ដោយ ឡេង ម៉ាលី
2023.12.29
RFA
ស្ដាប់ ឬទាញយកសំឡេង
(រូបតំណាង) ស្លាកសញ្ញាក្រសួងសុខាភិបាល Photo: RFA
ក្រសួងសុខាភិបាលនៅយប់ថ្ងៃទី២៨ ខែធ្នូ បានប្រកាសព័ត៌មានអំពីការរកឃើញវីរុសកូវីដ១៩បំប្លែងថ្មីប្រភពអូមេក្រុង ជេអនវ័ន (Omicron JN1) តែក្រសួងអះអាងថា អ្នកជំងឺទាំងនោះទទួលបានការព្យាបាលជាសះស្បើយដោយបន្តធ្វើចត្តាឡីស័កនៅតាមផ្ទះរៀងៗ ខ្លួន។ ក្រសួងបញ្ជាក់ដោយផ្អែកតាមអង្គការសុខភាពពិភពលោកថាជំងឺកូវីដ១៩ ប្រភេទថ្មីនេះ មិនសូវមានសភាពធ្ងន់ធ្ងរទេ ដោយសារតែជាវីរុសប្រភេទចាប់អារម្មណ៍ (Variant of Interest) មិនមែនជាវីរុសបំប្លែងថ្មី ដែលជាប្រភេទព្រួយបារម្ភ (Variant of Concern) នោះទេ។
តែយ៉ាងណាក្តីក្រសួងសុខាភិបាលកត់សម្គាល់ដោយរកឃើញថាករណីឆ្លងជំងឺកូវីដ១៩តាមរយៈការធ្វើតេស្តរហ័សនៅក្នុងចំណោមអ្នកជំងឺដែលមកទទួលសេវាសុខាភិបាលនៅតាមមន្ទីរពេទ្យមានចំនួនកើនឡើង។
បញ្ហានេះប្រសួងសុខាភិបាលអំពាវនាវដល់ប្រជាពលរដ្ឋប្រុងប្រយ័ត្នដោយត្រូវអនុវត្តគោការណ៍អនាម័យ ដូចជា ពាក់ម៉ាស លាងដៃ រក្សាគម្លាតពីគ្នា បន្តចាក់វ៉ាក់សាំងឱ្យបានគ្រប់ដូស ហើយអ្នក ដែលមានហានិភ័យ ដូចជា កុមារ ចាស់ជរា និងបុគ្គលដែលមានជំងឺប្រចាំកាយ ស្រ្តីមានផ្ទៃពោះ មិនត្រូវចូលរួមកម្មវិធី ដែលមានមនុស្សច្រើនជាដើម។
វិទ្យុអាស៊ីសេរីមិនអាចទាក់ទងរដ្ឋមន្ត្រីក្រសួងសុខាភិបាល លោក ឈាង រ៉ា និងប្រធានយកដ្ឋានប្រយុទ្ធ និងជំងឺឆ្លងលោក លី សូវ៉ាន់ ដើម្បីសាកសួរបន្ថែមបានទេ នៅថ្ងៃទី២៩ ខែធ្នូ។
ជុំវិញរឿងនេះ អ្នកជំនាញព្រមានថា ប្រសិនមានការរីករាលដាល នៃជំងឺកូវីដ-១៩ រាលដាលជាថ្មីនោះ កម្ពុជាអាចនឹងប៉ះពាល់សេដ្ឋកិច្ចជាតិ និងការរស់នៅរបស់ប្រជាពលរដ្ឋប្រចាំថ្ងៃកាន់តែធ្ងន់ធ្ងរ។
ប្រធានសមាគមគ្រូពេទ្យគុណធម៌កម្ពុជា លោក អ៊ូច វុទ្ធី ប្រាប់វិទ្យុអាស៊ីសេរីថា ករណីឆ្លងថ្មីបច្ចុប្បន្នមានចំនួនតិចតួចនៅឡើយ ហើយលោកគាំទ្រចំណាត់ការរបស់ក្រសួងសុខាភិបាលផ្សព្វផ្សាយព័ត៌មានអំពីការវិវឌ្ឍនៃការឆ្លងជំងឺកូវីពេលនេះ។ ប៉ុន្តែលោកយល់ថា រដ្ឋាភិបាលគួរចាត់វិធានការឱ្យបានម៉ឺងម៉ាត់បន្ថែមទៀត ដោយពង្រឹងសេវាសុខាភិបាលនៅមន្ទីរពេទ្យតាមមូលដ្ឋាន ដើម្បីឆ្លើយតបនឹងតម្រូវការរបស់ពលរដ្ឋឱ្យបានទាន់ពេល។ ទោះបីវីរុសប្រភេទថ្មីមានសភាពធូរស្រាលក៏ដោយ ក៏លោករំឮកដល់ប្រជាពលរដ្ឋខ្មែរត្រូវតែបន្តប្រុងប្រយ័ត្ន និងការពារខ្លួនជាប្រចាំតាមរយៈការពាក់ម៉ាស់ លាងសម្អាតដៃឱ្យបានត្រឹមត្រូវ ដើម្បីជៀសផុតពីជំងឺកូវីដ-១៩ នេះ។
លោក អ៊ូច វុទ្ធី៖ «ក្នុងនាមខ្ញុំជាគ្រូពេទ្យក្រៅរដ្ឋាភិបាល ជាគ្រូពេទ្យអង្គារសមាគម ខ្ញុំបារម្ភ អំពាវនាវដល់បងប្អូនទាំងអស់គ្នាឱ្យចេះប្រយ័ត្ន ការពារខ្លួន។ ហានិភ័យវាអាចនឹងកើតឡើងមួយភ្លែតៗ ដល់បងប្អូន ហើយបើសិនជាមានអាការៈមិនស្រួល សូមបងប្អូនទៅមណ្ឌលសុខភាពក្បែរខ្លួ ក្បែរផ្ទះ ឬមន្ទីរពេទ្យរដ្ឋឱ្យទាន់ពេលវេលា»។
គិតត្រឹមព្រឹកថ្ងៃទី២៩ ខែធ្នូ កម្ពុជាមានអ្នកឆ្លងជំងឺកូវីដ-១៩ សរុបជាង ១៣ម៉ឺន ៩ពាន់នាក់ (១៣៩.០០៧) ក្នុងនោះអ្នកជាសះស្បើយមានជាង ១៣ម៉ឺននាក់ ៥ពាន់នាក់ (១៣៥.៩៣០) យើងខ្ញុំសូមជម្រាបសួរលោកអ្នកនាង ពីរដ្ឋធានីវ៉ាស៊ីនតោន សហរដ្ឋអាមេរិក!និងអ្នកស្លាប់នៅចំនួន ៣ពាន់ ៥៦នាក់ (៣.០៥៦) ដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។