បរិស្ថាន | ព័ត៌មានជាតិ | សង្គម
លោកស្រី ពេជ្រ សុធារី | ១៦ តុលា ២០២០ |ម៉ោង ១៨:៥៨
VOD

ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ។ (Royal du Cambodge)

ព្រះមហាក្សត្រ រំជួលព្រះរាជ​ហឬទ័យជាខ្លាំង​ និង​ចូលរួមរំលែកទុក្ខលំបាក​ជាមួយប្រជាពល​រដ្ឋ​ដែលរង​គ្រោះដោយ​សារជំនន់ទឹកភ្លៀង ដែលបណ្តាលឱ្យ​មានការ​បាត់បង់ជីវិត និងទ្រព្យ​សម្បត្តិ​ជាច្រើន។

នៅក្នុងព្រះរាជសារ​របស់ព្រះករុណា ​ព្រះបាទ សម្តេច​ព្រះបរមនាថ នរោត្តម សីហមុនី ផ្ញើជូន​លោក​នាយករដ្ឋមន្ត្រី ហ៊ុន សែន នៅថ្ងៃទី១៦ ខែតុលានេះ មានព្រះរាជបន្ទូលថា ព្រះអង្គរំជួល​ព្រះហឬទ័យជាខ្លាំង ក្រោយពីទទួលបានដំណឹងថា មានប្រជាពលរដ្ឋ​នៅរាជធានីភ្នំពេញ និង​តាមបណ្តាខេត្ត​មួយចំនួន បាន​ទទួលរង​គ្រោះដោយ​ជំនន់ទឹកភ្លៀងក្នុងរយៈពេលប៉ុន្មានថ្ងៃមក​នេះ បណ្តាលឱ្យ​មានការ​បាត់បង់ជីវិត និងខូចខាតទ្រព្យសម្បត្តិ។

ព្រះរាជសារបន្តថា៖ ««ខ្ញុំសូមចូលរួម​រំលែកទុក្ខលំបាក​បងប្អូនប្រជារាស្ត្រនៅទូទាំងប្រទេស​[…] ខ្ញុំសូមជូនពរដល់​បងប្អូន កូនចៅប្រជារាស្ត្រ​កម្ពុជា​ទាំងអស់ បានរួច​ផុតពីគ្រោះមហន្តរាយ​ធម្មជាតិ​ខាង​លើនេះ និងសូមមេត្តា​ការ​ពារ និងថែរក្សា​សុខភាពឱ្យបានល្អ កុំឱ្យ​មានជំងឺ​ឈឺថ្កាត់ផ្សេងៗ»។

ក្នុង​ព្រះរាជសារ ​ព្រះមហាក្សត្រ ​បាន​ថ្លែងអំណរគុណដល់ប្រមុខរាជរដ្ឋាភិបាល ដែលបាន​ចាត់​វិធានការ​ជួយ​ដោះស្រាយ​ និង​​ជម្លៀស​ប្រជាពលរដ្ឋ​ចេញពីតំបន់រង​គ្រោះទៅកាន់ទីតាំង​​សុវត្ថិភាពនានា​បានទាន់ពេលវេលា។​

បើតាមព្រះរាជសារ ព្រះមហាក្សត្រ ក៏បានព្រះរាជទាន​​ព្រះរាជអំណោយ​ជូនប្រជាពលរដ្ឋដែលរងគ្រោះតាមរយៈ ​រដ្ឋមន្ត្រីក្រសួង​ព្រះបរមរាជវាំង លោកចៅហ្វាវាំង គង់ សំអល់ ជាបន្តបន្ទាប់ផងដែរ។

ព្រះកុរណា ព្រះបាទ សម្តេច ​ព្រះ​បរមនាថ នរោត្តម សីហមុនី និងព្រះមហាវររាជមាតាជាតិខ្មែរ បានយាងចាកចេញពីប្រទេសកម្ពុជា​​ ឆ្ពោះទៅកាន់រដ្ឋធានីប៉េកាំង ប្រទេស​ចិន កាល​ពី​ថ្ងៃ​ទី០៦ ខែតុលា ដើម្បីគង់ប្រថាប់​ពិនិត្យ ​និងព្យាបាលព្រះរាជសុខភាព។

យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ​ គិតចាប់ពីថ្ងៃ​ទី១ ខែកញ្ញា ដល់ព្រឹក​ថ្ងៃទី១៦ ខែតុលា ជំនន់ទឹកភ្លៀង បានបង្កផលប៉ះពាល់ដល់ប្រជាពលរដ្ឋ​កើតដល់​ជាង ៥៣០០គ្រួសារ ស្មើនឹង​ជាង​ ២១ម៉ឺននាក់ និងផ្ទះជាង​ ៥ម៉ឺនខ្នង​ ខណៈ​មនុស្សស្លាប់បានកើនដល់១៨នាក់ និង​ប៉ះពាល់ដំណាំស្រូវនិងដំណាំរួមផ្សំផ្សេង​ៗជាច្រើន​ម៉ឺនហិកតា រួមនិងហេដ្ឋារចនាសម្ព័ន្ធជាច្រើនទៀត៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។