លោក ហ៊ុន សែន នាយករដ្ឋមន្ត្រីនៃប្រទេសកម្ពុជាថ្លែងក្នុងពិធីសំណេះសំណាលជាមួយកម្មករកាត់ដេរពីម្សិលម៉ិញ។ រូបថត ហ្វេសប៊ុក
Thu, 1 March 2018
បែន សុខហ៊ាន
ភ្នំពេញប៉ុស្តិ៍
ភ្នំពេញ: លោកនាយករដ្ឋមន្ត្រី ហ៊ុន សែន បានអះអាងថា សព្វាវុធជាច្រើនត្រូវបានដឹកតាមកុងតឺន័រមកដល់ប្រទេសកម្ពុជាកាលពីយប់ថ្ងៃទី ២៧ ខែកុម្ភៈ ក្រោយពេលគ្នាបន្តិចបន្ដួចជាមួយនឹងរដ្ឋាភិបាលនៃសហរដ្ឋអាមេរិកប្រកាសបញ្ឈប់បណ្ដោះអាសន្នកម្មវិធីជំនួយយោធាដល់ក្រសួងការពារជាតិកម្ពុជា ដោយសារពាក់ព័ន្ធជាមួយនឹងការធ្វើឲ្យដើរថយក្រោយនៃលទ្ធិប្រជាធិបតេយ្យនៅកម្ពុជា ហើយមន្ត្រីជាន់ខ្ពស់យោធាខ្លះនៅក្នុងកងយោធពលខេមរភូមិន្ទបានធ្វើសេចក្ដីថ្លែងការណ៍មានបញ្ហាអំពីការប្រើអំពើហិង្សាទាក់ទងនឹងការបោះឆ្នោត។
ក្នុងពិធីជួបសំណេះសំណាលជាមួយកម្មករ កម្មការិនីប្រមាណជាង ១៧ ពាន់នាក់ មកពីរោងចក្រ សហគ្រាសចំនួន ៨ នៅស្រុកសំរោងទង ខេត្តកំពង់ស្ពឺ កាលពីម្សិលមិញលោក ហ៊ុន សែន ថ្លែងថា៖ «សូម្បីតែយប់មិញ អាទំនិញពិសេសរបស់យើងដូចជាត្រូវទទួលការដឹករួចហើយ។ សុំទោសខ្ញុំប្រើពាក្យនិយាយទំនិញពិសេសដែលហៅថា ទំនិញពិសេស គឺមិនឲ្យអ្នកណាដឹងថា អ្វីក៏ប៉ុន្តែក៏មិនមែនជាគ្រឿងញៀនដែរ។ មិនមែនជាគ្រឿងញៀនទេ ព្រោះដឹកសុទ្ធតែកុងតឺន័រ ប៉ុន្មានពាន់តោនចូលដល់ម៉ឺនតោន។ អ៊ីចឹងទេ គ្រឿងញៀន វាមិនអាចដឹកអាហ្នឹងបានទេ ច្បាស់ជាស្អីហើយ។ ប៉ុន្តែប្រទេសមួយត្រូវតែមានមធ្យោបាយការពារជាតិរបស់ខ្លួន ហើយសម្ដេច ទៀ បាញ់ បានធ្វើនូវកិច្ចការងារនេះ។ ខ្ញុំនិយាយប៉ុណ្ណឹងអាចដឹងទេ សម្ដេច ទៀ បាញ់ រដ្ឋមន្ត្រីការពារជាតិ បើរដ្ឋមន្ត្រីការពារជាតិគាត់មិនដែលទៅដឹកផ្កាទេ គាត់ដឹកគ្រាប់ និងកាំភ្លើង»។
លោកនាយករដ្ឋមន្ត្រីបានថ្លែងផងដែរថា សព្វាវុធ ធុនធំមួយចំនួនត្រូវបានដាក់នៅក្នុងកុងតឺន័រខ្នាតធំដែលត្រូវបានហាមធ្វើចរាចរណ៍នៅលើដងផ្លូវនៅកម្ពុជា។
លោកបន្ថែមថា៖ «ព្រោះមានអ្នកខ្លះក៏លួចដឹងទៅហើយ ព្រោះយប់មិញមានអារ៉ែងណែ វែងលើស។ ដល់វែងទៅគេចាប់ដែរ ចុះយើងមានហ៊ានប្រាប់គេឯណា វាត្រូវតែចូលតាមសម្រួលទៅ បន្ទាប់មកវាចេញមកវិញ ព្រោះតែលើសខ្នាតឡានរបស់គេ គេយកចូល។ ទៅហ៊ានប្រាប់គេ ថាក្នុងហ្នឹងគ្រាប់ធំ»។
លោកនាយករដ្ឋមន្ត្រីមិនបានថ្លែងលម្អិតពីប្រភពសព្វាវុធទាំងនោះដឹកពីប្រទេសណាមកទេ ប៉ុន្តែយោងតាមការផ្សាយរបស់វិទ្យុ BTV ដែលគាំទ្របក្សកាន់អំណាចបានផ្សាយនៅក្នុងអំឡុងខែមករាថា ក្រសួងការពារជាតិចិនបានសម្រេចផ្ដល់រថពាសដែកជិត ១០០ គ្រឿង និងគ្រឿងចក្រមួយចំនួនដល់ក្រសួងការពារជាតិកម្ពុជាដែលជាជំនួយឥតសំណងនឹងមកដល់កម្ពុជានៅក្នុងខែមីនានេះ ស្របពេលដែលភាគីទាំង ២ ចូលរួមសមយុទ្ធនាគមាសជាលើកទី ២ ជាមួយគ្នានៅកម្ពុជា។
លោក ប្រាក់ សុខា អ្នកនាំពាក្យកងទ័ពជើងអាកាសនៃក្រសួងការពារជាតិបានថ្លែងកាលពីម្សិលមិញថា សព្វាវុធទាំងនោះជាផ្នែកនៃលំហាត់សមយុទ្ធយោធារួមគ្នា កម្ពុជា-ចិន «នាគមាស ២០១៨» ដែលគ្រោងធ្វើឡើងនៅអំឡុងពាក់កណ្តាលខែមីនាខាងមុខនេះក្នុងខេត្តកំពង់ស្ពឺ។
លោក សុខា ថ្លែងថា៖ «យើងចូលរួម មានទាំងយន្តហោះ មានទាំងកងកម្លាំងចូលរួម កម្ពុជាយើងគ្រោងឧទ្ធម្ភាគចក្រ ៣ គ្រឿង កងកម្លាំងបច្ចេកទេស វាច្រើនណាស់ ខ្ញុំមិនអាចកំណត់ថាប៉ុណ្ណេះ ប៉ុណ្ណោះបានទេ»។
លោក ឈុំ សុជាតិ អ្នកនាំពាក្យក្រសួងការពារជាតិកាលពីម្សិលមិញបានសរសេរនៅលើទំព័រហ្វេសប៊ុករបស់លោកកាលពីថ្ងៃទី ២៦ ខែកុម្ភៈ អំពីលំហាត់ «នាគមាស ២០១៨» កម្ពុជា-ចិន រៀបចំឡើងដើម្បីលើកកម្ពស់សមត្ថភាពកងយោធពលខេមរភូមិន្ទ ការបន្តប្រពៃណី សាមគ្គីភាព មិត្តភាព។ លោកក៏បានប្រាប់ភ្នំពេញប៉ុស្តិ៍ផងដែរថា កងទ័ពកម្ពុជាចំនួនជិត ៣០០ នាក់ និងកងទ័ពចិនមានជិត ២០០ នាក់នឹងចូលរួមសមយុទ្ធយោធារួមគ្នានេះ។
លោក ទៀ បាញ់ រដ្ឋមន្ត្រីក្រសួងការពារជាតិមិនអាចទាក់ទងបានទេកាលពីម្សិលមិញ តែក្នុងពិធីទទួលជំនួយសម្ភារបរិក្ខារពេទ្យនៃកងទ័ពរំដោះប្រជាមានិតចិនផ្តល់ជូនដល់មន្ទីរពេទ្យព្រះកេតុមាលាថ្ងៃទី ២៦ ខែកុម្ភៈ ឆ្នាំ ២០១៨ បានថ្លែងថា លំហាត់ហ្វឹកហ្វឺននាគមាសឆ្នាំ ២០១៨ កម្ពុជា-ចិន ដែលនឹងធ្វើឡើងនៅអំឡុងពាក់កណ្តាលខែមីនាខាងមុខនេះត្រូវរៀបចំឡើងក្នុងគោលដៅលើកកម្ពស់សមត្ថភាពបន្ថែមទៀតដល់កងយោធពលខេមរភូមិន្ទ ការបន្តប្រពៃណី សាមគ្គីភាព មិត្តភាពរវាងប្រទេសទាំង ២។
លោក ទៀ បាញ់ ថ្លែងថា៖ «លំហាត់ហ្វឹកហ្វឺន នាគមាសឆ្នាំ ២០១៨ នេះក៏ត្រូវបានរៀបចំឡើងដើម្បីចូលរួមអបអរសាទរដល់ខួបអនុស្សាវរីយ៍លើកទី ៦០ នៃការបង្កើតទំនាក់ទំនងការទូត ដើម្បីពង្រឹងសហគមន៍វាសនារួមកម្ពុជា-ចិន ដែលមានសារៈសំខាន់ជាយុទ្ធសាស្ត្រ យូរអង្វែង»។
លោកថ្លែងបន្តថា៖ «ទំនាក់ទំនងកម្ពុជា-ចិន ដែលមានភាពគ្រប់ជ្រុងជ្រោយ និងការអភិវឌ្ឍស៊ីជម្រៅបានផ្តល់ផលប្រយោជន៍សន្ធឹកសន្ធាប់សម្រាប់ប្រជាជន និងកងទ័ពប្រទេសទាំង ២ ដែលចូលរួមចំណែកជាវិជ្ជមានដល់សន្តិភាព និងវិបុលភាពក្នុងតំបន់ និងសកលលោក»។
លោក Paul Chambers សាស្ត្រាចារ្យនៅសាកលវិទ្យាល័យ Naresuan ក្នុងប្រទេសថៃបានថ្លែងថា នេះមិនមែនជារឿងភ្ញាក់ផ្អើលនោះទេ។ យ៉ាងណាមិញ ការបោះឆ្នោតឆ្នាំ ២០១៨ កាន់តែកៀកចូលមកដល់ ហើយលោក ហ៊ុន សែន គឺដូចការបោះឆ្នោតលើកមុនៗដែរគឺគាត់កំពុងស្វែងរកការកសាងឡើងនូវភាពជ្រុលនិយមប្រឆាំងនឹងជនបរទេស (លើកលែងតែចិន) នៅក្នុងចំណោមប្រជាពលរដ្ឋ។
លោកថ្លែងថាលើសពីនេះទៀតដោយព្យាយាមធ្វើឲ្យមានការស្អប់ខ្ពើមចំពោះបរទេសមួយចំនួននោះ លោក ហ៊ុន សែន កំពុងធ្វើតាមគោលនយោបាយរបស់អតីតនាយករដ្ឋមន្ត្រីកម្ពុជាចន្លោះពីឆ្នាំ ១៩៥៣ ដល់ឆ្នាំ ១៩៧៩។ គោលនយោបាយបែបនេះបានធ្វើឲ្យកម្ពុជាកាន់តែឯកោ និងបន្តពឹងផ្អែកទៅលើប្រទេសចិន ខណៈពេលដែលលោក ហ៊ុន សែន នឹងបង្កើនការគ្រប់គ្រងដោយប្រើកណ្តាប់ដៃដែកដែលមានឥទ្ធិពលរបស់គាត់៕ NS
រាយការណ៍បន្ថែមៈ Erin Handley
Contact author: បែន សុខហ៊ាន
Ha hah’ this weapon are the cambodia money but in the war probably gone to master veitcong hanoi and then khmer next generation will pay to china ‘haha ‘like si hak nouk wanted to cheat veitcong and china but he doesn’t know china &veitcong cheat him ‘ lose three million people and all weapon gone to hanoi and now tral island and land even administration is under veitcong rule used hun-sen as their puppet haha so theses rubbish will gone to veitcong mafia dictator master ‘.In even of world war three in south china sea ‘ Youn-hanoi will control cambodia again or maybe finish from the world map . GOD bless all good cambodian people’