ដោយ មាន ឫទ្ធិ
2024.06.26
RFA
ក្រសួងការបរទេសអាមេរិក បន្តដាក់ចំណាត់ថ្នាក់កម្ពុជាទាបបំផុត (Tier 3) ក្នុងការប្រយុទ្ធប្រឆាំងនឹងអំពើជួញដូរមនុស្ស។ នេះគឺដោយសារតែរដ្ឋាភិបាលកម្ពុជា នៅតែបរាជ័យមិនបានបំពេញឱ្យបានពេញលេញតាមស្តង់ដារអប្បបរមាក្នុងការលុបបំបាត់ចោល ឬកែលម្អជាដុំកំភួនប្រឆាំងនឹងការជួញដូរមនុស្ស។
របាយការណ៍ ស្តីពីការជួញដូរមនុស្សនៅលើពិភពលោកប្រចាំឆ្នាំ២០២៤ របស់ក្រសួងការបរទេសអាមេរិក ផ្សាយកាលពីថ្ងៃទី២៤ ខែមិថុនា រកឃើញថា អំពើពុករលួយ និងការសមគំនិតពីសំណាក់ក្រុមមន្ត្រីរដ្ឋាភិបាលក្នុងឧក្រិដ្ឋកម្មជួញដូរមនុស្ស នៅតែរីករាលដាលខ្លាំង។ នេះក៏រាប់បញ្ចូលទាំងការកេងប្រវ័ញ្ចលើជនរងគ្រោះរាប់ម៉ឺននាក់ក្នុងឧក្រិដ្ឋកម្មបង្ខាំងមនុស្សឱ្យប្រព្រឹត្តអំពើឆបោកតាមអនឡាញនៅកម្ពុជាផងដែរ។
របាយការណ៍រៀបរាប់ថា មន្ត្រីកម្ពុជានៅតែព្យាយាមបដិសេធជាសាធារណៈពីកម្រិតប្រេវ៉ាឡង់ និងភាពធ្ងន់ធ្ងរនៃការប្រព្រឹត្តអំពើឆបោកតាមអនឡាញ។ ក្រសួងការបរទេសអាមេរិក លាតត្រដាងថា មន្ត្រីជាន់ខ្ពស់ និងទីប្រឹក្សាមួយចំនួននៃរដ្ឋាភិបាលកម្ពុជា គឺជាម្ចាស់កម្មសិទ្ធិដោយផ្ទាល់ ឬតាមរយៈអាជីវកម្ម លើអចលនទ្រព្យ និងទីតាំងដែលត្រូវបានគេយកទៅប្រើប្រាស់សម្រាប់ប្រព្រឹត្តអំពើឆបោកតាមអនឡាញដើម្បីកេងប្រវ័ញ្ចលើជនរងគ្រោះ តាមរយៈការជួញដូរកម្លាំងពលកម្ម។ ជាថ្នូរមកវិញ មន្ត្រីរដ្ឋាភិបាលទាំងនោះ ទទួលបានអត្ថប្រយោជន៍ផ្នែកហិរញ្ញវត្ថុដោយផ្ទាល់ពីឧក្រិដ្ឋកម្មទាំងនេះ។ ក្រសួងការបរទេសអាមេរិក គូសបញ្ជាក់ថា ការសមគំនិតពីសំណាក់មន្ត្រីរដ្ឋាភិបាលកម្ពុជាទាំងនេះ បានរារាំងមិនឱ្យមានការអនុវត្តច្បាប់ប្រកបដោយប្រសិទ្ធភាពប្រឆាំងនឹងឧក្រិដ្ឋកម្មជួញដូរមនុស្ស។
វិទ្យុអាស៊ីសេរី មិនទាន់អាចទាក់ទងអនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស អ្នកស្រី ជូ ប៊ុនអេង ដើម្បីសុំប្រតិកម្មជុំវិញការរកឃើញរបស់ក្រសួងការបរទេសអាមេរិកនេះ បាននៅឡើយទេគិតត្រឹមយប់ថ្ងៃទី២៤ ខែមិថុនា។
វិទ្យាស្ថានសហរដ្ឋអាមេរិកដើម្បីសន្តិភាព (USIP) ប៉ាន់ស្មានថា កម្ពុជាតែឯងលួចលុយពីពិភពលោកយ៉ាងហោចណាស់ជាង ១២ពាន់៥រយលានដុល្លារក្នុងមួយឆ្នាំៗតាមរយៈឧស្សាហកម្មឆបោកតាមអនឡាញ។
កាលពីខែសីហា ឆ្នាំ២០២៣ អង្គការសហប្រជាជាតិ រកឃើញថា យ៉ាងហោចណាស់មានមនុស្ស ១សែននាក់បានក្លាយជាជនរងគ្រោះដោយសារតែការបង្ខំឱ្យប្រព្រឹត្តអំពើឆបោកតាមអនឡាញនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។