ដោយ សុជីវី
2023.07.25
RFA
ស្ដាប់ ឬទាញយកសំឡេង
(រូបឯកសារ) ឆ្វេង៖ កញ្ញា សេង ធារី នៅក្នុងពន្ធនាគារខេត្តព្រះវិហារ កាលពីថ្ងៃទី១៥ ខែមិថុនា ឆ្នាំ២០២២ និងស្ដាំ៖ កញ្ញា សេង ធារី តែងខ្លួនជាធីតាសេរីភាព ក្នុងពេលតវ៉ានៅខាងមុខសាលាដំបូងរាជធានីភ្នំពេញ កាលពីថ្ងៃទី១៤ ខែមិថុនា ឆ្នាំ២០២២ ប្រឆាំងនឹងការផ្ដន្ទាទោសកញ្ញា។ រូបពីពលរដ្ឋ
មន្ត្រីសិទ្ធិមនុស្ស និងសាច់ញាតិព្រួយបារម្ភចំពោះកញ្ញា សេង ធារី ដែលមានសុខភាពចុះខ្សោយខ្លាំងក្នុងពេលធ្វើកូដកម្មបង្អត់អាហារជាច្រើនថ្ងៃនៅក្នុងពន្ធនាគារខេត្តព្រះវិហារ។ ទោះយ៉ាងណា មន្ត្រីជាន់ខ្ពស់ពន្ធនាគារអះអាងថាកញ្ញា សេង ធារី មិនមានបញ្ហាសុខភាពគួរឱ្យបារម្ភនោះទេ។
សកម្មជនសិទ្ធិមនុស្ស កញ្ញា សេង ធារី បានធ្វើកូដកម្មបង្អត់អាហារអស់រយៈពេល ៩ថ្ងៃហើយនៅពន្ធនាគារខេត្តព្រះវិហារ។ មន្ត្រីសិទ្ធិមនុស្ស និងសាច់ញាតិថាការតស៊ូមតិដោយអត់អាហារបានធ្វើឱ្យកញ្ញាជួបការលំបាកជាច្រើនក្នុងពន្ធនាគារ ដែលមានផលប៉ះពាល់ចំពោះសុខភាពដោយសាររាងកាយចុះខ្សោយ។
ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា ឱ្យដឹងថា មេធាវីរបស់សមាគមបានចូលជួបសួរសុខទុក្ខ និងពិនិត្យមើលស្ថានភាព របស់កញ្ញា សេង ធារី នៅក្នុងពន្ធនាគារខេត្តព្រះវិហារកាលពីថ្ងៃទី២១ ខែកក្កដា។ លោកបន្តថាកញ្ញា សេង ធារី បានកោសក់សាជាថ្មី ប៉ុន្តែបញ្ហាដែលគួរឱ្យបារម្ភនោះគឺកញ្ញាមានសុខភាពខ្សោយខ្លាំង ចំណែករូបរាងកាយស្គម និយាយស្ដីខ្សាវៗ និងអារម្មណ៍មិនសូវនឹងនដោយសារកញ្ញាមិនបានហូបអាហារក្នុងអំឡុងពេលធ្វើកូដកម្មអស់រយៈពេលជាច្រើនថ្ងៃមកនេះ។ លោកបញ្ជាក់ថាកញ្ញានៅតែរក្សាជំហរស្មារតីរឹងមាំក្នុងការទាមទាររកយុត្តិធម៌ដដែល ពីព្រោះសកម្មភាពរបស់នាងកន្លងមកជាការប្រើប្រាស់សិទ្ធិសម្ដែងមតិក្នុងនាមជាពលរដ្ឋខ្មែរម្នាក់ដើម្បីឱ្យសង្គមមានសេរីភាព និងយុត្តិធម៌ពិតប្រាកដ។ មន្ត្រីសិទ្ធិមនុស្សរូបនេះបារម្ភពីសុខទុក្ខកញ្ញា សេង ធារី ដែលជាប់ឃុំដោយអយុត្តិធម៌ និងចង់ឲ្យរដ្ឋាភិបាលប្រគល់សេរីភាពជូននាងវិញ ពីព្រោះការបន្តឃុំខ្លួនកញ្ញាដូច្នេះមិនផ្ដល់ផលចំណេញដល់រដ្ឋាភិបាលនោះឡើយ។
លោក នី សុខា៖ «សកម្មភាពរបស់កញ្ញា សេង ធារី គឺខ្ញុំមើលឃើញថា មានការលះបង់កម្រិតមួយខ្ពស់ណាស់ គាត់លះបង់ដោយកោរសក់ គាត់លះបង់ដោយបង្អត់អាហារនេះជាការលះបង់ធំធេង ហើយខ្ញុំគិតថា ការលះបង់ទាំងនោះសហគមន៍អន្តរជាតិមើលឃើញថា រដ្ឋាភិបាលមិនបានអនុវត្តតាមគោលការណ៍គោរពសិទ្ធិមនុស្ស និងដំណើរការប្រជាធិបតេយ្យនៅក្នុងប្រទេសយើង អីចឹងវាធ្វើឱ្យមានការរិះគន់ពីមតិជាតិនិងអន្តរជាតិ»។
កញ្ញា សេង ធារី ធ្វើកូដកម្មបង្អត់អាហាររយៈពេល ១០ថ្ងៃ គឺចាប់ផ្ដើមតាំងពីថ្ងៃទី១៧ ខែកក្កដា និងបញ្ចប់នៅថ្ងៃទី២៦ ខែកក្កដា ដើម្បីជាសារទាមទារឱ្យរដ្ឋាភិបាលកម្ពុជារៀបចំការបោះឆ្នោតដោយសេរី និងយុត្តិធម៌ បើកលំហសិទ្ធិសេរីភាពពលរដ្ឋ សិទ្ធិនយោបាយ ហើយដោះលែងកញ្ញា និងអ្នកទោសនយោបាយផ្សេងទៀត។
ជុំវិញរឿងនេះ អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា អះអាងថាមកដល់ពេលនេះការធ្វើកូដកម្មបង្អត់អាហាររបស់ កញ្ញា សេង ធារី មិនមានបញ្ហាសុខភាពនោះទេ។ លោកឱ្យដឹងថា គ្រូពេទ្យបានពិនិត្យសុខភាពកញ្ញាចំនួន ២ដងក្នុងមួយថ្ងៃ និងត្រៀមថ្នាំពេទ្យសម្ភារៈជួយសង្គ្រោះជាដើម ខណៈមន្ត្រីស្ថានទូតអាមេរិកប្រចាំនៅកម្ពុជាទើបចូលសួរសុខទុក្ខកញ្ញានៅថ្ងៃទី២៤ ខែកក្កដា។
លោក នុត សវនា៖ «របបអាហារអីយើងដាក់ជូនគាត់រាល់ថ្ងៃ តែគ្រាន់ថាគាត់ហូប ឬមិនហូបជារឿងរបស់គាត់ ប៉ុន្តែស្ថានភាពសុខភាពគាត់ទូទៅដូចជាអត់មានបញ្ហាអ្វីនោះទេ ហើយគាត់ទើបជួបមន្ត្រីស្ថានទូតកាលពីម្សិលមិញទេ»។
ទោះយ៉ាងណាក្ដី បងប្រុសកញ្ញា សេង ធារី គឺលោក សេង ម៉ារឌី ថ្លែងថា លោកសោកស្ដាយចំពោះអាជ្ញាធរពន្ធនាគារកាលពីថ្ងៃទី២២ ខែកក្កដាមិនអនុញ្ញាតឱ្យលោកចូលសួរសុខទុក្ខប្អូនស្រីដែលកំពុងធ្វើកូដកម្មបង្អត់អាហារ ដោយសារ មន្ត្រីពន្ធនាគារថាមិនធ្វើការនៅថ្ងៃសៅរ៍ទេ។ លោកព្រួយបារម្ភថាការបង្អត់អាហារជាច្រើនថ្ងៃមកនេះនៅក្នុងពន្ធនាគារធ្វើឱ្យប៉ះពាល់សុខភាពកញ្ញា សេង ធារី ធ្ងន់ធ្ងរ។ លោកឱ្យដឹងថាលោកនឹងចុះទៅសួរសុខទុក្ខប្អូនស្រីនៅថ្ងៃទី២៦ ខែកក្កដា ដែលជាថ្ងៃចុងក្រោយនៃការធ្វើកូដកម្មបង្អត់អាហារ។
លោក សេង ម៉ារឌី៖ «ខ្ញុំមានការព្រួយបារម្ភខ្លាំងមែនទែន ទាក់ទងពីបញ្ហាសុខភាពរបស់គាត់ ដោយគាត់មិនសូវមានសាច់ដល់អត់អាហារ ១០ថ្ងៃនេះ ជាការព្រួយបារម្ភអំពីសុខភាពគាត់ ប៉ុន្តែជំហររបស់គាត់រឹងមាំដដែល»។
មេធាវី និងជាសកម្មជនសិទ្ធិមនុស្សកញ្ញា សេង ធារី ធ្លាប់ធ្វើកូដកម្មបង្អត់អាហារម្ដងរួចហើយកាលពីខែវិច្ឆិកា ឆ្នាំ២០២២។ កញ្ញាត្រូវបានតុលាការកាត់ទោសឲ្យជាប់ពន្ធនាគារ ៦ឆ្នាំ ពីបទចោទរួមគំនិតក្បត់ ក្នុងសំណុំរឿងវិលចូលស្រុករបស់លោក សម រង្ស៊ី កាលពីឆ្នាំ២០១៩ និងបានបញ្ជូនកញ្ញាទៅឃុំខ្លួននៅពន្ធនាគារដាច់ស្រយាលក្នុងខេត្តព្រះវិហាររហូតមកទល់នឹងបច្ចុប្បន្ននេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
a special force can be use if it come to a dangerous situation . HUN NAL should be a wear that how many time the US give him a hurst MASSAGE already .