ថ្ងៃទី 4 ឧសភា 2012
ដោយ: រតនា
CEN
កិច្ចប្រជុំ របស់ គ ណៈ កម្ម ការអនុវត្ត សេចក្ដីថ្លែងការណ៍ របស់ អាស៊ាន ស្ដីពី បញ្ហា លើកកម្ពស់ និង ការពារ សិទ្ធិ ពលករ ទេសន្ដរប្រវេសន៍ នៅ ព្រឹក ថ្ងៃទី ៤ ខែឧសភា ឆ្នាំ ២០១២
ភ្នំពេញ: លោក ហូ វុឌ្ឍី អគ្គនាយករងនៃក្រសួងការងារ បានមានប្រសាសន៍ប្រាប់ក្រុមអ្នករាយការណ៍ព័ត៌មាន នៅព្រឹកថ្ងៃទី៤ ខែឧសភា ឆ្នាំ២០១២ ថា កិច្ចប្រជុំនៅពេលនេះ គឺជាការប្រជុំរបស់គណៈកម្មការអនុវត្តសេចក្ដីថ្លែងការណ៍របស់អាស៊ាន ស្ដីពី បញ្ហាលើកកម្ពស់ និងការពារសិទ្ធិពលករទេសន្ដរប្រវេសន៍។ លោកបញ្ជាក់ថា នេះជាកិច្ចប្រជុំលើកទី៥ ដែលធ្វើឡើងនៅក្នុងចំណោមកិច្ចប្រជុំមួយក្រុម នៃកិច្ចប្រជុំរដ្ឋមន្ត្រីការងារអាស៊ាន លើកទី២២។
លោក ហូ វុឌ្ឍី បានបញ្ជាក់ថា កិច្ចប្រជុំសម្រាប់ការលើកកម្ពស់ និងការពារសិទ្ធិពលករទេសន្ដរប្រវេសន៍ លើកទី៥ ត្រូវបានធ្វើឡើងជាបន្តបន្ទាប់ តាំងពីប៉ុន្មានឆ្នាំមុន។ មូលហេតុនៃការកើតឡើងនៃកិច្ចប្រជុំនេះ ដោយសារថ្នាក់ដឹកនាំនៃបណ្ដាប្រទេសអាស៊ាន មានការបារម្ភចំពោះការការពារពលករទេសន្ដរប្រវេសន៍។ នៅក្នុងការបារម្ភនេះដែរ ក្នុងឆ្នាំ២០០៧ នាទីក្រុងសែអ៊ូល ប្រទេសកូរ៉េ ថ្នាក់ដឹកនាំគ្រប់ប្រទេសបានប្រជុំ ហើយបង្កើតសេចក្ដីថ្លែងការណ៍ ស្ដីពី ការការពារសិទ្ធិពលករ ហើយដើម្បីអនុវត្តសេចក្ដីថ្លែងការណ៍នេះ ទើបបង្កើតឡើងជាគណៈកម្មការ អនុវត្តឧបករណ៍សេចក្ដីថ្លែងការណ៍ សិទ្ធិពលកររបស់អាស៊ាន។
លោក ហូ វុឌ្ឍី អគ្គនាយករងនៃក្រសួងការងារ
លោកបន្តថា គណៈកម្មការនេះបានប្រជុំពិភាក្សាគ្នាចំនួន ៥ លើករួចហើយ ពិនិត្យលើសេចក្ដីព្រាង ហើយកិច្ចប្រជុំថ្មីៗនេះនៅសិង្ហបុរី សម្រេចបានសេចក្ដីព្រាងមួយ ជាងសេចក្ដីព្រាងឧបរកណ៍របស់អាស៊ាន ដើម្បីយកទៅប្រើប្រាស់ការពារសិទ្ធិពលករ នៅឆ្នាំ២០១៥។ លោកបន្ថែមថា សេចក្ដីព្រាងនេះ នឹងបន្តពិភាក្សាគ្នារយៈពេលពីរថ្ងៃ ពីថ្ងៃទី៤-៥ ខែឧសភា នៅក្រុងភ្នំពេញ ហើយលទ្ធផលនឹងទទួលបាននៅថ្ងៃស្អែក។
កិច្ចប្រជុំរបស់គណៈកម្មការអនុវត្តសេចក្ដីថ្លែងការណ៍របស់អាស៊ាន ស្ដីពី បញ្ហាលើកកម្ពស់ និងការពារសិទ្ធិពលករទេសន្ដរប្រវេសន៍ នៅព្រឹកថ្ងៃទី៤ ខែឧសភា ឆ្នាំ២០១២
លោកបានឲ្យដឹងដែរថា នៅក្នុងសេចក្ដីព្រាងនោះ ផ្ដោតសំខាន់បំផុតលើការការពារសិទ្ធិពលករជំនាន់ នៅក្នុងបណ្ដាប្រទេសអាស៊ាន ជៀសវាងកុំឲ្យមានការជួញដូរ ឬការធ្វើបាបពលករខុសច្បាប់ ទោះបីប្រទេសបញ្ជូនពលករ ប្រទេសទទួលពលករ ត្រូវអនុវត្តច្បាប់ និងសេចក្ដីថ្លែងការណ៍នេះឲ្យបានត្រឹមត្រូវ ដើម្បីការពារសិទ្ធិពលករ ពីព្រោះពលករដែលធ្វើការទាំងនោះ មិនមែនផ្ដល់ផលប្រយោជន៍សម្រាប់តែប្រទេសដែលទទួលពលករនោះទេ។
ចំពោះការបណ្ដុះបណ្ដាលសមត្ថភាពពលករ ដើម្បីបញ្ជូនទៅកាន់ប្រទេសជាសមាជិកអាស៊ាននោះ សម្រាប់ប្រទេសកម្ពុជា គឺជាបន្ទុករបស់ក្រសួងអប់រំ និងក្រសួងការងារ ត្រូវតែជំរុញការបណ្ដុះបណ្ដាលធនធានមនុស្ស។ លោក ហូ វុឌ្ឍី បានបញ្ជាក់ទៀតថា “មកដល់ពេលនេះមានយុវជនជាច្រើន បានទទួលការបណ្ដុះបណ្ដាលជំនាញ ទាំងក្នុងប្រព័ន្ធ ទាំងក្រៅប្រព័ន្ធ។ ខ្ញុំជឿថា ពីពេលនេះ ដល់ឆ្នាំ២០១៥ យុវជនរបស់យើងនឹងមានលទ្ធភាពគ្រប់គ្រាន់ ក្នុងការប្រកួតប្រជែងទីផ្សារការងារ នៅក្នុងបណ្ដាប្រទេសអាស៊ាន”។
សេចក្ដីថ្លែងការណ៍ស្ដីពីសិទ្ធិពលករទេសន្ដរប្រវេសន៍អាស៊ាន នៅពេលដែលចូលជាធរមានគ្រប់ដណ្ដប់ទៅលើពលករស្របច្បាប់ និងពលករមិនស្របច្បាប់ នៅតាមបណ្ដាប្រទេសជាសមាជិកអាស៊ាន ពីព្រោះតាមរយៈកិច្ចប្រជុំកំពូលអាស៊ាន ថ្នាក់ដឹកនាំប្រទេសកម្ពុជាយើង និងថ្នាក់ដឹកនាំអាស៊ាន បានទទួលស្គាល់បានច្បាស់លាស់ ដោយជំរុញឲ្យបង្កើតឧបករណ៍នេះឲ្យបានឆាប់ ជាពិសេចង់ឲ្យបាននៅចុងឆ្នាំ២០១២នេះ។ ប៉ុន្តែសេចក្ដីថ្លែងការណ៍នេះ ចេញបាន ឬមិនបាន អាស្រ័យលើការជជែកគ្នាលើកនេះ ស្រេច ឬមិនស្រេច ឬត្រូវបន្តជជែកគ្នាពេលក្រោយទៀត៕ K