ដោយ មាន ឫទ្ធិ
2019-10-24
RFA
ស្ដាប់ ឬទាញយកសំឡេង
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ផ្តល់បទសម្ភាសន៍ដល់អ្នកសារព័ត៌មានក្រោយជំនួបរវាងក្រុមមន្រ្តីក្រសួងសេដ្ឋកិច្ច និងអន្តរគណៈកម្មការរបស់សភា កាលពីថ្ងៃទី១១ ខែវិច្ឆិកា ឆ្នាំ២១០៥។ Photo: RFA
រដ្ឋាភិបាលប្រទេសស៊ីប ឬហៅជាភាសាអង់គ្លេសថា សាយព្រឺស (Cyprus) នឹងបើកការស៊ើបអង្កេតជាផ្លូវការលើរឿងរ៉ាវភាពមិនប្រក្រតីនៃការផ្ដល់លិខិតឆ្លងដែន និងសញ្ជាតិរបស់ប្រទេសនេះ ក្រោយពីមានសេចក្ដីរាយការណ៍នានាថា អាជ្ញាធរខ្លួនបានលក់សញ្ជាតិ និងលិខិតឆ្លងដែនស៊ីប ឱ្យទៅសាច់ញាតិ និងបក្ខពួកលោកនាយករដ្ឋមន្ត្រី ហ៊ុន សែន ក្រោមរូបភាពជាការវិនិយោគ។ ការស៊ើបអង្កេតនេះ អាចនឹងឈានទៅរកការសម្រេចដកហូតលិខិតឆ្លងដែន និងសញ្ជាតិប្រទេសនេះ ពីក្រុមសាច់ញាតិ និងបក្ខពួករបស់លោក ហ៊ុន សែន មកវិញ ប្រសិនបើរដ្ឋាភិបាលនៃប្រទេសស៊ីប រកឃើញថា ការផ្តល់សញ្ជាតិនេះ ធ្វើឡើងមិនស្របតាមច្បាប់របស់ប្រទេសនេះ ហើយអាចមានការប្រព្រឹត្តិអំពើពុករលួយក្នុងទ្រង់ទ្រាយធំណាមួយនោះ។
អ្នកនាំពាក្យរដ្ឋាភិបាលស៊ីប លោក ប្រូដ្រូមូស ប្រូដ្រូមូ (Prodromos Prodromou) ត្រូវបានភ្នាក់ងារសារព័ត៌មានរ៉យទ័រ (Reuters) របស់អង់គ្លេស ស្រង់ប្រសាសន៍កាលពីថ្ងៃទី២៣ តុលាថា រដ្ឋាភិបាលខ្លួន នឹងបើកការស៊ើបអង្កេតមួយទៅលើករណីភាពមិនប្រក្រតីនៃការផ្តល់សញ្ជាតិ និងលិខិតឆ្លងដែនប្រទេសនេះឱ្យទៅជនជាតិបរទេស ដោយលោកមិនបាននិយាយសំដៅជាក់លាក់ទៅលើករណីរបស់សាច់ញាតិ និងបក្ខពួកលោក ហ៊ុន សែន នោះទេ។ លោកបន្តថា ប្រសិនបើរកឃើញមានភាពមិនប្រក្រតីណាមួយ ជុំវិញករណីនេះ ចំណាត់ការដែលរដ្ឋាភិបាលស៊ីប អាចនឹងធ្វើឡើងនោះ គឺរួមមានការដកហូតសញ្ជាតិរបស់ប្រទេសនេះពីពួកគេតែម្ដង។
ការប្រកាសបើកការស៊ើបអង្កេតនេះ កើតមានឡើងក្រោយពេលតំណាងរាស្ត្រមកពីគណបក្សប្រឆាំងនៃប្រទេសនេះ គឺអ្នកស្រី អាយរីន ខារាឡាំបៃដ្ស៍ (Irene Charalambides) កាលពីសប្ដាហ៍មុន បានទាមទារឱ្យអាជ្ញាធរស៊ីប ចេញមុខបកស្រាយចំពោះបញ្ហានេះ។ កាលពីថ្ងៃទី១៦ តុលា ភ្នាក់ងារសារព័ត៌មាន រ៉យទ័រ (Reuters) បានចេញផ្សាយនូវអត្ថបទស៊ើបអង្កេតស៊ីជម្រៅមួយ លាតត្រដាងឱ្យដឹងថា សមាជិកក្រុមគ្រួសារ និងបក្ខពួករបស់លោកនាយករដ្ឋមន្ត្រី ហ៊ុន សែន មានទ្រព្យសម្បត្តិមហាសាលតម្កល់នៅប្រទេសស៊ីប ក្នុងតម្លៃរាប់សិបលានដុល្លារអាមេរិក ហើយពួកគេបានទិញសញ្ជាតិប្រទេសស៊ីប។ ភ្នាក់ងារសារព័ត៌មាន រ៉យទ័រ សាច់ញាតិ និងបក្ខពួករបស់លោក ហ៊ុន សែន ទាំងនោះ រួមមានក្មួយស្រីលោក ហ៊ុន សែន គឺអ្នកស្រី ហ៊ុន គឹមឡេង និងស្វាមីលោក នេត សាវឿន អគ្គស្នងការនគរបាលជាតិ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងភរិយា អ្នកស្រី ជឹង សុភាព (ហៅយាយភូ) និងស្វាមី គឺលោក ឡៅ ម៉េងឃិន សមាជិកព្រឹទ្ធសភា គណបក្សប្រជាជនកម្ពុជា ដែលជាប់ពាក់ព័ន្ធនឹងអំពើច្បាមយកដីនៅតំបន់បឹងកក់។ បុគ្គលទាំងនេះ អាចចំណាយទឹកប្រាក់យ៉ាងហោចណាស់ចាប់ពី ២លានយូរ៉ូឡើងទៅក្នុងម្នាក់ៗ ដើម្បីទទួលបានសញ្ជាតិប្រទេសស៊ីបនេះ។
តំណាងរាស្ត្រស្ត្រីជាអតីតអ្នកកាសែតសញ្ជាតិស៊ីប និងជាតំណាងពិសេសរបស់ប្រទេសស៊ីប ទទួលបន្ទុកប្រយុទ្ធប្រឆាំងអំពើពុករលួយ នៃអង្គការដើម្បីកិច្ចសហប្រតិបត្តិការ និងសន្តិសុខអឺរ៉ុប ហៅកាត់ថា OSCE អ្នកស្រី អាយរីន ខារាឡាំបៃដ្ស៍ បានហៅករណីនេះ ជារឿងចំអកឡកឡើយដល់អន្តរជាតិ ដោយអ្នកស្រីចោទជាសំណួរថា តើលិខិតឆ្លងដែនស៊ីបនេះ អាចត្រូវបានផ្តល់ឱ្យបុគ្គលទាំងនេះដោយរបៀបណា ខណៈពួកគេទាំងនេះមិនទាំងអាចចង្អុលនៅលើផែនទី ដឹងថា ប្រទេសស៊ីបស្ថិតនៅត្រង់កន្លែងណាផងនោះ។
អាស៊ីសេរី មិនទាន់អាចទាក់ទងសុំប្រតិកម្មតបពីបុគ្គលពាក់ព័ន្ធនឹងករណីទិញសញ្ជាតិស៊ីបនេះបាននៅឡើយទេ។ ក៏ប៉ុន្តែ កន្លងមន្ត្រីនាំពាក្យរដ្ឋាភិបាល និងមន្ត្រីនាំពាក្យគណបក្សប្រជាជនកម្ពុជា ធ្លាប់លើកឡើងថា ករណីមានសញ្ជាតិបរទេសនេះ ជារឿងធម្មតាព្រោះច្បាប់កម្ពុជាមិនបានហាមឃាត់ការមានសញ្ជាតិពីរនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- តំណាងរាស្ត្រស៊ីប (Cyprus) ទាមទារអាជ្ញាធរខ្លួនបកស្រាយរឿងលក់សញ្ជាតិឱ្យបក្ខពួកលោក ហ៊ុន សែន
- រថយន្តស៊េរីទំនើបអត់បង់ពន្ធជាង៥០០គ្រឿងត្រូវបានក្រសួងសាធារណការរកឃើញ
- មន្ត្រីតុលាការយោធាប្រតិកម្មនឹងការមិនចាត់ការប្រធានតុលាការនេះករណីពុករលួយនិងគ្រួសារនិយម
- មន្ត្រីក្រសួងព័ត៌មានទម្លាយរឿងពុករលួយ និងបក្ខពួកគ្រួសារនិយមក្នុងក្រសួងនេះ
- សង្គមស៊ីវិលគាំទ្រវិធានការច្បាប់លើមន្ត្រីសុរិយោដីពុករលួយនៅខេត្តពោធិ៍សាត់ទាំង ៣រូប
- ក្រសួងមិនទាន់ស៊ើបអង្កេតផ្លូវការពីបញ្ហាបក្ខពួកគ្រួសារនិយមក្នុងតុលាការយោធា
- ក្រសួងការពារជាតិបន្តស៊ើបអង្កេតករណីបក្ខពួកគ្រួសារនិយមរបស់ប្រធានតុលាការយោធា
- របបភ្នំពេញអនុញ្ញាតឱ្យក្រុមហ៊ុនចិនមួយសង់បរិវេណហោះហើរវាលយន្តហោះសៀមរាប
- ACU រងការរិះគន់ក្រោយអះអាងថា មន្ត្រីសមត្ថកិច្ចគ្រាក់ៗ ពីររូបមិនជាប់ពាក់ព័ន្ធអំពើពុករលួយ
- មន្ត្រីរបបភ្នំពេញជំរុញឱ្យយុវជនប្ដឹងទៅACUករណីមន្ត្រីខ្លួនមានលុយរាប់លានទិញផ្ទះនៅអូស្ត្រាលី
Send to facebook
ដំណឹង សម្រាប់ ពួកអាកាកសំណល់ អតីតបក្សខ្មោចតៃហោងសង្គ្រោះជាតិ
ដែលត្រូវយល់ឲ្យច្បាស់មុនបង្កររឿងហេតុ ដែលនាំគ្រោះដល់ខ្លួន
ដែលនឹកស្មានមិនដល់ !
*******
កម្ពុជា ជារដ្ឋអធិបតេយ្យ !
ក្រោមបាវចនា ជាតិ សាសនា ព្រះមហាក្សត្រ
ច្បាប់ស្ដីពីវិសោធនកម្មច្បាប់ស្ដីពីគណបក្សនយោបាយ ត្រង់មាត្រា៦ គឺសំដៅដាច់ខាត
ឲ្យមានការគោរពអនុវត្តន៍ ដោយចែងថា គ្រប់គណបក្សនយោបាយមិនត្រូវធ្វើ
សកម្មភាពណាមួយ ដូចខាងក្រោមជាដាច់ខាត៖
១. ធ្វើឱ្យមានអបគមន៍ ដែលនាំឱ្យអន្តរាយដល់ឯកភាពជាតិ និងបូរណភាពដែនដី។
២. ធ្វើវិទ្ធង្សនាប្រឆាំងនឹងរបបប្រជាធិបតេយ្យ សេរី ពហុបក្ស និងរបបរាជានិយមអាស្រ័យធម្មនុញ្ញ។
៣. ធ្វើប៉ះពាល់សន្តិសុខនៃរដ្ឋ។
៤. បង្កើតកម្លាំងប្រដាប់អាវុធ។
៥. ធ្វើការញុះញង់ដែលអាចនាំអោយមានការបែកបាក់ជាតិ។
ដូច្នេះចលានាណាមួយដែលមានបំណងបំផ្លាញសន្តិភាពជាតិ ដើម្បីផ្តួលរំលំរដ្ឋាភិបាល
ស្របច្បាប់ដែលកើតចេញពីការបោះឆ្នោត តាមលទ្ធិប្រជាធិបតេយ្យ សេរីពហុបក្ស
សម្រាប់ឆន្ទះប្រជាពលរដ្ឋ ដែលជ្រើសរើសអ្នកដឹកនាំជាតិ ទោះក្នុងទម្រង់ណាមួយ ក៏ដោយ
គឺដាច់ខាតកម្ទេចចោល ដោយគ្មានការអត់ឱនឡើយ ។
ដូច្នេះ ! ត្រូវចាំឲ្យច្បាស់ពួកអាកាកសំណល់បក្សក្បត់ជាតិសង្គ្រោះជាតិ