ឆ្ពោះទៅការបោះឆ្នោត២០១៨
រូបឯកសារ៖ លោកស ខេង រដ្ឋមន្រ្តីនៃក្រសួងមហាផ្ទៃ ថ្លែងទៅមន្រ្តីប៉ូលិសនិងអភិបាលនានាក្នុងការប្រជុំនៃរបាយការណ៍បូកសរុបចំនួនជនអន្តោប្រវេសន៍នៅថ្ងៃសុក្រ ទី១៩ សីហា ឆ្នាំ២០១៦ នៅរាជធានី ភ្នំពេញ។ (ឡេង ឡែន/VOA)
23 កក្កដា 2018
កាន់ វិច្ឆិកា
វីអូអេខ្មែរ
ខណៈក្រុមអ្នកគាំទ្រគណបក្សប្រឆាំងកំពុងធ្វើយុទ្ធនាការម្រាមដៃស្អាតបង្ហាញពីការមិនទៅចូលរួមការបោះឆ្នោត ដែលនឹងត្រូវធ្វើឡើងនាថ្ងៃអាទិត្យខាងមុខនេះ រដ្ឋមន្រ្តីក្រសួងមហាផ្ទៃលើកឡើងថា ការបង្ហោះសារបែបនេះនឹងមិនត្រូវបានចាប់ដាក់ពន្ធនាគារនោះទេ ប៉ុន្តែត្រូវរងការផាកពិន័យជាប្រាក់។ អ្នកឃ្លាំមើលសង្គមលើកឡើងថា ការបង្ហោះសាររបស់ពួកគេជាការបញ្ចេញមតិ មិនមែនជាបទល្មើសដែលត្រូវចាប់ខ្លួនឬផាកពិន័យនោះទេ។
នៅថ្ងៃច័ន្ទនេះ លោក ស ខេង រដ្ឋមន្រ្តីក្រសួងមហាផ្ទៃ និងជាអនុប្រធានគណបក្សប្រជាជនកម្ពុជា បានបញ្ជាឲ្យអាជ្ញាធរចាប់អ្នកបង្ហោះសារម្រាមដៃស្អាតលើបណ្តាញអ៊ីនធើណិត ដែលបង្ហាញពីការមិនទៅបោះឆ្នោត ឲ្យបង់ពិន័យជាប្រាក់ពី៥លានរៀលទៅ២០លានរៀល។
ថ្លែងទៅកាន់សមាជិកគណបក្សប្រជាជនកម្ពុជាស្រុកបាណន់ ខេត្តបាត់ដំបង នៅព្រឹកថ្ងៃទី២៣ ខែកក្កដា ឆ្នាំ២០១៨ លោក ស ខេង រដ្ឋមន្រ្តីក្រសួងមហាផ្ទៃនិងជាអនុប្រធានគណបក្សកាន់អំណាចលើកឡើងថា អ្នកដែលបង្ហោះយុទ្ធនាការម្រាមដៃស្អាតលើបណ្តាញសង្គម គឺជាការប្រឆាំងទៅនឹងការបោះឆ្នោត ដែលលោកថាជាព្រឹត្តិការណ៍ជាតិដ៏ធំ។
លោកបន្ថែមថា កម្ពុជាមិនមានច្បាប់ចាប់អ្នកបង្ហោះយុទ្ធនាការម្រាមដៃស្អាតយកទៅដាក់ពន្ធនាគារនោះទេ ប៉ុន្តែលោកថា អាជ្ញាធរអាចចាប់ពួកគេ ដើម្បីផាកពិន័យជាប្រាក់ទៅតាមច្បាប់ស្តីពីការបោះឆ្នោតជ្រើសតាំងតំណាងរាស្រ្តអាណត្តិទី៦។
លោកបញ្ជាក់ថា៖
«ខ្ញុំបានបញ្ជាច្បាស់ណាស់ ខ្ញុំថាកុំទៅលូកជាមួយ។ ឥឡូវធ្វើតាមតែច្បាប់ទៅ។ ទៅចាប់ ទៅរកកន្លែងឯណាដាក់? ថ្ងៃហ្នឹងចាប់មួយ ស្អែកចាប់បី ខានស្អែកចាប់ប្រាំ ចាប់ម្ភៃ ឧទាហរណ៍។ ទៅរកកន្លែងឯណាដាក់? ហើយវាគ្មានច្បាប់អនុញ្ញាតឲ្យយើងចាប់។ ប៉ុន្តែមានច្បាប់ប្តឹង ហើយផាកពិន័យ លោកឯងធ្វើថ្ងៃហ្នឹង ប្តឹងថ្ងៃហ្នឹង ធ្វើស្អែកប្តឹងទៀត ហើយផាក ផាកប៉ុន្មាន? ពីប្រាំលាន ទៅម្ភៃលាន។ ម្តងប្រាំលាន ម្ភៃលាន ប្រាំលាន ម្ភៃលាន»។
ការថ្លែងរបស់លោក ស ខេង ធ្វើឡើងខណៈដែលថ្មីៗនេះ រដ្ឋាភិបាលកម្ពុជាបានព្រមានចាត់វិធានការផ្លូវច្បាប់ប្រឆាំងនឹងអ្នកដែលអំពាវនាវឲ្យប្រជាពលរដ្ឋកុំទៅបោះឆ្នោត។ អតីតមេដឹកនាំគណបក្សប្រឆាំង លោក សម រង្ស៊ី ក៏បានអំពាវនាវកុំឲ្យប្រជាពលរដ្ឋទៅបោះឆ្នោតតាមរយៈការបង្ហោះសារផ្សេងៗលើទំព័រហ្វេសប៊ុករបស់លោក ដោយមានទាំងយុទ្ធនាការម្រាមដៃស្អាតជាដើម។
អ្នកគាំទ្រគណបក្សប្រឆាំងជាច្រើនទាំងក្នុង និងក្រៅប្រទេសក៏បានបង្ហោះសារលើកចង្អុលដៃដែលអត់មានប្រឡាក់ទឹកខ្មៅ បង្ហាញពីការមិនទៅបោះឆ្នោតផងដែរ។
ការអំពាវនាវនិងយុទ្ធនាការរបស់ពួកគេទាំងនោះកើតឡើង បន្ទាប់ពីគណបក្សសង្គ្រោះជាតិដែលមានអ្នកគាំទ្រជាង៤០ភាគរយនៅទូទាំងប្រទេស កាលពីការបោះឆ្នោតឆ្នាំ២០១៧ ត្រូវបានតុលាការកំពូលរំលាយទៅតាមបណ្តឹងរបស់ក្រសួងមហាផ្ទៃ ដោយចោទថា គណបក្សនេះបានឃុបឃិតជាមួយបរទេស រៀបចំគម្រោងផ្តួលរំលំរដ្ឋាភិបាលដែលដឹកនាំដោយលោកនាយករដ្ឋមន្រ្តី ហ៊ុន សែន។ ប្រធានគណបក្សសង្គ្រោះជាតិ គឺលោក កឹម សុខា ត្រូវបានចាប់និងឃុំខ្លួនក្នុងពន្ធនាគារពីបទល្មើសដូចគ្នា ខណៈមន្រ្តីជាន់ខ្ពស់គណបក្សនេះចំនួន១១៨នាក់ ត្រូវបានព្យួរសិទ្ធិមិនឲ្យធ្វើនយោបាយម្នាក់ៗចំនួន៥ឆ្នាំ។
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប.) ដែលជាស្ថាប័នស្នើទៅក្រសួងមហាផ្ទៃឲ្យចាត់វិធានការលើអ្នកអំពាវនាវឲ្យពលរដ្ឋធ្វើពហិការកុំទៅបោះឆ្នោតផងនោះលើកឡើងថា រហូតមកដល់ពេលនេះ គ.ជ.ប. ទទួលបានបណ្តឹងចំនួន៥ ពាក់ព័ន្ធនឹងការបង្ហោះយុទ្ធនាការម្រាមដៃស្អាតនេះ។
កាលពីថ្ងៃសុក្រ អតីតមន្រ្តីគណបក្សសង្រ្គោះជាតិចំនួន៣នាក់ ក្នុងខេត្តបាត់ដំបង ត្រូវបានមន្រ្តីគណបក្សកាន់អំណាចប្តឹងទៅគណៈកម្មការរៀបចំការបោះឆ្នោតប្រចាំខេត្តមួយនេះ ពាក់ព័ន្ធនឹងយុទ្ធនាការម្រាមដៃស្អាត តាមរយៈសារដែលពួកគេបង្ហោះតាមបណ្តាញសង្គមហ្វេសប៊ុក។
លោក មាស នី អ្នកសិក្សាពីការអភិវឌ្ឍសង្គម និងជាអ្នកវិភាគនយោបាយឯករាជ្យលើកឡើងថា ការថ្លែងរបស់លោក ស ខេង គឺជាការសម្រួលដល់ស្ថានការណ៍នយោបាយ ស្របពេលដែលគណបក្សកាន់អំណាចបានដឹងខ្លួនមុនជាស្រេចថា ពួកគេនឹងឈ្នះការបោះឆ្នោតនេះ។
លោកមានប្រសាសន៍ថា៖
«មកដល់ពេលនេះហើយ ទោះបីជាយើងចាប់មនុស្សដាក់គុក ដោយសារតែការបង្ហាញម្រាមដៃស្អាតហ្នឹង ដាក់មួយពាន់ឬមួយម៉ឺននាក់ទៀត ក៏វាមិនអាចផ្លាស់ប្តូរអាលទ្ធផលនៃការបោះឆ្នោតហ្នឹងប៉ុន្មានដែរ។ អីចឹង វាអត់មានបានប្រយោជន៍អីលើការគំរាមប្តឹង គំរាមអីទេ មកដល់ពេលនេះហើយ ព្រោះយើងដឹងហើយថា គណបក្សប្រជាជនឈ្នះ១០០ភាគរយបាត់ទៅហើយ។ អីចឹងយើងប្រើការគំរាមកំហែងច្រើនពេកវាធ្វើឲ្យកេរ្តិ៍ឈ្មោះគណបក្សហ្នឹង វាកាន់តែអាក្រក់ថែមទៀត»។
មាត្រា១៤២នៃច្បាប់ស្តីពីការបោះឆ្នោតជ្រើសតាំងតំណាងរាស្រ្តចែងថា ត្រូវផាកពិន័យជាប្រាក់ពី ៥,០០០,០០០ (ប្រាំលានរៀល) ទៅ ២០,០០០,០០០ (ម្ភៃលានរៀល) ដោយ គ.ជ.ប. ដោយពុំទាន់គិតដល់ទោសព្រហ្មទណ្ឌផ្សេងទៀត ចំពោះជនណាដែលតាមគ្រប់មធ្យោបាយទុច្ចរិត៖ រារាំងប្រជាពលរដ្ឋដែលមានសិទ្ធិបោះឆ្នោតមិនឲ្យទៅបោះឆ្នោតធ្វើឲ្យមានការភាន់ច្រឡំ នាំឲ្យបាត់ទំនុកចិត្តលើការបោះឆ្នោតនិងបង្កការរំខានមិនឲ្យដំណើរការបោះឆ្នោតបាន។
លោក កន សាវាង្ស មន្រ្តីសម្របសម្រួលអង្គការឃ្លាំមើលការបោះឆ្នោតមួយ ហៅកាត់ថាខុមហ្វ្រែល លើកឡើងថា ការធ្វើយុទ្ធនាការបង្ហោះម្រាមដៃរបស់ខ្លួនបង្ហាញថាមិនទៅបោះឆ្នោតដោយខ្លួនឯង គឺជាការបញ្ចេញមតិមិនមែនជាសកម្មភាពខុសច្បាប់ណាមួយដែលចែងពីការបោះឆ្នោតនោះទេ។
លោកបន្ថែមថា ការថ្លែងរបស់លោក ស ខេង នឹងអាចធ្វើឲ្យមានការចាប់អ្នកបង្ហោះសារទាំងនោះដើម្បីផាកពិន័យកាន់តែច្រើន ដោយសារការអនុវត្តច្បាប់របស់អាជ្ញាធរមានភាពខ្វះចន្លោះ។
លោកបញ្ជាក់ថា៖
«ចំណុចនេះគឺជាចំណុចមួយដែលខ្ញុំមានការព្រួយបារម្ភសម្រាប់ប្រជាពលរដ្ឋនៅ មូលដ្ឋានណាស់ ព្រោះប្រជាពលរដ្ឋលោកអត់មានចំណេះដឹងទៅលើកិច្ចការងារទាំងអស់ហ្នឹងទេ ហើយរួមទាំងអ្នកច្បាប់មួយចំនួន ដែលលោកបកស្រាយទៅតាមលក្ខណៈនយោបាយទៀត ហើយអាជ្ញាធរខ្លះគាត់មិនយល់ច្បាស់ពីច្បាប់ហ្នឹងទៀត ហើយធ្វើទៅតាមអ្វីដែលជាបទបញ្ជាហ្នឹងទៀត»។
ការបោះឆ្នោតដែលមិនមានវត្តមានរបស់គណបក្សសង្គ្រោះជាតិ ក្នុងអាណត្តិនេះ កំពុងត្រូវបានស្ថាប័នជាតិ និងអន្តរជាតិធំៗមួយចំនួនមើលឃើញថា ជាការបោះឆ្នោតដែលមិនមានភាពសេរីយុត្តិធម៌ និងមិនអាចទទួលយកបាន។
យ៉ាងណាក៏ដោយ រដ្ឋាភិបាលកម្ពុជាអះអាងថា ការរំលាយគណបក្សសង្គ្រោះជាតិគឺធ្វើឡើងទៅតាមច្បាប់ រីឯគណៈកម្មាធិការជាតិរៀបចំការបោះឆ្នោត (គ.ជ.ប.) ដែលលែងមានសមាជិកមកពីគណបក្សប្រឆាំង បានអះអាងថា ខ្លួនរៀបចំការបោះឆ្នោតទៅតាមច្បាប់កម្ពុជា ដែលមានចែងជាធរមាន៕
the powerful despise the weak. It is their weakness
the weak despise the powerful. That’s their strength
B.P great writer and journalist
I wanted to clarify to those cheaters and incite others for violence. They will be arrested or received a fine. Sar Kheng reminds the public before the crime is being committed. If we just go out to vote or stay at home, or go to work as usual, we will be happy. Remember, “you are solely responsible for your own action.”
Gave tral island to Youn-hanoi not a crime’ but not go to vote is a crime ‘ this is king dom of veitcong slave’