កម្ពុជា
25/05/2025 – 11:29
ដោយ៖ ហ៊ុល រស្មី
RFI

នៅថ្ងៃទី២៥ ខែឧសភានេះ តុលាការខេត្តស្ទឹងត្រែងបានសម្រេចដោះលែង លោក អ៊ុក ម៉ៅ ជាអ្នកសារព័ត៌មានបរិស្ថានប្រចាំខេត្ត​ស្ទឹង​ត្រែង ឲ្យនៅក្រៅឃុំ​បណ្តោះអាសន្ន ដើម្បីរង់ចាំការកាត់ទោស ក្រោយលោកត្រូវបានចាប់ឃុំខ្លួនក្នុងពន្ធនាគារជិត២សប្តាហ៍។ នេះបើតាមមន្ត្រីសិទ្ធិមនុស្សរបស់សមាគម​អាដហុកប្រចាំខេត្តស្ទឹងត្រែង ខណៈភរិយាលោក អ៊ុក ម៉ៅ សម្តែងក្តីត្រេកអរនឹងការដោះលែងនេះ។

អ្នកសារព័ត៌មានបរិស្ថាន លោក អ៊ុក ម៉ៅ ត្រូវបានដោះលែងឲ្យក្រៅឃុំបណ្តោះអាសន្ន

មន្ត្រីសមាគមការពារសិទ្ធិមនុស្សអាដហុកប្រចាំខេត្តស្ទឹងត្រែង លោក ស៊ុន ឡង់ឌី ប្រាប់វិទ្យុបារាំងអន្តរជាតិ RFI នៅថ្ងៃអាទិត្យនេះថា លោក អ៊ុក ម៉ៅ ត្រូវបានដោះលែងឲ្យនៅក្រៅឃុំជាបណ្តោះអាសន្ននៅ ម៉ោងប្រមាណ ២រសៀល ថ្ងៃទី២៥ ឧសភា​នេះ។ ត្បិតឲ្យនៅក្រៅឃុំតែ លោក អ៊ុក ម៉ៅ នៅជាប់លក្ខខណ្ឌរបស់តុលាការក្នុងដំណើរការសាកសួរ ទាក់ទិនសំណុំរឿងរបស់លោក មុនឈានដល់ការបើកសវនាការនៅពេលខាងមុខ។

គួររម្លឹកថា លោក អ៊ុក ម៉ៅ អាយុ​៥៧​ឆ្នាំ ​ គឺ​ជា​អ្នក​សារ​ព័ត៌​មាន​របស់​អង្គ​ភាព «​ឥន្ទ្រី​ផ្លើស ញូស៍»​ ប្រចាំ​ខេត្ត​ស្ទឹង​ត្រែង​។​លោក ត្រូវបាន​បុរស៣នាក់​ដែលស្លៀកពាក់ស៊ីវិល​ចាប់​ខ្លួនកាលពីរំលង​អាធ្រាត្រ ថ្ងៃទី១៦ ខែឧសភា ក្រោម​បទ​ញុះ​ញង់ និង​បរិហារ​កេរ្តិ៍​។ ក្រុមអង្គការសង្គមស៊ីវិលជាង១០បានចេញសេចក្តីថ្លែងការណ៍ទាមទារឲ្យដោះលែងអ្នកកាសែតរូបនេះ  ដោយបានចាត់ទុកការចាប់ខ្លួនលោក អ៊ុក ម៉ៅ ថាជាការគំរាមកំហែងធ្ងន់ធ្ងរដល់អ្នកការពារបរិស្ថាន និងអ្នកសារព័ត៌មានដែលធ្វើឱ្យកម្ពុជាមានឈ្មោះមិនល្អលើឆាកអន្តរជាតិ។ តែក្រសួងព័ត៌មានបានចាត់ទុកសកម្មភាពរបស់ លោក អ៊ុក ម៉ៅ នាពេលកន្លងមកថាជាសកម្មភាពប្រាស់ចាកនឹងក្រមសីលធម៌វិជ្ជាជីវៈសារព័ត៌មាន និងជាការរំលោភច្បាប់។ 

ភរិយាលោកអ៊ុក ម៉ៅ គឺអ្នកស្រី ឯក សុជាតិ រីករាយនឹងការដោះលែងស្វាមី តែអ្នកស្រីមិនអាចផ្តល់សេចក្តីលម្អិតនានាដែលនាំដល់ការដោះលែងស្វាមីនោះទេ។

ដោយឡែក កាលពីថ្ងៃទី២៤ ខែឧសភា រដ្ឋបាលខេត្តស្ទឹងត្រែងបានចេញមកបំភ្លឺថា គ្មានករណីដុតផ្ទះ លោក អ៊ុក ម៉ៅ ដូចការលើកឡើងតាមបណ្តាញសង្គមនោះទេ ហើយករណីឆេះខ្ទមចម្ការរបស់អ្នកកាសែតរូបនេះកាលពី៣ឆ្នាំមុននោះ គឺជា «ទំនាស់បុគ្គល និងបុគ្គល» ដែលផ្តើមចេញពីករណីរំលោភសេចក្តីទុកចិត្ត។ បើតាមអាជ្ញាធរខេត្ត​ស្ទឹងត្រែងដដែល លោក អ៊ុក ម៉ៅ មិនព្រមប្រគល់ដីទំហំប្រមាណ៤៥ហិកតាឲ្យអ្នកដែលបានទិញពីលោក នៅពេលទទួលបានប្រាក់សរុបជាង១ម៉ឺនដុល្លារ ហើយថា លោក អ៊ុក ម៉ៅ បានផ្លាស់ប្តូរទីកន្លែងរស់នៅពីមួយទៅមួយច្រើនលើកច្រើនសារ បន្ទាប់ពីលក់ដីចម្ការចាស់ទៅកាប់រានដីថ្មីរួចលក់ និងបន្តទៅតាំងទីលំនៅកន្លែងផ្សេងទៀត។

យ៉ាងណាក៏ដោយ បន្ទាប់ពីបានចាកចេញពីពន្ធនាគារ លោក អ៊ុក ម៉ៅ បានប្រាប់លោក ឯម សុខសុវណ្ណ ប្រធានគណបក្សដើម្បីកម្ពុជា តាមប្រព័ន្ធទំនាក់ទំនងសង្គមថា​លោកមិនត្រូវបានអនុញ្ញាតឲ្យផ្តល់បទសម្ភាសជាមួយអ្នកកាសែតនោះទេ៕