ពិធីបុណ្យគ្រីស្ទម៉ាស (Christmas) ឬបុណ្យណូអែល (Noel) បានមកដល់ទៀតហើយ។ នៅរៀងរាល់ដើមខែធ្នូ ពិធីបុណ្យនេះត្រូវបានប្រទេសជាច្រើនក្នុងពិភពលោក ចាប់ផ្ដើមប្រារព្ធជាបន្តបន្ទាប់ ដើម្បីអបអរសាទរថ្ងៃកំណើតព្រះយេស៊ូវគ្រីស្ទ និងយកឱកាសជូនពរ និងជូនកាដូអនុស្សាវរីយ៍ឲ្យគ្នាទៅវិញទៅមក។
ដោយ ខែ សុណង
2013-12-25
RFA
ស្ដាប់ ឬ ទាញយកសំឡេង
ការជួបជុំប្រារព្ធពិធីបុណ្យគ្រីស្ទម៉ាស ឬបុណ្យណូអែល នាព្រះវិហារជីវិតថ្មីភ្នំពេញ រាជធានីភ្នំពេញ កាលពីថ្ងៃទី២១ ខែធ្នូ ឆ្នាំ២០១៣។ RFA/Khe Sonorng
«សំឡេងច្រៀង ហេភី ប៊ឺសដេ Happy birth day…!»
នេះ គឺជាការច្រៀងអបអរសាទរនៅក្នុងពេលប្រារព្ធពិធីបុណ្យគ្រីស្ទម៉ាស ឬបុណ្យណូអែល នៅក្នុងព្រះវិហារជីវិតថ្មី នៅរាជធានីភ្នំពេញ។
ដើម្បីចូលរួមអបអរសាទរពិធីបុណ្យគ្រីស្ទម៉ាសនេះ នៅប្រទេសកម្ពុជា មិនថាតែអ្នកជឿលើព្រះយេស៊ូវ ដែលគេធ្វើនៅតាមព្រះវិហារប៉ុណ្ណោះទេ សូម្បីតែនៅតាមសាលាឯកជន ក្រុមហ៊ុន ផ្សារទំនើប និងហាងលក់ដូរនានា ក៏ត្រូវបានគេតុបតែងដើមឈើស្រល់យ៉ាងធំតាំងលំអ និងមានដាក់តាំងកាដូជាច្រើន និងខ្លះមានចាក់បទចម្រៀងចាក់ភ្លេងលាន់ឮរំពង ដើម្បីទាក់ទាញភ្ញៀវ និងលក់បញ្ចុះតម្លៃទៀតផង។
«សំឡេងចម្រៀង Jingo bel»
ឱកាសមួយខែពេញនៅអំឡុងខែធ្នូ សម្រាប់ប្រទេសអឺរ៉ុប គេតែងឈប់សម្រាកពីការងារ ដែលគេហៅថា វ៉ាកង ឬហៅជាភាសាអង់គ្លេសថា ហូលីដេ (Holiday) វេលាឈប់សម្រាកនេះហើយដែលអាចឲ្យពួកគេជួបជុំក្រុមគ្រួសារញាតិមិត្តជិតឆ្ងាយ ទទួលទានអាហាររួមគ្នា និងជូនវត្ថុអនុស្សាវរីយ៍ដល់គ្នាទៅវិញទៅមក។
ប៉ុន្តែ សម្រាប់គ្រីស្ទាន (Christian) ឬអ្នកមានជំនឿលើព្រះយេស៊ូវ វិញ ការជូនកាដូគ្នានេះមានអាថ៌កំបាំងមួយ មានអត្ថន័យសម្រាប់ពិធីបុណ្យនេះ។
ប្រធានការងារមហាវិទ្យាល័យនៃព្រះវិហារជីវិតថ្មីភ្នំពេញ លោក រ័ត្ន ប៊ុនសំ ឲ្យដឹងថា ក្រុមអ្នកមានជំនឿលើព្រះយេស៊ូវគ្រីស្ទ ចាត់ទុកការប្រារព្ធពិធីបុណ្យគ្រីស្ទម៉ាស គឺជាថ្ងៃរំលឹកពីកំណើតរបស់ព្រះដែលបានយាងមកប្រសូតលើផែនដី ដែលជាកាដូសង្គ្រោះមនុស្សកាលពីជាង ២ពាន់ឆ្នាំមុន៖ «ទាក់ទងនឹងអំណោយ គឺគេបង្ហាញអំពីការយាងមករបស់ព្រះយេស៊ូវគ្រីស្ទហ្នឹង គឺជាអំណោយដែលព្រះបានប្រទានមកដល់មនុស្សនូវសេចក្ដីសង្គ្រោះ ដែលជាអំណោយមួយដ៏ធំ តាមអង្គព្រះយេស៊ូវគ្រីស្ទហ្នឹង។ ដូច្នេះហើយ បានជារាល់ពេលបុណ្យណូអែល គឺគេជូនអំណោយដល់គ្នាទៅវិញទៅមក រំលឹកអំពីការអោយដែលព្រះបានឲ្យអំណោយដ៏ធំធេងសម្រាប់មនុស្សជាតិទាំងមូល»។
នៅក្នុងព្រះគម្ពីរបរិសុទ្ធ បានកត់ត្រាថា មានប្រព្រឹត្តិការណ៍នៅភូមិបេថ្លេហ៊ឹម ក្នុងស្រុកយូដា ប្រទេសអ៊ីស្រាអែល ដោយទេព្ដាបានលេចមកប្រាប់ដល់អ្នកគង្វាលហ្វូងចៀមនៅពេលរាត្រីត្រជាក់ ថានឹងមានអង្គរាជបុត្រាមួយអង្គព្រះនាម ព្រះយេស៊ូវគ្រីស្ទ យាងមកប្រសូតលើផែនដីនេះ សម្រាប់ជួយមនុស្សឲ្យរួចពីអំពើបាប ដែលជាអំណោយរបស់ព្រះសម្រាប់មនុស្ស។
«ចម្រៀង Oh holy night»
នៅក្នុងឱកាសប្រារព្ធពិធីបុណ្យគ្រីស្ទម៉ាសនេះ គេតែងតែជូនពរគ្នាទៅវិញទៅមក ដោយភ្ជាប់ទៅឆ្នាំថ្មីដែលនឹងខិតជិតចូលមកដល់នៅសល់តែប៉ុន្មានថ្ងៃទៀតប៉ុណ្ណោះ។
«ចម្រៀងបុណ្យគ្រីស្ទម៉ាស»
អ្នកស្រី មាស ណារ៉ាន់ ជាគ្រីស្ទបរិស័ទម្នាក់នៅភ្នំពេញ បានថ្លែងថា ឲ្យតែដល់ពេលពិធីបុណ្យគ្រីស្ទម៉ាសម្ដងៗ អ្នកស្រីមានក្ដីអំណរខ្លាំងណាស់។ សម្រាប់បុណ្យគ្រីស្ទម៉ាសឆ្នាំ២០១៣ នេះ អ្នកស្រីបន់ស្រន់សុំឲ្យប្រជាជនកម្ពុជា បានទទួលសេចក្ដីសុខសន្តិភាពរបស់ព្រះ៖ «អរគុណព្រះអង្គខ្ញុំ និងក្រុមស្ត្រីទាំងអស់ ចង់បានឆ្នាំថ្មីនេះ ដើម្បីបង្កើតសិស្ស ដើម្បីឲ្យមនុស្សទាំងអស់ចង់ឃើញពីសេចក្ដីស្រឡាញ់របស់ព្រះនៅពេលកំណើតអង្គព្រះយេស៊ូវគ្រីស្ទនេះ ក្នុងព្រះពរព្រះគុណរបស់ព្រះ»។
នាងខ្ញុំសូមជូនពរឲ្យលោកអ្នកស្ដាប់វិទ្យុអាស៊ីសេរី ទាំងអស់ ទាំងក្នុង និងក្រៅប្រទេស ឲ្យជួបប្រទះតែនឹងសេចក្ដីសុខសាន្ត សុភមង្គលក្នុងក្រុមគ្រួសារ និងជោគជ័យគ្រប់ភារកិច្ចការងារកុំបីឃ្លៀងឃ្លាតឡើយ។
សួស្ដីគ្រីស្ទម៉ាស!
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- ជំនឿនិងផលប៉ះពាល់ចំពោះការបាត់ព្រះបរមសារីរិកធាតុព្រះពុទ្ធ
- កម្ពុជាប្រគល់មេដាយកិត្តិយសដល់មេធាវីការពារក្ដីរឿងប្រាសាទព្រះវិហារ
- ក្រុមហ៊ុនដេញថ្លៃអាមេរិកនឹងប្រគល់បដិមាទុរយោធន៍មកកម្ពុជាវិញ
- តុលាការខេត្តកណ្ដាលឃុំខ្លួនឆ្មាំយាមព្រះសក្យមុនីចេតិយបណ្ដោះអាសន្ន
- ក្ដីបារម្ភពីការស្រុតចុះនៃទំនៀមទម្លាប់ធ្វើគារវកិច្ចសំពះសួរគ្នា
- ក្រុមហ៊ុនដេញថ្លៃលក់វត្ថុបុរាណនៅញីវយ៉កយល់ព្រមបញ្ជូនបដិមាបុរាណ១អង្គមកកម្ពុជា
- សមត្ថកិច្ចបញ្ជូនឆ្មាំយាមភ្នំព្រះរាជទ្រព្យទៅស្នងការដ្ឋាននគរបាលខេត្តកណ្ដាល
- សមត្ថកិច្ចសាកសួរឆ្មាំយាមភ្នំព្រះរាជទ្រព្យពាក់ព័ន្ធការបាត់កោដ្ឋមាសព្រះសារីរិកធាតុ
- កម្ពុជាអំពាវនាវអន្តរជាតិបន្តជួយដល់ការអភិរក្សបេតិកភណ្ឌសម្បត្តិវប្បធម៌
Praise the Lord and thank God to see my people come to know Lord Jesus and celebrate His birthday. This is a sigh of Peace and Joy in this small country.