ដោយ ច័ន្ទ ដារ៉ូ
2025.01.13
RFA
ស្ដាប់ ឬទាញយកសំឡេង
ពលករខ្មែររស់នៅប្រទេសថៃដាក់កម្រងផ្កានៅទីតាំងដែលអតីតតំណាងរាស្ត្រគណបក្សសង្គ្រោះជាតិ លោក លិម គិមយ៉ា ត្រូវឃាតកបាញ់សម្លាប់ កាលពីថ្ងៃទី១២ មករា ២០២៥។ រូប៖ ផ្ដល់ឱ្យ
តំណាងជនភៀសខ្លួននយោបាយ និងពលករខ្មែរនៅប្រទេសថៃដាក់កម្រងផ្ការំលឹកខួប ៧ថ្ងៃ ដើម្បីគោរពវិញ្ញាណក្ខន្ធអតីតតំណាងរាស្ត្រគណបក្សសង្គ្រោះជាតិលោក លិម គិមយ៉ាង នៅកន្លែងដែលឃាតកបាញ់សម្លាប់រូបលោកក្នុងទីក្រុងបាងកក។ ពួកគាត់ថា ឃាតកម្មដ៏ព្រៃផ្សៃនេះជារឿងនយោបាយ។
តំណាងជនភៀសខ្លួនខ្មែរនៅប្រទេសថៃជាង ១០នាក់ នៅព្រឹកថ្ងៃទី១២ ខែមករា ចេញដាក់កម្រងផ្កានៅលើសួនច្បារ ក្បែរវត្តបវ័ន្ដនិវេដ (Wat Bowonniwet Vihara) ក្នុងក្រុងបាងកក ជាទីកន្លែងដែលខ្មាន់កាំភ្លើងបាញ់សម្លាប់លោក លិម គិមយ៉ា ថ្មីៗនេះ។
ជាមួយគ្នានេះ ពួកគាត់បានយកចង្ហាន់ប្រគេនព្រះសង្ឃ ដើម្បីបង្សុកូលឧទ្ទិសកុសល និងបួងសួងសូមវិញ្ញាណក្ខន្ធអតីតតំណាងរាស្ត្ររូបនេះបានទៅកាន់សុគតិភព។
ប្រធានបណ្ដាញយុវជនកម្ពុជាសកលប្រចាំប្រទេសថៃលោក អែម ពិសិដ្ឋ ប្រាប់វិទ្យុអាស៊ីសេរីថាក្រៅពីតំណាងជនភៀសខ្លួនដាក់កម្រងផ្កាហើយ លោកមើលឃើញពលករខ្មែរធ្វើការនៅក្បែរកន្លែងឃាតកម្មនោះ នាំគ្នាដាក់ផ្កា ដាក់ទឹក និងអុជធូបទៀនឧទ្ទិសជូនលោក លិម គិមយ៉ា ជាហូរហែដែរ។ លោកឱ្យដឹងថា កម្មវិធីនេះរៀបចំឡើង ដើម្បីឧទ្ទិសបុណ្យផង និងបង្ហាញការគោរពដឹងគុណចំពោះលោក លិម គិមយ៉ា ដែលលះបង់កម្លាំងកាយចិត្តរហូតបាត់បង់ជីវិតក្នុងបុព្វហេតុជាតិ និងពលរដ្ឋខ្មែរកន្លងមក។
លោក អែម ពិសិដ្ឋ៖ «យើងជាអ្នកស្រឡាញ់ប្រជាធិបតេយ្យដូចគ្នា អ្វីដែលយើងអាចធ្វើទៅបាន គឺយើងអត់ចោលលោកពូ លិម គិមយ៉ា ទេ ទោះបីជាគាត់ជាអតីតតំណាងរាស្រ្តក៏ពិតមែន ប៉ុន្តែគាត់បានមានស្នាដៃជាច្រើនជួយប្រជាជនខ្មែរយើង។ ខ្ញុំគិតថា នេះមិនមែនជារឿងធម្មតាទេ ពីព្រោះជាអំពើឃាតកម្មមួយឆ្លងប្រទេស អ៊ីចឹងវាមានការគំរាមកំហែងទៅលើជនភៀសខ្លួនខ្មែរទៅទៀត គឺកុំមានសកម្មភាពតវ៉ាប្រឆាំងរដ្ឋាភិបាលកម្ពុជា»។
ស្រដៀងគ្នានេះដែរ ប្រធានគណៈកម្មការសម្របសម្រួលជនភៀសខ្លួនខ្មែរប្រចាំប្រទេសថៃលោក លឹម សុខា ថ្លែងថាអំពើឃាតកម្មដ៏ឃោរឃៅលើលោក លិម គិមយ៉ា ជាឧក្រិដ្ឋកម្មឆ្លងដែន ប៉ុន្តែអ្នកសម្លាប់ និងអ្នកបញ្ជានៅពីក្រោយត្រូវតែទទួលខុសត្រូវ ដោយមិនត្រូវលើកលែងអ្នកណាម្នាក់ឡើយ។ លោក លឹម សុខា បញ្ជាក់ថាពលរដ្ឋខ្មែរទូទៅមិនភ្លេចគុណលោក លិម គិមយ៉ា ដែលអង់អាចក្លាហានបានលះបង់ដើម្បីជាតិទេ ហើយករណីនេះបានដាស់តឿនស្មារតីអ្នកប្រជាធិបតេយ្យគ្រប់រូបត្រូវប្ដេជ្ញាចិត្តតស៊ូប្រឆាំងនឹងរបបផ្តាច់ការបន្តទៀតទើបជំរុញឱ្យកម្ពុជាមានប្រជាធិបតេយ្យពិតប្រាកដ។
លោក លឹម សុខា៖ «ខ្ញុំគិតថាវាជាភេរវកម្មមួយ ក៏សាហាវបំផុតទៅលើអ្នកប្រឆាំងដោយអហិង្សា តវ៉ាដោយចុងប៊ិច។ ខ្ញុំឧទ្ទិសដល់គាត់បើសិនមានជាតិមុខពិត សូមឱ្យគាត់កើតមកជាខ្មែរ ហើយតស៊ូដើម្បីប្រទេសជាតិខ្មែរ ស្រឡាញ់លទ្ធិប្រជាធិបតេយ្យ»។
លោក លិម គិមយ៉ា មានអាយុ ៧៤ឆ្នាំ ជាអតីតតំណាងរាស្ត្រមកពីគណបក្សសង្គ្រោះជាតិ និងមានសញ្ជាតិពីរ គឺខ្មែរ និងបារាំង។ លោកត្រូវបានឃាតកបាញ់សម្លាប់នៅលើដងវិថីមួយ ក្បែរវត្តបវ័ន្ដនិវេដ ស្ថិតនៅចម្ងាយជាង ១គីឡូម៉ែត្រពីព្រះបរមរាជវាំងរបស់ថៃ កាលពីថ្ងៃទី៧ ខែមករា។
កាលនៅមានជីវិត លោក លិម គិមយ៉ា តែងនិយាយរិះគន់ឥតសំចៃមាត់ទៅលើការដឹកនាំបែបអវិជ្ជមានរបស់រដ្ឋាភិបាលត្រកូលហ៊ុន ដើម្បីបុព្វហេតុជាតិ និងការពារយុត្តិធម៌ជូនពលរដ្ឋរងគ្រោះ។ មតិរិះគន់ដែលលោកលើកឡើងទាំងនៅក្នុងរដ្ឋសភា និងនៅពេលចុះជួបពលរដ្ឋនៅតាមមូលដ្ឋាន មានដូចជាបញ្ហាអំពើពុករលួយ ការបំផ្លិចបំផ្លាញធនធានធម្មជាតិ ការរំលោភសិទ្ធិមនុស្ស បញ្ហាបូរណភាពទឹកដី និងភាពអសកម្មក្នុងការងាររបស់ស្ថាប័នរដ្ឋជាដើម។
សកម្មភាពប្រឡូកក្នុងឆាកនយោបាយនៅកម្ពុជាយ៉ាងស្វិតស្វាញ និងជំហរនយោបាយមិនងាករេរបស់លោកបែបនេះហើយ ទើបពលរដ្ឋខ្មែរទាំងក្នុងប្រទេសនិងក្រៅប្រទេសធ្វើបុណ្យរំលឹកគុណ និងទាមទារឱ្យអាជ្ញាធរទាំងអស់វែកមុខអ្នកពាក់ព័ន្ធនឹងឃាតកម្មនេះ យកមកផ្ដន្ទាទោសតាមច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។