ដោយ ទីន ហ្សាការីយ៉ា
2018-04-10
RFA
ស្ដាប់ ឬទាញយកសំឡេង
រូបថតអត់មានកាលបរិច្ឆេទរបស់ប៉ូលិសកម្ពុជា បង្ហាញពីសមាជិករណសិរ្សរំដោះជាតិខ្មែរជាមួយ លោក សម សេរី (ឈរកណ្ដាល)។ Photo courtesy of Cambodian National Police
ការបដិសេធរបស់លោក សម សេរី គឺឆ្លើយតបមេដឹកនាំរបបក្រុងភ្នំពេញ លោកនាយករដ្ឋមន្ត្រី ហ៊ុន សែន ដែលអះអាងថា របបលោក បានទប់ស្កាត់ ចំពោះគម្រោងរបស់មេដឹកនាំចលនារណៈសិរ្សរំដោះជាតិខ្មែរ លោក សម សេរី ដែលមានបំណងចង់បំផ្ទុះគ្រាប់បែក នៅម្ដុំវត្តភ្នំ និងខេត្តសៀមរាប នៅថ្ងៃទី១២ មេសា។
ថ្លែងនៅចំពោះមុខនិស្សិតរាប់ពាន់នាក់ ក្នុងកម្មវិធីចែកសញ្ញាប័ត្រ នៅថ្ងៃទី១០ មេសា លោក ហ៊ុន សែន អះអាងថា អ្នកដែលទទួលបញ្ជាឲ្យធ្វើសកម្មភាពដាក់បំផ្ទុះគ្រាប់ បង្កឲ្យមានសំឡេងផ្ទុះ មុនថ្ងៃចូលឆ្នាំ បានបដិសេធប្រាប់ទៅលោក សម សេរី វិញថា ធ្វើមិនកើតទេ។ តែលោក ហ៊ុន សែន បារម្ភថា លោក សម សេរី អាចរកមនុស្សផ្សេងទៅធ្វើសកម្មភាពនេះ។
លោក សម សេរី ជាមេដឹកនាំចលនារណៈសិរ្សរំដោះជាតិខ្មែរ មានមូលដ្ឋាននៅប្រទេសដាណឺម៉ាក។ កន្លងមក របបក្រុងភ្នំពេញ បានចាប់មនុស្សជាច្រើននាក់ ដោយចោទថា ជាសមាជិករបស់ចលនាមួយនេះ។ កាលពីឆ្នាំ២០១៤ បុរសចំនួន ១២នាក់ និងស្ត្រីម្នាក់ ត្រូវបានរបបក្រុងភ្នំពេញ ចោទថា មានពិរុទ្ធភាព ពីបទរៀបផែនការផ្តួលរំលំរដ្ឋាភិបាល ហើយក៏ត្រូវបានផ្តន្ទាទោសឲ្យជាប់ពន្ធនាគារចន្លោះពី ៥ឆ្នាំដល់ ៩ឆ្នាំដែរ។
ចំណែកកាលពីខែឧសភា ឆ្នាំ២០១៧ របបក្រុងភ្នំពេញ បានចាប់តាចាស់ពីរនាក់ ដោយចោទថា ជាក្រុមភេវរករ ខណៈពួកគេមានគម្រោងរៀបចំសន្និសីទកាសែតជាមួយឧត្តមស្នងការអន្តរសាសន៍ ដែលមិនធ្លាប់ឮឈ្មោះ នៅការិយាល័យរបស់អង្គការនេះ ដែលមានទីតាំងស្ថិតនៅក្នុងខណ្ឌច្បារអំពៅ រាជធានីភ្នំពេញ ក្នុងគោលបំណង ដើម្បីស្វែងរកដំណោះស្រាយវិបត្តិនយោបាយនៅកម្ពុជា កាលណោះ។
អ្នកនាំពាក្យក្រសួងមហាផ្ទៃ ប្រាប់សារព័ត៌មានក្នុងស្រុកថា ប៉ូលិសបានដាក់ពង្រាយការពារតំបន់គោលដៅសំខាន់ៗ អស់ហើយ។ លោក ខៀវ សុភ័គ្គ បានអួតប្រាប់សារព័ត៌មានក្នុងស្រុកថា ពិសោធន៍របស់ប៉ូលិសនៅកម្ពុជា បើគិតតាំងពីឆ្នាំ១៩៧៩មក មានរយៈពេល ៣៩ឆ្នាំហើយ។ ដូច្នេះ គ្មានបទល្មើសអ្វីអាចគេចពីសមត្ថកិច្ចបានទេ៕