ដោយ៖ វង្ស សុម៉ាលីន
ថ្ងៃអង្គារ៍ ទី24 ខែធ្នូ ឆ្នាំ2013
http://vodhotnews.com
ជ័យ សុវ៉ាត របូតតំណែង «ផ្កាយរះក្នុងសួន» / រូបថតដោយ វង្ស សុម៉ាលីន
ការប្រឡងជម្រុះក្នុងកម្មវិធី«ផ្កាយរះក្នុងសួន» បានលេចចេញលទ្ធផលហើយ បើទោះជាពេលនេះ នៅលើកញ្ចក់ទូរទស្សន៍ នៅមិនទាន់ចាក់ផ្សាយដល់វគ្គប្រកាសលទ្ធផលផ្ដាច់ព្រ័ត្រ។ អ្នកទទួលចំណាត់ថ្នាក់លេខ១គឺប្អូនស្រី ហ៊ិន លីដា ខណៈដែល ជ័យ សុវ៉ាត ដែលជាបេក្ខភាពកូនកំព្រា និងជាអ្នកដែលមហាជនរំពឹងទុក បានត្រឹមចំណាត់ថ្នាក់លេខ២ និងរបូតតំណែងពីកម្មវិធីនេះ។
កម្មវិធីប្រលងចម្រៀង«ផ្កាយរះក្នុងសួន» របស់ស្ថានីយទូរទស្សន៍ប៉ុស្តិ៍លេខ១១ កំពុងប្រទាញបានចាប់អារម្មណ៍កាន់តែខ្លាំង បន្ទាប់ពីកម្មវិធីនេះ នៅសល់តែជើងខ្លាំងពីរនាក់ចុងក្រោយ គឺប្អូនប្រុសជ័យ សុវ៉ាត់ បេក្ខភាពមកពីខេត្តកំពង់ស្ពឺ និងប្អូនស្រី ហ៊ិន លីដា បេក្ខភាពមកពីខេត្តកំពង់ឆ្នាំង។ សំណួរមួយត្រូវគេឮសួរគ្នាយ៉ាងគគ្រឹកគគ្រេង ថារវាងជើងខ្លាំងទាំងពីរ តើអ្នកណាជាម្ចាស់ពាន បើម្នាក់ៗក្នុងចំណោមពួកគេ សុទ្ធតែមានទឹកដមសំឡេង និងទេពកោសល្យល្អផ្ដាច់មិនធម្មតាដូចគ្នា? ទាំងបទចម្រៀងបែបសម័យ បែបបុរាណ បែបមនោសញ្ចេតនា និងបែបញាក់កន្ទ្រាក់អារម្មណ៍ ពួកគេទាំងពីរអាចបកស្រាយ និងសម្ដែងបានល្អឥតខ្ចោះ មិនចាញ់តារាចម្រៀងអាជីព ដែលហែលឆ្លងវិស័យចម្រៀងច្រើនឆ្នាំនោះទេ។ តារាអាជីពខ្លះ មិនអាចប្រៀបផ្ទឹមនឹងទេពកោសល្យរបស់ពន្លកតារាទាំងពីរនេះផង។
ជាក់ស្ដែង នៅលើបណ្ដាញFacebook គេបានឃើញចម្រៀងរបស់អ្នកទាំងពីរ នៅក្នុងកម្មវិធី«ផ្កាយរះក្នុងសួន» បង្ហោះឡើងព្រោងព្រាត ដែលកាន់តែជួយឲ្យយុវវ័យ និងមហាជនច្រើនឡើង កោតសរសើរចំពោះសមត្ថភាពរបស់បេក្ខភាពចុងក្រោយទាំងពីរ។ សូម្បីបេក្ខភាព២រូបទៀត គឺប្អូនប្រុសសោម វិរៈបុត្រ ប្អូនប្រុស ទួន ឆានឈុន និងប្អូនប្រុស ពុំ ថៃប៊ុនហុកដែលបានធ្លាក់ទៅហើយ ក៏ត្រូវមហាជនភាគច្រើនទទួលស្គាល់។
តាមការវិភាគ ជ័យ សុវ៉ាត់ ហាក់មានប្រៀបជាងហ៊ិន លីដា ដែលជាគូប្រជែងចុងក្រោយ ដោយសារតែគេជាក្មេងកំព្រា មានប្រវត្តិតស៊ូ ដែលស៊ីនឹងខ្លឹមសាររបស់កម្មវិធី«ផ្កាយរះក្នុងសួន» ដែលបានប្រកាសថា ជាវេទិកាផ្ដល់ឱកាសឲ្យអ្នកមានសមត្ថភាព មានជីវិតកម្សត់ អាចទទួលយកប្រាក់ទៅបន្តការសិក្សាបាន។ ផ្អែកលើទិសដៅនេះ យ៉ាងហោច១ភាគ៣ នៃអ្នកទស្សនា បានដាក់ការសន្និដ្ឋានថា ជ័យ សុវ៉ាត នឹងក្លាយជាអ្នកឈ្នះចុងក្រោយ ខណៈដែលទេពកោសល្យរបស់គេ ក៏លោតខ្លាំងមិនចាញ់ប្អូនស្រី ហ៊ិន លីដា ដែលជាគូប្រជែង។
(ប្អូនស្រី ហ៊ិន លីដា, ជ័យ សុវ៉ាត់ និងបេក្ខភាពកុមារ៉ាពីររូបទៀត)
ប៉ុន្តែនៅចុងសប្ដាហ៍មុន កម្មវិធីនេះ បានប្រលងដល់វគ្គផ្ដាច់ព្រ័ត្រហើយ ដោយម្ចាស់ពានចុងក្រោយ មិនមែនជាប្អូនប្រុសជ័យ សុវ៉ាត ឡើយ ប៉ុន្តែគឺជា ប្អូនស្រី ហ៊ិន លីដា ទៅវិញ។ នេះក៏ចាត់ទុកថាជាដំណឹងដ៏ល្អមួយផងដែរ ដើម្បីឲ្យអ្នកអន្ទះសារដែលចង់ដឹងថា រវាងជ័យ សុវ៉ាត និងហ៊ិន លីដា ដែលកំពុងប្រកួតប្រជែងគ្នា តើអ្នកណាជាម្ចាស់ពានចុងក្រោយរបស់កម្មវិធី «ផ្កាយរះក្នុងសួន» អស់ចម្ងល់។ យ៉ាងណាមិញ ការបរាជ័យ របស់ជ័យ សុវ៉ាត់ ក៏បានធ្វើឲ្យពន្លកតារាថ្មីរូបនេះ ទទួលបានការចាប់អារម្មណ៍មិនតិចផងដែរ ក្នុងរយៈកាលកន្លងមក ដែលគេស្ថិតក្នុងវគ្គជម្រុះបន្តបន្ទាប់ ហើយអាចឈរជើងដល់វគ្គនៅសល់តែពីរនាក់ចុងក្រោយ។ ជ័យ សុវ៉ាត ត្រូវគេឃើញបង្ហោះរូបភាពប្រលងធ្លាក់ព្រមជាមួយនឹងអារម្មណ៍សោកស្ដាយ ដែលមិនអាចឈ្នះក្នុងកម្មវិធី«ផ្កាយរះក្នុងសួន»។ ប្អូនសរសេរថា បើទោះជាធ្លាក់ចេញពីកម្មវិធី ប៉ុន្តែប្អូននៅតែមានក្ដីសង្ឃឹមថាអាចក្លាយជាតារាអាជីពម្នាក់ និងល្បីឈ្មោះផងដែរ។
សូមរំលឹកថា ជ័យ សុវ៉ាត គឺក្មេងកំព្រា តាំងពីតូច។ ឪពុកម្ដាយរបស់ប្អូន បានចែកឋាន តាំងពីប្អូនប្រុសស្ថិតនៅវ័យមិនដល់១០ឆ្នាំម្ល៉េះ ដោយសារជំងឺខ្យល់គរ និងលើសឈាម។ បច្ចុប្បន្ន ប្អូនកំពុងទទួលការផ្ចុងផ្ដើមពីសំណាក់ម្ដាយធម៌២នាក់ បន្ទាប់ពីមណ្ឌលកុមារកំព្រាដែលប្អូនធ្លាប់ជ្រកអស់ច្រើនឆ្នាំ អស់ជំនួយក្នុងការផ្គត់ផ្គង់ក្មេងៗកំព្រាដូចប្អូន៕
សរសេរមកកាន់ លោក វង្ស សុម៉ាលីន តាមរយៈ vongsomalin@yahoo.com
បុរសមួយនេះដូចជាមានអំណួតបន្តិច នេះមិនទាន់ជាប់ចំណាត់ថ្នាក់លេខ១ផង បើជាប់លេខ១វិញ មិនដឹងជាអួតខ្ទីខ្ទឺដល់ណាទេ! ណាស់ហើយជាប់ត្រឹមចំណាត់ថ្នាក់លេខ២បានហើយ(នេះជាមេរៀន)