កម្ពុជា
កម្ពុជា-នយោបាយ
20/05/2025 – 10:29
ដោយ៖ អោ ស្រីពេជ្រ
RFI

របាយការណ៍នៃការសិក្សាស្រាវជ្រាវថ្មីមួយបានបង្ហាញថា បណ្តាញឧក្រិដ្ឋកម្មឆ្លងដែននៅកម្ពុជាកាន់តែរីកធំឡើង និងកំពុងក្លាយជាកង្វល់ចំពោះសន្តិសុខពិភពលោក។ តាមរបាយការណ៍ ការរីកធំឡើងៗនៃបណ្តាញឧក្រិដ្ឋកម្មឆ្លងដែនខ្មៅងងឹតនៅកម្ពុជាបែបនេះកើតឡើងដោយសារអ្នកមានឥទ្ធិពលមិនខ្លាចច្បាប់ និងការប្រព្រឹត្តិអំពើពុករលួយក្នុងប្រព័ន្ធដឹកនាំរដ្ឋបែបឯកបក្ស និងបែបគ្រួសារនិយម។

របាយការណ៍៖ អំពើពុករលួយក្នុងប្រព័ន្ធរដ្ឋជំរុញបណ្តាញឧក្រិដ្ឋកម្មឆ្លងដែននៅកម្ពុជាកាន់តែរីកមាឌ

យោងតាមរបាយការណ៍ស្រាវជ្រាវថ្មីមួយរបស់វិទ្យាស្ថាន Humanity Research Consultancy (HRC) ដែលទើបចេញផ្សាយនៅថ្ងៃទី១៩ឧសភា ប្រទេសកម្ពុជាគឺជាចំណុចស្នូលនៃការប្រព្រឹត្តិឧក្រិដ្ឋកម្មឆ្លងដែន ពិសេសឧក្រិដ្ឋកម្មអនឡាញ។ តាមរបាយការណ៍ កម្ពុជាមានអ្នកបម្រើការងារក្នុងឧក្រិដ្ឋកម្មអនឡាញជាង ១៥ម៉ឺននាក់ និងថា ក្រុមឧក្រិដ្ឋជនអាចរកចំណូលបានពីឧក្រិដ្ឋកម្មអនឡាញក្នុង ១ឆ្នាំ​ប្រមាណពី ១២.៥ ទៅ ១៩ពាន់លានដុល្លារ ដែលស្មើនឹង ៦០ភាគរយនៃ GDP ឬផលិតផលដុលក្នុងស្រុករបស់កម្ពុជា។

ដោយមានជំនួយរបស់រដ្ឋបាលអាមេរិក និងមានកម្រាស់ជាង ៧០ទំព័រ របាយការណ៍ថ្មីនេះបានសរសេរលាតត្រដាងថា​ បណ្តាញ​ឧក្រិដ្ឋកម្មឆ្លងដែននៅកម្ពុជាកាន់តែរីកធំឡើងដោយសារអំពើពុករលួយស៊ីរូងក្នុងប្រព័ន្ធដឹកនាំរដ្ឋបែបឯកបក្ស និងគ្រួសារនិយមដែលបានបើកផ្លូវឲ្យក្រុមទុច្ចរិត ជាអ្នកមានអំណាចអាចដើររំលងច្បាប់។ របាយការណ៍ដដែលបានចង្អុលចំៗថា គឺគណបក្ស​ប្រជាជនកម្ពុជាជាអ្នកសម្របសម្រួលឲ្យអ្នកមានអំណាចចូលដៃឃុបឃិតជាមួយបណ្តាញឧក្រិដ្ឋកម្មបរទេស និងថា គណបក្សប្រជាជនកម្ពុជាទទួលបានផលលាភជាច្រើនពីការពាំងផ្លូវឲ្យអ្នកមានអំណាចទាំងនោះធ្វើការងារនេះដើម្បីយកទៅបម្រើការងារគណបក្ស។

តាមរយៈវិទ្យុបារាំងអន្តរជាតិ​ RFI​ នៅរសៀលថ្ងៃទី២០​ ឧសភា​ លោក​ សុខ​ ឥសាន​ អ្នកនាំពាក្យគណបក្សប្រជាជនកម្ពុជាបានបដិសេធ ច្រានចោលរបាយការណ៍នៃការសិក្សាស្រាវជ្រាវរបស់ Humanity Research Consultancy (HRC) នេះ និងបញ្ជាក់ថា គណបក្សប្រជាជនកម្ពុជាតែងអនុវត្តគោលនយោបាយច្បាប់ និងឈរលើគោលការណ៍តម្លាភាព។ តាមលោក សុខ ឥសាន ជនណាក៏ដោយ មិនថាអ្នកមានអំណាច ឬមានខ្សែស្រឡាយធំ ឲ្យតែមិនគោរពច្បាប់ គណបក្សប្រជាជនមិនដែលលើកលែងឲ្យនោះទេ។ 

តាម Humanity Research Consultancy (HRC) ឧក្រិដ្ឋកម្ម​ឆ្លងដែននៅកម្ពុជាចាប់រីកមាឌក្នុងអំឡុងពេលផ្ទុះឆ្លងរាលដាលជំងឺកូវីដ១៩ និងមុនការបោះឆ្នោតឆ្នាំ ២០២០ ក្រោមរូបភាពការវិនិយោគចូលរួមអភិវឌ្ឍសេដ្ឋកិច្ចកម្ពុជា។ តែការពិតជាក់ស្តែង​ និងបើតាម​ Humanity Research Consultancy (HRC) ដដែល​ ការវិនិយោគភាគច្រើនជាការវិនិយោគរបស់ក្រុមហ៊ុន​ឯកជនចិនដែលជារឿយៗត្រូវបានរាយការណ៍ថាមានជាប់ទាក់ទងនឹងសកម្មភាពឧក្រិដ្ឋកម្មឆ្លងដែន​ ដូចជាការលាងលុយកខ្វក់ ល្បែងអនឡាញ ការជួយដួរមនុស្សឆ្លងដែន ឬការបោកប្រាស់អនឡាញជាដើម។ 

របាយការណ៍នៃការសិក្សាស្រាវជ្រាវដដែលនេះបានកំណត់អត្តសញ្ញាណបុគ្គលដែលសង្ស័យជាប់ពាក់ព័ន្ធនៅក្នុងបណ្តាញឧក្រិដ្ឋកម្មឆ្លងដែននៅកម្ពុជាសរុបចំនួន ២៨នាក់ដែលភាគច្រើនជាមន្ត្រីជាន់ខ្ពស់ក្នុងជួររដ្ឋាភិបាល និងឧកញ៉ាគ្រាក់ៗ។ ក្នុង​ចំណោម​បុគ្គលទាំង ២៨នាក់ដែលរងទណ្ឌកម្មពីអន្តរជាតិមានដូចជាលោកអ្នកឧកញ៉ា ទ្រី ភាព និងអ្នកឧកញ៉ា លីយ៉ុង ផាត់ជាដើម។ ក្រៅពីទាញសញ្ញាអាសន្ន របាយការណ៍ថ្មីរបស់ Humanity Research Consultancy (HRC) ក៏បានដាក់​ចេញអនុសាសន៍មួយចំនួនសម្រាប់រដ្ឋាភិបាល ក្នុងការគៀងគរបង្កើតការចូលរួមពីសហគមន៍អន្តរជាតិដើម្បីរៀបចំយុទ្ធសាស្ត្រសម្របសម្រួល និងបង្កើតគោលការណ៍ សកម្មភាពដោះស្រាយឱឲ្យបានច្បាស់ ពិសេសទប់ស្កាត់ចរន្តលាងលុយកខ្វក់នៅកម្ពុជា៕