ដោយ មាន ឫទ្ធិ
2018-07-25
RFA
ស្ដាប់ ឬទាញយកសំឡេង
រថយន្តដឹងឈើដែលពលរដ្ឋនៅឃុំស្តៅ ស្រុកសេសាន ខែត្រស្ទឹងត្រែង ឃាត់ តែត្រូវអាជ្ញាធរដោះលែងប្រគល់ឲ្យឈ្មួញវិញកាលពីចុងខែវិច្ឆិកា ឆ្នាំ២០១៧។ រូបថតថ្ងៃទី៤ ខែធ្នូ ឆ្នាំ២០១៧ ដោយ សហគមន៍ (Photo provided)
កម្មករក្រុមហ៊ុនទំនប់វារីអគ្គិសនីសេសានក្រោមពីរ ស្រុកសេសាន ខេត្តស្ទឹងត្រែង ឲ្យដឹងថា រថយន្តយីឌុប ៥គ្រឿង ដឹកឈើមូលរាប់រយម៉ែត្រគូបចេញពីឃ្លាំងស្តុកឈើក្នុងតំបន់ទំនប់វារីអគ្គិសនីសេសានក្រោមពីរ ទំនងឆ្ពោះទៅលក់នៅប្រទេសវៀតណាម។ ពួកគេអះអាងថា ជំនួញឈើឆ្លងដែនទ្រង់ទ្រាយធំនេះ បានកម្រើកឡើងវិញ នៅគ្រាដែលមន្ត្រីគ្រាក់ៗរបប លោក ហ៊ុន សែន ផ្ដោតអារម្មណ៍តែលើឃោសនាបោះឆ្នោត។
ក្រុមកម្មករក្រុមហ៊ុនទំនប់វារីអគ្គិសនីសេសានក្រោមពីរ ឲ្យដឹងនៅថ្ងៃទី២៤ កក្កដា ថា ឃ្លាំងស្តុកឈើ រាប់ពាន់ម៉ែត្រគូបនៅតំបន់បាតអាង នៃទំនប់វារីអគ្គិសនីសេសានក្រោមពីរ ក្នុងស្រុកសេសាន ខេត្តស្ទឹងត្រែង កំពុងត្រូវគេដឹកជញ្ជូនទៅលក់នៅប្រទេសវៀតណាមជាបណ្តើរៗហើយ បើទោះបីជាមានលិខិតឲ្យផ្អាកអាជីវកម្មឈើតំបន់នោះក្តី។
កម្មករក្រុមហ៊ុនម្នាក់ថ្លែងមិនហ៊ានបញ្ចេញឈ្មោះព្រោះបារម្ភពីសុវត្ថិភាព បង្ហើបថា ជំនួញឈើទ្រង់ទ្រាយធំក្នុងតំបន់ទំនប់វារីអគ្គិសនីសេសានក្រោមពីរ កំពុងកម្រើកឡើងវិញ នៅគ្រាដែលមានភាពស្ងប់ស្ងាត់មួយរយៈ។ លោកថា ឃ្លាំងស្តុកឈើពីរទីតាំងផ្សេងគ្នាក្នុងតំបន់បាតអាងទំនប់វារីអគ្គិសនីសេសានក្រោមពីរ មានសមត្ថកិច្ចយាមយ៉ាងតឹងតែង និងប្រយ័ត្នប្រយែងបំផុត ហើយនៅពេលថ្មីៗនេះ គេឃើញមានកម្មករជាច្រើនក្រុមបានប្រមូលឈើទាំងនោះ ត្រៀមដឹកតាមរថយន្តយីឌុបចេញទៅក្រៅប្រទេស និងមានឮសំឡេងម៉ាស៊ីនស្វ័យប្រវត្តិអារច្រៀកឈើទាំងនោះ។ លោកថា គំនរឈើទាំងនោះភាគច្រើនគេអារច្រៀកជាជ្រុងដែលមានមុខកាត់ ៣តឹកឡើងទៅ ប្រវែងជាង ២ម៉ែត្រឡើងទៅ ដែលក្រុមហ៊ុនបាតអាងបានប្រមូលទិញពីកម្មករ ដឹកជញ្ជូនពីតំបន់ឆ្ងាយៗ តាមទូក រថយន្តបាកុង និងគោយន្តផង មកស្តុកទុកជាបន្តបន្ទាប់៖ «វាកក្រើកចាប់ផ្ដើមតាំងពីម្សិលមិញ នៅខាងក្រោមទំនប់ក៏ចាប់ផ្ដើមកាប់ និងអារច្រៀក រលំឮសូរពេញព្រៃទៀតហើយ។ បទល្មើសវាមិនស្រាកទេ បទល្មើសនៅតែឃុបឃិតគ្នាដឹកចេញជាប្រព័ន្ធទៅហើយ»។
បុរសដដែលបន្ថែមថា ជំនួញឈើទ្រង់ទ្រាយធំនេះ គឺរូបភាពបំផ្លាញធនធានធម្មជាតិជាប្រវត្តិសាស្ត្រនៅខេត្តភាគឦសាន ដោយមានការឃុបឃិតគ្នាជាប្រព័ន្ធ របស់អាជ្ញាធរខេត្តស្ទឹងត្រែង និងថ្នាក់ជាតិ។ លោកថា រយៈពេល ៥ឆ្នាំកន្លងទៅ អាជ្ញាធរបានយកលេសសំអាតបាតអាង ដោយដឹកឈើពីខាងក្រៅបន្លំជាឈើស្របច្បាប់រូចដឹកទៅលក់នៅក្រៅប្រទេស ដែលមានមន្ត្រីពាក់ព័ន្ធឃុបឃិតគ្នាជាចង្កោម។ ឈើទាំងនោះ គឺក្រុមកម្មករដឹកពី ឧទ្យានជាតិវីរជ័យខេត្តស្ទឹងត្រែង និងតំបន់ព្រៃស្រោងផ្សេងទៀតក្នុងស្រុកសេសាន និងស្រុកសៀមប៉ាង៖ «ការកាប់បំផ្លាញឮសូរម៉ាស៊ីនត្រង់ស៊ីន័រមានច្រើនកន្លែង ហើយការចរាចរឈើបណ្ដើរអាចវាកក្រើកឡើងវិញ»។
កាលពីថ្ងៃចុងខែកុម្ភៈ ឆ្នាំ២០១៨ រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី លោក ប៊ុយ អ៊ុយ បានសម្រេចផ្អាកជាបណ្ដោះអាសន្នការដឹកជញ្ជូនឈើ ក្នុងតំបន់បាតអាងអាងនៃទំនប់វារីអគ្គិសនីសេសានក្រោមពីរ និងផ្អាកការឈូសឆាយសំអាតទីតាំងគម្រោងវិនិយោគសម្បទានសេដ្ឋកិច្ច រហូតដល់បោះឆ្នោតជាសកលរួច។
រូបសហគមន៍ស្រែគរ
អាស៊ីសេរីមិនអាចរកប្រភពទាក់ទង តំណាងក្រុមហ៊ុនទំនប់វារីអគ្គិសនីសេសានក្រោមពីរ ដើម្បីសុំការបំភ្លឺរឿងនេះបានទេនៅថ្ងៃទី២៤ កក្កដា។
មន្ត្រីនាំពាក្យសមាគមអាដហុក (ADHOC) លោក សឹង សែនករុណា អង្កេតឃើញថា លិខិតបទដ្ឋានថ្នាក់ជាតិបានសម្រេចផ្អាកជាបណ្ដោះអាសន្នការដឹកជញ្ជូនឈើនៅតំបន់នោះ ក៏ប៉ុន្តែបទល្មើសព្រៃឈើនៅតែកើតមាន មានន័យថា អាជ្ញាធរមូលដ្ឋាន និងអាជ្ញាធរពាក់ព័ន្ធមិនបានយកចិត្តទុកដាក់ទទួលខុសត្រូវ ការអនុវត្តលិខិតថ្នាក់ជាតិឲ្យមានប្រសិទ្ធភាពទេ។ លោកយល់ថា ថ្នាក់ជាតិគួរតែតាមដានការអនុវត្តខ្លឹមសារលិខិតទាំងឲ្យគ្រប់ជ្រុងជ្រោយពីស្ថាប័នថ្នាក់ក្រោមជាតិ៖ «ក្នុងចំណុចនេះដែរ លិខិតថ្នាក់ជាតិមានច្រើនដែរ រឿងវិវាទដីធ្លីជាដើម និងការចេញលិខិតផ្អាកមិនឲ្យចេញលិខិត តែនៅតែមានបន្ត។ ថ្នាក់ជាតិមិនតាមដានលិខិតហ្នឹង វាបង្ហាញពីការកម្សោយលើការគ្រប់គ្រងថ្នាក់ជាតិដល់ថ្នាក់ក្រោមជាតិ»។
មកទល់ពេលនេះ ផ្ទៃអាងទំនប់វារីអគ្គិសនីសេសានក្រោមពីរ ត្រូវបានក្រុមហ៊ុនវារីអគ្គិសនីសេសានក្រោមពីរ ស្តុកទឹកបំពេញតួប៊ីនអស់ទាំងស្រុង ដើម្បីផលិតថាមពលវារីអគ្គិសនី រយៈពេលជិត ១ឆ្នាំមកហើយ ក៏ប៉ុន្តែក្រុមហ៊ុន នៅតែប្រមូលឈើមូល រាប់រយម៉ែត្រគូបធ្វើអាជីវកម្ម។ ផ្ទៃអាងទំនប់វារីអគ្គិសនីសេសានក្រោមពីរ មានផ្ទៃដី ៣៦.០០០ហិកតារ ឋិតក្នុងស្រុកសេសាន ខែត្រស្ទឹងត្រែង ដែលមានក្រុមហ៊ុនឈ្មោះ អាំង អែន អាសូស៊ីអែត ឡយ័រ (Ang & Associates Lawyer Co., Ltd) របស់ឧកញ៉ា គិត ម៉េង ទទួលសិទ្ធិសម្អាតបាតអាង តាំងពីឆ្នាំ២០១២។ ក៏ប៉ុន្តែពលរដ្ឋ និងមន្ត្រីសង្គមស៊ីវិលរកឃើញថា ក្រុមហ៊ុននេះ យកលេសសំអាតបាតអាង បន្លំជាឈើស្របច្បាប់ អស់រយៈពេលច្រើនឆ្នាំមកហើយ គ្មានអាជ្ញាធរណាចុះអនុវត្តច្បាប់នោះទេ៕
I like to hear these trolls who come to your RFA site and praise the merits of this thug hun sen former cadre Khmer Rouge and who continues to plunder the riches of the Khmer
This news is fake, blind, and one side. Never believe in RFA. Before you report the news, you must have learned that in school to report a fair and balanced news.
–
These robbers and cheaters are the conduct of the individuals, not Hun Sen. If these individuals have violated the law, soon they will be caught and jailed. Do you know that US has more prisoners in the world? Is this because of Donald Trump?
–
Remember being a reasonable person can never come to conclusion because the news said so. Never make a decision when you are angry and upset. Needless to say more?