ភ្នំពេញ: គ្រូបង្រៀនប្រវត្ដិសាស្ដ្រនៃអំពើប្រល័យពូជសាសន៍ នៅក្នុងប្រទេសកម្ពុជា គួរទទួលបានការទទួលស្គាល់ ចំពោះសមត្ថភាពរបស់ខ្លួន។ មិនមែនត្រឹមតែការតស៊ូ ដើម្បីរួចរស់ជីវិតពីរបបខ្មែរក្រហមប៉ុណ្ណោះទេ ប៉ុន្ដែថែមទាំងការប្ដេជ្ញាចិត្ដ នៅក្នុងការបង្រៀនប្រវត្ដិសាស្ដ្រ នៃអំពើប្រល័យពូជសាសន៍នេះ ទៅកាន់សិស្សរាប់លាននាក់ថែមទៀត។ ដូច្នេះ ប្រទេសកម្ពុជាឈរប្រកបដោយមោទនភាព នៅចំពោះមុខពិភពលោក ជាសាក្សី នៃការរស់រានឡើងវិញ នៃមនុស្សជាតិ នៅចំពោះមុខនៃអំពើឃោរឃៅដ៏រន្ធត់។
ថ្ងៃទី 11 វិច្ឆិកា 2012
ដោយ: ឌី ខាំប៉ូលី
CEN
នៅថ្ងៃទី៥ ខែតុលា ជារៀងរាល់ឆ្នាំ ចាប់តាំងពីឆ្នាំ១៩៩៤មក ពិភពលោកបានប្រារឰពិធី “ទិវាគ្រូបង្រៀនពិភពលោក” ដើម្បីទទួលស្គាល់ និងជាការដឹងគុណ ចំពោះគ្រូបង្រៀន ដែលបានដើរតួនាទីយ៉ាង សំខាន់ នៅក្នុងការកសាងចំណេះដឹង និងសម្រួចសីលធម៌សង្គមដល់សិស្ស។ គ្រូបង្រៀនដើរតួនាទីជាច្រើន នៅក្នុងកំឡុងពេលនៃការបង្រៀន ដូចជាអ្នកសម្របសម្រួល អ្នកសង្កេត អ្នកផ្ដល់ប្រឹក្សា អ្នកថែរក្សា និង ជាគំរូមួយ ដែលរួមចំណែកយ៉ាងធំធេងដល់ការសិក្សាដោយខ្លួនឯងរបស់សិស្ស ការត្រិះរិះពិចារណា វិន័យ សេចក្ដីថ្លៃថ្នូរ ការអភិវឌ្ឍន៍ជាបុគ្គលនិងអាជីព និងការកសាងអត្ដចរិតនិងឥរិយាបទសង្គមរបស់ក្មេង ជំនាន់ក្រោយ កុំថាឡើយដល់ទៅនិយាយអំពីកតព្វកិច្ចរបស់គ្រូ ក្នុងការធ្វើការងារជាមួយសិស្សជាច្រើន ដែលមានអត្ដចរិត និងកម្រិតនៃភាពឆ្លាតវៃខុសៗគ្នា។
ជាងនេះទៅទៀត គ្រូបង្រៀនកសាងសិស្សឱ្យក្លាយ ទៅជាសិស្សល្អនៅក្នុងសាលា ជាកូនល្អនៅឯផ្ទះ និងជាពលរដ្ឋល្អនៅក្នុងសង្គម។ ដើម្បីទទួលស្គាល់តួនាទីនិង កិច្ចខិតខំប្រឹងប្រែងរបស់គ្រូបង្រៀន ដែលមិនអាចកាត់ថ្លៃបាននេះ ខ្ញុំសូមហៅគ្រូបង្រៀន ថាជា“វិស្វករនៃ ចំណេះដឹង និង សីលធម៌សង្គម”។
គ្រូបង្រៀននៅក្នុងប្រទេសដែលហែកហួរទៅដោយសង្គ្រាម និងប្រទេសក្រោយអំពើប្រល័យពូជ សាសន៍ ដូចជាប្រទេសកម្ពុជា កាន់តែប្រឈមមុខនឹងបញ្ហាជាច្រើនថែមទៀតដែលមិនអាចជៀសបាន។ ភ្លាមៗបន្ទាប់ពីងើបចេញពីបទពិសោធន៍ប្រកបដោយការឈឺចាប់និងដ៏សែនរន្ធត់ដែលមិនអាចថ្លែងបាននៅក្នុងរយៈកាលនៃរបបខ្មែរក្រហម កម្លាំងនិងការលើកទឹកចិត្ដផ្នែករាងកាយនិងស្មារតីរបស់គ្រូ ត្រូវបាន បំផ្លាញយ៉ាងខ្លាំង ដោយការកម្ទេចផ្នែកស្មារតី ដោយសារតែការបាត់បង់សមាជិកគ្រួសារជាទីស្រលាញ់ និងដោយសារភាពចលាចលក្នុងសង្គម ជាមួយនឹងការវាយឆ្មក់ ពីសំណាក់កងទ័ពសេសសល់ខ្មែរក្រហម។ ជាងនេះទៅទៀត បន្ថែមពីលើការដើរស្វែងរកសមាជិកគ្រួសារដែលបាត់ខ្លួន គ្រូបង្រៀនក៏ដូចជាប្រជាពល រដ្ឋកម្ពុជាទាំងមូលដែរ បានតស៊ូជាមួយនឹងការរស់រានមានជីវិតផ្នែកសេដ្ឋកិច្ច ដែលរបបខ្មែរក្រហមបាន បន្សល់ទុកនូវមូលដ្ឋានគ្រិះស្ទើរស្មើសូន្យ ដែលរបបដឹកនាំបន្ទាប់ គឺរបបសាធារណរដ្ឋប្រជាមានិតកម្ពុជា មានការលំបាកនៅក្នុងការកសាងប្រទេសជាតិ ប្រព័ន្ធអប់រំ និងហេដ្ឋារចនាសម្ព័ន្ធអប់រំឡើងវិញ។
ទោះជា យ៉ាងនេះក្ដី របបនេះទទួលជោគជ័យយ៉ាងលំបាកនូវក្នុងការដាក់ឱ្យដំណើរការឡើងវិញ នូវការអប់រំកម្រិត បឋមសិក្សា ហើយគ្រូបង្រៀនបានលះបង់ពេលវេលា កម្លាំងកាយ និង ចំណេះដឹងដែលនៅសេសសល់ ដើម្បីបង្រៀនកូនចៅជំនាន់ក្រោយ ដែលបានបាត់បង់ឱកាសទទួលបានការអប់រំនៅក្នុងរបបខ្មែរក្រហម និងដែលបានកើតក្រោយអំពើប្រល័យពូជសាសន៍។
នាពេលបច្ចុប្បន្ននេះ គ្រូបង្រៀនកាន់តែដើរតួនាទីសំខាន់ថែមទៀត នៅក្នុងការបង្ហាត់បង្រៀនសិស្ស មិនមែនត្រឹមតែអំពីចំណេះដឹងទូទៅប៉ុណ្ណោះទេ ប៉ុន្ដែថែមទាំងអំពីរបៀបនៅក្នុងការដោះស្រាយជាមួយនឹង អតីតកាលនៃអំពើប្រល័យពូជសាសន៍ នៅក្នុងប្រទេសរបស់ខ្លួន។ ចាប់ពីឆ្នាំ២០០៩រហូតមកដល់ពេល បច្ចុប្បន្ននេះ គ្រូបង្រៀនផ្នែកប្រវត្ដិវិទ្យា ភូមិវិទ្យា អក្សរសាស្ដ្រខ្មែរ និងសីលធម៌
ពលរដ្ឋ ប្រមាណជាងបី ពាន់នាក់ បានចូលរួមនៅក្នុងវគ្គបណ្ដុះបណ្ដាល ស្ដីពីការបង្រៀនប្រវត្ដិសាស្ដ្រកម្ពុជាប្រជាធិបតេយ្យ (១៩៧៥-១៩៧៩) ដែលជាកម្មវិធីដែលផ្ដួចផ្ដើមឡើងដោយមជ្ឈមណ្ឌលឯកសារកម្ពុជា ដោយមានកិច្ច សហការជាមួយក្រសួងអប់រំ យុវជន និងកីឡា។ នៅក្នុងខែឧសភា ឆ្នាំ២០១១ ក្រសួងអប់រំបានដាក់ បញ្ជូលផ្នែកខ្លះនៃសៀវភៅប្រវត្ដិសាស្ដ្រកម្ពុជាប្រជាធិបតេយ្យ ទៅក្នុងកម្មវិធីសិក្សាជាផ្លូវការ។ ជាមួយ នឹងបេសកកម្មថ្មីនេះ គ្រូបង្រៀនកំពុងចូលរួមនៅក្នុងបង្ហាញប្រវត្ដិសាស្ដ្រនៃអំពើប្រល័យពូជសាសន៍ប្រកប ដោយការពិតឥតលម្អៀង ដែលជាជំហានមួយ ឆ្ពោះទៅការថែរក្សាការចងចាំឧក្រិដ្ឋកម្មនៅក្នុងរបបខ្មែរ ក្រហម និងដើម្បីកសាងសេចក្ដីស្រលាញ់ ការអត់ធ្មត់ និងការអត់ឱនឱ្យគ្នា។ នៅក្នុងការបង្រៀនប្រវត្ដិ សាស្ដ្រ
នៃអំពើប្រល័យពូជសាសន៍ គ្រូបង្រៀនប្រកាន់ខ្ជាប់នូវគោលការ នូវក្នុងការដឹកនាំសិស្សឱ្យចាកឆ្ងាយ ពីគំនិតស្អប់ខ្ពើម ការខឹងសម្បារ ហឹង្សា និងការគុំគួន។ នៅក្នុងន័យនេះ គ្រូបង្រៀនរួមចំណែកយ៉ាងធំធេង ដល់ការផ្សះផ្សាជាតិ និងការកសាងសន្ដិភាពជានិរន្ដ នៅក្នុងប្រទេសកម្ពុជា តាមរយៈការអប់រំ ដែលជា យន្ដការអហឹង្សាជាសកលមួយ ដែលប្រទេសជាច្រើនបានទទួលយកទៅអនុវត្ដ។
ដោយពិចារណាអំពីគុណតម្លៃនិងតួនាទីមិនអាចកាត់ថ្ងៃបានរបស់គ្រូបង្រៀន ខ្ញុំឆ្លៀតយកឱកាសទិវា គ្រូបង្រៀនពិភពលោក ៥ តុលា ២០១២ នេះ ថ្លៃងអំណរគុណដល់អតីតនិងគ្រូបង្រៀននាពេលបច្ចុប្បន្ន ចំពោះការខិតខំប្រឹងប្រែងមិនចេះនឿយហត់របស់ខ្លួន ក្នុងការចូលរួមកសាងប្រទេសជាតិ និងការអប់រំ ប្រកបដោយសុទិដ្ឋិនិយម។ ជាថ្មីម្ដងទៀត គ្រូបង្រៀនគឺពិតជា“វិស្វករនៃចំណេះដឹង និង សីលធម៌ សង្គម”៕
ឌី ខាំបូលី អ្នកនិពន្ធសៀវភៅប្រវត្ដិសាស្ដ្រកម្ពុជាប្រជាធិបតេយ្យមជ្ឈមណ្ឌលឯកសារកម្ពុជា
សម័យលើកជើងជាន់កគ្រូ
ទីវាបុណ្យគ្រូអូមអាមក្តាមដុតទេមិនមែគ្រូបង្រៀនឯណា???