្រូវបានទប់ស្កាត់ដោយជោគជ័យតាមរយៈវិធានការច្បាប់ដ៏ម៉ឺងម៉ាត់ ហើយក៏ជាឆ្នាំដែលបដិវត្តន៍ពណ៌ ត្រូវទទួលបរាជ័យយ៉ាងធ្ងន់ធ្ងរនៅកម្ពុជាផងដែរ»។
លោកគូសបញ្ជាក់ថា៖ «ជាលទ្ធផល កម្ពុជារក្សាបាននូវសន្តិភាព ឯករាជ្យ និងអធិបតេយ្យភាពរបស់ខ្លួនព្រមទាំងបញ្ចៀសបាននូវគ្រោះមហន្តរាយជាថ្មីសម្រាប់ពលរដ្ឋកម្ពុជាដែលកំពុងចូលរួមយ៉ាងសស្រាក់សស្រាំក្នុងជីវភាពរស់នៅប្រចាំថ្ងៃ និងកិច្ចអភិវឌ្ឍន៍ប្រទេសជាតិ»។
បន្ថែមលើនេះលោកនាយករដ្ឋមន្ត្រីក៏បានសរសើរពីកំណើនសេដ្ឋកិច្ច ៦.៩ ភាគរយក្នុងឆ្នាំ ២០១៧ កន្លងទៅការទទួលបានសេវាអប់រំគ្រប់រូបភាព ការកសាងហេដ្ឋារចនាសម្ព័ន្ធ ការអភិវឌ្ឍវិស័យធារាសាស្ត្រ ឧស្សាហកម្ម ការដំឡើងប្រាក់ឈ្នួលអប្បបរមាជូនកម្មករឲ្យឡើងដល់ ១៧០ ដុល្លារក្នុង ១ ខែ ជាដើម។ លោកក៏មិនភ្លេចអំពាវនាវឲ្យពលរដ្ឋទៅចូលរួមបោះឆ្នោតជាតិនាខែកក្កដា ឆ្នាំ ២០១៨ ដើម្បី «អនុវត្តសិទ្ធិពលរដ្ឋក្នុងឋានៈជាម្ចាស់ជោគវាសនានៃប្រទេសរបស់ខ្លួន»។
នៅចុងបញ្ចប់នៃសារលិខិតដែលមានចំនួន ៥ ទំព័រនេះលោក ហ៊ុន សែន បានបួងសួងឲ្យ «ប្រជាពលរដ្ឋខ្មែរគ្រប់រូបឲ្យមានសន្ដានចិត្តជាកុសល យោគយល់គ្នា រួបរួមសាមគ្គីគ្នា ជាមហាគ្រួសារតែមួយនៅលើទឹកដីមាតុភូមិអង្គរជាទីស្នេហា ដោយសេចក្ដីសុខក្សេមក្សាន្ត និងប្រកបដោយកិត្តិយស សេចក្ដីថ្លៃថ្នូរ តរៀងទៅ»។
លោក អ៊ូ ច័ន្ទរ័ត្ន អតីតតំណាងរាស្ត្រអតីតគណបក្សសង្គ្រោះជាតិថ្លែងថា លោកស្វាគមន៍ចំពោះសមិទ្ធផលជាវិជ្ជមានដែលរាជរដ្ឋាភិបាលបានធ្វើកន្លងមក តែទោះយ៉ាងណាលោកថាការចោទគណបក្សប្រឆាំងថាមានគម្រោងធ្វើបដិវត្តន៍ពណ៌ ដើម្បីផ្តួលរំលំរាជរដ្ឋាភិបាលនោះគឺជា «ការយល់ច្រឡំ» រវាងគ្នា និងគ្នាប៉ុណ្ណោះ។
លោកថ្លែងថា៖ «ខ្ញុំយល់ថាគណបក្សសង្គ្រោះជាតិតែងតែឈរលើគោលការណ៍អហិង្សា ហើយយើងតែងឈរលើគោលមាគ៌ានយោបាយប្រជាធិបតេយ្យ យើងមិនដែលមានគំនិតដណ្ដើមអំណាចដោយប្រើប្រាស់ ឬក៏ធ្វើបដិវត្តន៍ពណ៌ទេ ហើយវាក៏មិន logic ផងដោយសារសំឡេងអ្នកប្រឆាំង សឹងតែស្មើគ្នានឹងសំឡេងរបស់គណបក្សកាន់អំណាចទៅហើយ ដូច្នេះគ្មានកិច្ចការអីចាំបាច់ទៅផ្តួលរំលំរាជរដ្ឋាភិបាលស្របច្បាប់មួយតាមមធ្យោបាយផ្សេង ក្រៅពីការបោះឆ្នោតទេ»។
លោកបន្ថែមថា៖ «បើយើងនិយាយពីការលាបពណ៌ គឺត្រឹមត្រូវជាងដើម្បីបង្ក្រាបបក្សប្រឆាំង ហើយសម្រាប់ប្រជាពលរដ្ឋខ្មែរលោកយល់ហើយ ទោះបីសារជូនពរនោះមានខ្លឹមសារយ៉ាងម៉េច ប្រជាពលរដ្ឋខ្មែរលោកយល់ ហើយលោកមិនអាចទៅជឿបានទេ ហើយខ្ញុំនៅតែជឿថាការបំបាត់សំឡេងជាង ៣ លាននាក់ដែលជាឆន្ទៈរបស់ប្រជាពលរដ្ឋខ្មែរ វាមិនមែនជាការងាយទេ»។
លោក Paul Chambers អ្នកជំនាញអំពីអាស៊ីអាគ្នេយ៍នៅសាកលវិទ្យាល័យ Naresuan ក្នុងទីក្រុងបាងកក ប្រទេសថៃបានថ្លែងថា៖ «សុន្ទរកថារបស់លោក ហ៊ុន សែន តំណាងឲ្យការធ្វើនយោបាយសម្រាប់ការបោះឆ្នោតនាខែកក្កដា។ ជាការពិតសកម្មភាពរបស់គាត់តាំងពីចុងឆ្នាំ ២០១៦ មក លោក ហ៊ុន សែន បានបំផ្លាញលទ្ធិប្រជាធិបតេយ្យកម្ពុជាយ៉ាងមានប្រសិទ្ធភាព។ លម្ហនយោបាយ និងលទ្ធិប្រជាធិបតេយ្យសេរីនិយមបានក្លាយជាសត្រូវដ៏ខ្លាំងក្លារបស់គាត់»៕
រាយការណ៍បន្ថែមដោយ Andrew Nachemson
Contact author: បែន សុខហ៊ាន
Veitcong mafia dictator can do anything in this country because this country is in your hand mr veitcong mafia dictator’ what ever you said are right in your circle in your mafia groups but for international and around the world ‘you are the worse mafia dictator in this planet ‘because you never respected Human right ‘you never respected constitution ,never respected the treaty of Parish accord and you did the coup killing a lot of khmer nationalists ‘you can win here but you will die soon and lose in the hell ‘ and the hell’s gate open for you ‘. GOD bless all good people’