ដោយ សុខ សេរី
2012-05-03
វិទ្យុអាស៊ីសេរី
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ មន្ត្រីអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា ព្រមទាំងអ្នកកាសែតជាតិ និងអន្តរជាតិ នៅថ្ងៃទី៣ ខែឧសភា ឆ្នាំ២០១២ បានរំលឹកវិញ្ញាណក្ខន្ធ ដោយឈរស្មិងស្មាធិ៍មួយនាទីចំពោះអ្នកកាសែតនានា ដែលត្រូវបានគេបាញ់សំលាប់ ឬធ្វើឃាត និងរងអំពើហិង្សានានាកន្លងមក។
រដ្ឋមន្ត្រី ក្រសួង ព័ត៌មាន លោក ខៀវ កាញារីទ្ធ ក្នុង ពិធី ប្រារព្ធ ទិវា សេរីភាព សារព័ត៌មាន ពិភពលោក នា រាជធានី ភ្នំពេញ នៅ ថ្ងៃ ទី ៣ ខែ ឧសភា ឆ្នាំ ២០១២។ (RFA/Sok Serey)
ការរំលឹកវិញ្ញាណក្ខន្ធនេះ បានធ្វើឡើងនៅក្នុងពិធីប្រារព្ធទិវាសេរីភាពសារព័ត៌មានពិភពលោក នៅទីក្រុងភ្នំពេញ នៅថ្ងៃទី៣ ខែឧសភា ឆ្នាំ២០១២។
មន្ត្រីអង្គការសហប្រជាជាតិទទួលបន្ទុកសិទ្ធិមនុស្សនៅប្រទេសកម្ពុជា នៅថ្ងៃទី៣ ខែឧសភា បានសុំឲ្យរដ្ឋាភិបាលកម្ពុជា បើកចំហថែមទៀតដើម្បីឲ្យអ្នកកាសែតនានា ទទួលបាននូវព័ត៌មានគ្រប់គ្រាន់ក្នុងការផ្សាយព័ត៌មានជូនមហាជន ដោយជៀសវៀងការរឹតត្បិតសេរីភាពនេះ។
មួយវិញទៀត មន្ត្រីរូបនេះក៏បានទទូចសុំឲ្យអ្នកកាសែតនានានៅកម្ពុជា បំពេញតួនាទីឲ្យបានត្រឹមត្រូវតាមក្រមសីលធម៌វិជ្ជាជីវៈ ដោយរាយការណ៍នូវព័ត៌មានពិត ទទួលខុសត្រូវខ្ពស់ និងមិនរំលោភលើសិទ្ធិអ្នកដទៃ។
ការរំលោភសិទ្ធិអ្នកដទៃនោះ គឺមានដូចជា ការលាតត្រដាងឲ្យមហាជនដឹងឮអំពីអត្តសញ្ញាណជនរងគ្រោះនៃការចាប់រំលោភសេពសន្ថវៈ ឬអត្តសញ្ញាណជនរងគ្រោះនៃការជួញដូរមនុស្សជាដើម។ អ្នកកាសែតត្រូវតែរក្សាការសម្ងាត់នៃអត្តសញ្ញាណប្រភពព័ត៌មាន។
ក្រៅពីនេះ អ្នកកាសែតមិនត្រូវប្រព្រឹត្តអំពើពុករលួយទេ គឺរក្សានូវភាពសុចរិត និងសេចក្ដីថ្លៃថ្នូរនៅពេលបំពេញតួនាទី។
តំណាងរងនៃការិយាល័យឧត្ដមស្នងការអង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា លោក ជេមស៍ ហ៊ីណាន (James Heenan) បានមានប្រសាសន៍ថា អ្នកកាសែតនៅកម្ពុជា គប្បីរាយការណ៍ឲ្យបានច្រើនអំពីបញ្ហារំលោភសិទ្ធិមនុស្ស ទោះបីជារឿងនោះល្អ ឬមិនល្អក៏ដោយ ពីព្រោះវាជំរុញឲ្យមានការគោរពសិទ្ធិមនុស្សនៅកម្ពុជា។
លោក ជេមស៍ ហ៊ីណាន៖ «ការរាយការណ៍ព័ត៌មានអំពីការរំលោភសិទ្ធិមនុស្សដោយមិនមានការភ័យខ្លាច ឬក៏បំពេញចិត្តអ្នកណាមួយនោះ គឺជាការលើកស្ទួយសិទ្ធិមនុស្សនៅកម្ពុជា តាមរយៈប្រព័ន្ធផ្សព្វផ្សាយ។ នេះមានន័យថា បើយើងប្រើប្រាស់ប្រព័ន្ធផ្សព្វផ្សាយឲ្យបានល្អលើកស្ទួយតម្លៃសិទ្ធិមនុស្ស មិនឲ្យមានអំពើហិង្សា»។
រដ្ឋមន្ត្រីក្រសួងព័ត៌មានលោក ខៀវ កាញារីទ្ធ និងជាអ្នកនាំពាក្យរដ្ឋាភិបាល បានមានប្រសាសន៍ថា សេរីភាពសារព័ត៌មាននៅកម្ពុជា នៅមិនទាន់ប្រៀបស្មើនឹងសេរីភាពសារព័ត៌មាននៅប្រទេសលោកសេរីនៅអឺរ៉ុបបាននៅឡើយទេ ប៉ុន្តែវាបានឈានដល់កម្រិតស្តង់ដារមួយខ្ពស់នៅក្នុងតំបន់។
លោក ខៀវ កាញារីទ្ធ៖ «រាជរដ្ឋាភិបាលកម្ពុជា ទទួលនូវការលំបាកក្តី ឬយ៉ាងណាក្តី ក៏នៅតែខិតខំធ្វើយ៉ាងណាដើម្បីធានាឲ្យបាននូវការអនុវត្តសិទ្ធិសេរីភាពសារព័ត៌មានមួយដ៏ពេញលេញ គឺនៅពេលថ្មីៗនេះ នៅពេលដែលប្រទេសមីយ៉ាន់ម៉ា (Myanmar) ដែលយើងហៅថា ប្រទេសភូមា នេះ បានប្រកាន់យកនូវកំណែទម្រង់ប្រជាធិបតេយ្យ ក្នុងនោះក៏គាត់ចាប់ផ្តើមអំពីសេរីភាពសារព័ត៌មាន ដោយបានប្រកាសថា ច្បាប់សារព័ត៌មានដែលគាត់អនុម័តប្រើ គឺចម្លងដកស្រង់ពីច្បាប់សារព័ត៌មានកម្ពុជា»។
ចំណែកឯព្រះភិក្ខុសង្ឃ ព្រះនាម គ្រួច សុមាន ព្រះជន្ម ២៧ព្រះវស្សា ដែលបាននិមន្តចូលរួមក្នុងទិវាសេរីភាពសារព័ត៌មានពិភពលោកនេះដែរ បានមានព្រះថេរដីកាថា ព័ត៌មានពិត និងសច្ចភាព គឺមានសារសំខាន់ណាស់សម្រាប់សង្គម៖ «បើសិនបើយើងផ្សព្វផ្សាយភាពតែការពិត អ្វីដែលបានកើតឡើងជាក់ស្ដែង គឺសង្គមរបស់យើងមានការរីកចំរើនដុះដាលទៅមុខ។ …ពរតាមព្រះពុទ្ធសាសនា គឺថា បុគ្គលណាដែលញុះញង់គេ គឺបុគ្គលហ្នឹងពុំមានសេចក្ដីសុខទេ»។
សកម្មជនការពារសិទ្ធិមនុស្ស និងតំណាងរាស្ត្រគណបក្ស សម រង្ស៊ី កន្លងមក បានរិះគន់ថា ប្រព័ន្ធផ្សព្វផ្សាយភាគច្រើននៅកម្ពុជា គឺមាននិន្នាការគាំទ្រគណបក្សប្រជាជនកម្ពុជា កំពុងតែកាន់អំណាច។
តាមការបញ្ជាក់របស់រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានឲ្យដឹងថា បច្ចុប្បន្នប្រទេសកម្ពុជា មានសារព័ត៌មានចំនួនជាង ៥០០អង្គភាព។ ទស្សនាវដ្ដីចំនួនជាង ៧០អង្គភាព និងស្ថានីយវិទ្យុចំនួនជាង ១០០អង្គភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។