កម្ពុជា
08/06/2025 – 09:43
ដោយ៖ អ៊ឹង ប៊ុនថន
RFI
ការចរចាបញ្ហាពន្ធគយរវាងកម្ពុជា និងសហរដ្ឋអាមេរិកនឹងត្រូវបន្តធ្វើនៅជុំទី៣បន្តទៀត នៅរដ្ឋធានីវ៉ាស៊ីនតោន នាពេលឆាប់ៗខាងមុខ។ នេះជាការគូសបញ្ជាក់នៅក្នុងសេចក្តីប្រកាសព័ត៌មានរបស់អង្គភាពអ្នកនាំពាក្យរដ្ឋាភិបាលកម្ពុជានៅថ្ងៃទី៧ ខែមិថុនា ឆ្នាំ២០២៥។ បើតាមសេចក្តីប្រកាសព័ត៌មានដដែលនេះ លទ្ធផលនៃការចរចារវាងប្រទេសទាំងពីរនៅជុំទី២ ដែលបានធ្វើឡើងចន្លោះពីថ្ងៃទី៤ដល់ទី៦ ខែមិថុនា ភាគីទាំងពីរបានបន្តពិភាក្សាគ្នាលើអត្ថបទសេចក្តីព្រាងកិច្ចព្រមព្រៀងពាណិជ្ជកម្មបដិការ ដោយឈរលើស្មារតីយោគយល់គ្នាខ្ពស់ និងបានឈានទៅឯកភាពគ្នាលើបញ្ញត្តិជាច្រើន។
ការចរចាពន្ធគយរវាងកម្ពុជា និងអាមេរិកនឹងធ្វើនៅជុំទី៣បន្តទៀត
យ៉ាងនេះក្តី អ្នកតាមដានការចរចាពន្ធគយលើទំនិញកម្ពុជាដែលនាំចេញទៅអាមេរិក បានវាយតម្លៃថា ការចរចាគ្នាជុំទី២ ដែលដឹកនាំដោយលោក ស៊ុន ចាន់ថុល ឧបនាយករដ្ឋមន្ត្រី និង លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម តំណាងភាគីកម្ពុជា និងលោកស្រី Sarah Ellerman អនុប្រធានតំណាងពាណិជ្ជកម្មអាមេរិកទទួលបន្ទុកតំបន់អាស៊ីអាគ្នេយ៍ និង ប៉ាស៊ីហ្វិក នៅជុំទី២ គឺមិនទទួលបានជោគជ័យទេ។
លោក មួង ណារ៉េត សកម្មជនខ្មែរនៅទីក្រុងឡុងប៊ិច រដ្ឋកាលីហ្វ័រញ៉ា បានលើកឡើងនៅក្នុងវីដេអូឃ្លីបរបស់ខ្លួននាថ្ងៃទី៨ ខែមិថុនានេះថា លទ្ធផលនៃការចរចាពន្ធគយរវាងកម្ពុជា និងអាមេរិកនៅជុំទី២នេះ គឺប្រៀបបាន«ទៅផ្ទះវិញដោយដៃទទេ »។ បើតាមអតីតអ្នកសារព័ត៌មានជើងចាស់រូបនេះ បើទោះជាអាមេរិកបើកភ្លើងខៀវឲ្យកម្ពុជាមានឱកាសចូលតុចរចានៅជុំទី៣បន្តទៀតក៏ដោយ តែលោក មួង ណារ៉េត មិនសង្ឃឹមថា នឹងទទួលបានលទ្ធផលដូចកម្ពុជាចង់បាននោះឡើយ។
លោក មួង ណារ៉េត យល់ឃើញថា ដើម្បីឲ្យការចរចាបញ្ហាពន្ធគយជាមួយអាមេរិកទទួលបានជោគជ័យ គឺទាល់តែកម្ពុជាព្រមស្តារឡើងវិញលទ្ធិប្រជាធិបតេយ្យតាមរយៈការដោះលែង លោក កឹម សុខា កញ្ញា សេង ធារី និងសកម្មជនបក្សប្រឆាំងផ្សេងទៀត ឲ្យមានសេរីភាពធ្វើនយោបាយបានពេញលេញ។
សូមបញ្ជាក់ថា កាលពីថ្ងៃទី៣ ខែមេសា ឆ្នាំ២០២៥ រដ្ឋបាលអាមេរិករបស់ លោក ដូណាល់ ត្រាំ បានប្រកាសដំឡើងពន្ធលើទំនិញពីប្រទេសកម្ពុជាដល់ទៅ ៤៩ភាគរយដើម្បីឆ្លើយតបទៅនឹងពន្ធទំនិញដែលអាមេរិកអះអាងថា កម្ពុជាបានយកពន្ធលើទំនិញពីអាមេរិកដល់ទៅ ៩៧ភាគរយ។ តែនៅក្នុងរយៈពេល៩០ថ្ងៃនៃអន្តរកាល បើកទ្វារឲ្យចូលចរចា រដ្ឋបាលអាមេរិកបានទម្លាក់ពន្ធបដិការនេះ មកនៅត្រឹម១០ភាគរយជាបណ្តោះអាសន្នសិន។
ជាការកត់ក្នុងចំណោមបណ្តាប្រទេសអាស៊ានទាំង១០ កម្ពុជាបានក្លាយជាប្រទេសរងការដាក់ពន្ធខ្ពស់ជាងគេបំផុតពីរដ្ឋបាលលោក ដូណាល់ ត្រាំ ខណៈឡាវរងការដាក់ពន្ធចំនួន ៤៨ភាគរយ វៀតណាមចំនួន ៤៦ភាគរយ និងភូមាចំនួន ៤៤ភាគរយ៕