ការងារ | ព័ត៌មានជាតិ
លោក ឃុត សុគន្ធ | ២៦ សីហា ២០២០ | ម៉ោង ១៣:៣៩
VOD
ទិដ្ឋភាពនៅពីមុខខ្លោងទ្វារចូលរោងចក្រ សឺពីយ៉ា ព្រឹកថ្ងៃទី២៨ ខែកុម្ភៈ ឆ្នាំ២០២០។ (ឃុត សុគន្ធ)
កម្មករ-កម្មការិនីជាង២០០នាក់ បម្រើការងារនៅរោងចក្រ សឺពីយ៉ា (SEPIA) ស្ថិតក្នុងខណ្ឌពោធិ៍សែនជ័យ រាជធានីភ្នំពេញ មិនព្រមចូលបំពេញការងារវិញទេ ក្រោយពីពួកគេទទួលប្រាក់ឈ្នួលមិនគ្រប់ចំនួននិងគ្មានការទូទាត់ប្រាក់អត្ថប្រយោជន៍ផ្សេងៗ។
កម្មករទាំងនោះបាននាំគ្នាតវ៉ាជាបន្តបន្ទាប់តាំងពីថ្ងៃទី១២ ខែសីហា ក្រោយពីភាគីរោងចក្របើកប្រាក់ឈ្នួលឱ្យពួកគេយឺតយ៉ាវ ក្រោមហេតុផលថា មានវិបត្តិហិរញ្ញវត្ថុដោយសារគ្មានអ្នកបញ្ជាទិញ។
កម្មករផ្នែកវាយឡេវ លោក អៀន រតនា ប្រាប់វីអូឌីថា ភាគីរោងចក្រនៅជំពាក់ប្រាក់ព្យួរការងារកម្មករ១ខែកន្លះអំឡុងខែមេសានិងពាក់កណ្តាលខែឧសភា ប្រាក់ឈ្នួលពាក់កណ្តាលខែកក្កដានិងខែសីហា ប្រាក់ដំណាច់ឆ្នាំ និងប្រាក់៥ភាគរយ។
កម្មកររូបនេះបន្តថា ក្រោយកម្មករតវ៉ា ថៅកែរោងចក្របានបើកប្រាក់ឱ្យកម្មករកាលពីថ្ងៃម្សិលមិញ ប៉ុន្តែបើកតែប្រាក់ឈ្នួលពាក់កណ្តាលខែកក្កដាប៉ុណ្ណោះ ដែលបណ្តាលឱ្យកម្មករមិនសប្បាយចិត្តនិងបន្តមិនព្រមចូលធ្វើការងារ។
លោកបន្ថែមថា៖ «បើថាថៅកែអត់មានលទ្ធភាព អត់មានលុយដោះស្រាយជូនកម្មករទេ សុំឱ្យមន្ត្រីពាក់ព័ន្ធទាំងអស់ចាត់វិធានការបញ្ចប់រឿងក្តីហ្នឹងតែម្តងទៅ ព្រោះគាត់អត់មានអីច្បាស់លាស់ជាមួយកម្មករផង ធ្វើឱ្យកម្មករបាត់ទំនុកចិត្ត។ កម្មករគាត់ជួបផលលំបាកច្រើនណាស់ ផ្ទះជួលអត់លុយបង់ឱ្យគេ អ្នកខ្លះអត់លុយបង់ធនាគារ និងសំខាន់បំផុតការចាយវាយប្រចាំថ្ងៃ គឺអត់លុយចាយតែម្តង»។
វីអូឌី មិនទាន់អាចសុំការបញ្ជាក់ជុំវិញករណីនេះពីប្រធានរដ្ឋបាលរោងចក្រ សឺពីយ៉ា លោក គង់ សម្បត្តិ បាននៅឡើយទេ នៅព្រឹកថ្ងៃពុធនេះ។
ប៉ុន្តែលោកបានមានប្រសាសន៍កាលពីថ្ងៃទី១២ ខែសីហាថា មូលហេតុដែលភាគីរោងចក្របើកប្រាក់ឈ្នួលឱ្យកម្មករយឺតយ៉ាវ ដោយសាររោងចក្រមានបញ្ហាផ្នែកហិរញ្ញវត្ថុ ពោលគឺគ្មានអ្នកបញ្ជាទិញថ្មី ខណៈអ្នកបញ្ជាទិញមួយចំនួនមិនទាន់សងលុយត្រឡប់ក្រោយពីទទួលបានទំនិញ។
ប្រធានរដ្ឋបាលរោងចក្ររូបនេះបានសុំឱ្យកម្មករមានការយោគយល់ចំពោះការបើកប្រាក់ឈ្នួលយឺតយ៉ាវនេះ ដោយលោកថា រោងចក្រនឹងខិតខំកៀរគរថវិកាដើម្បីយកមកដោះស្រាយជូនកម្មករទៅតាមលទ្ធភាព។
អគ្គលេខាធិការរងគណៈកម្មការដោះស្រាយកូដកម្មបាតុកម្មគ្រប់មុខសញ្ញា នៃក្រសួងការងារ និងបណ្តុះបណ្តាលវិជ្ជាជីវៈ លោក វង្ស សុវណ្ណ ដែលចុះសម្របសម្រួលដោះស្រាយករណីនេះ ប្រាប់ថា កំពុងរវល់ប្រជុំ។
បើតាមភាគីរោងចក្រ បច្ចុប្បន្ន រោងចក្រនេះមានកម្មករសរុប២៧០នាក់និងជារោងចក្រទទួលដេរសម្លៀកបំពាក់បន្តពីក្រុមហ៊ុនផ្សេងដែលមានថៅកែជាជនជាតិចិន៕
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។