ថ្ងៃទី 3 ឧសភា 2012
ដោយ: រតនា
CEN
ភ្នំពេញ: សង្គមស៊ីវិល និងមេសហជីពសេរីកម្មករ ព្រមទាំងតំណាងគណបក្សនយោបាយមិនកាន់អំណាច បានអំពាវនាវដល់ប្រជាពលរដ្ឋទាំងនៅក្នុង និងនៅក្រៅប្រទេស ព្រមទាំងប្រជាជាតិទូទៅដែលស្រឡាញ់ធនធានធម្មជាតិ និងបរិស្ថានធម្មជាតិនោះ ចូលរួមគ្នាសាងសង់រូបសាំនក់លោក ឈុត វទ្ធី ប្រធានអង្គការការពាធនធានធម្មជាតិ នៅតំបន់ព្រៃឈើដែលត្រូវអភិរក្ស។
លោក ជា មុនី ប្រធានសហជីពសេរីកម្មករ នៃព្រះរាជាណាចក្រកម្ពុជា បានមានប្រសាសន៍ឲ្យដឹងយ៉ាងនេះថា ប្រជាពលរដ្ឋខ្មែរ ដែលស្រឡាញ់បរិស្ថានត្រូវតែរួមគ្នាសាងសង់រូបចម្លាក់ លោក ឈុត វុទ្ធី ធ្វើអំពីឈើ ពីព្រោះគាត់ ( ឈុត វទ្ធី )ចូលចិត្តព្រៃឈើនោះ ជាវីរៈជនការពារធនធានធម្មជាតិ និងបរិស្ថាន។
លោក ជា មុនី បានមានប្រសាសន៍បញ្ជាក់ថា “ដោយសារតែលោក ឈុត វុទ្ធី ចូលចិត្តព្រៃឈើនោះ យើងកសាងរូបចម្លាក់គាត់ នៅច្រកចូលទៅកាន់ព្រៃឡង់មួយកន្លែង និងកសាងរូបចម្លាក់មួយទៀតនៅក្នុងតំបន់ព្រៃឈើដែលខ្មាន់កាំភ្លើងបាញ់សម្លាប់គាត់ គឺនៅស្រុកមណ្ឌលសីមា ខេត្តកោះកុង”។
លោកបន្តថា ការសងរូបចម្លាក់នេះ ទុកឲ្យមនុស្សជាតិទុទៅចូលរួមគ្នាការពារធនធានធម្មជាតិទាំងអស់គ្នា។
រីឯលោក សេង រិទ្ធី ប្រធានផ្នែកសិទ្ធិមនុស្ស និងលទ្ធិប្រជាធិបតេយ្យ នៃសមាគមយុវជនខ្មែរ បានមានប្រសាសន៍ថា លោក ឈុត វុទ្ធី គឺជាអ្នកការពារបរិស្ថាន និងជាសកម្មជនដ៏សំខាន់ គួរតែមានរូបសំណាករបស់គាត់ ដើម្បីអ្នកផ្សេងៗបានស្គាល់គាត់។ លោកបញ្ជាក់ថា “គាត់(ឈុតវុទ្ធី) ជាអ្នកដែលក្លាហានមួយរូប”។
លោកបន្តថា ការធ្វើរូបសំណាកលោក ឈុត វុទ្ធី ជាការណ៍មួយប្រសើរដើម្បីឲ្យគេបានស្គាល់ ដឹងជាទូទៅ។
ចំណែកលោក យ៉ង់ គឹមអេង ប្រធានមជ្ឈមណ្ឌល ប្រជាពលរដ្ឋ ដើម្បីអភិវឌ្ឍន៍ និងសន្តិភាព (PDP-Center) បានមានប្រសាសន៍ថា លោក ឈុត វុទ្ធី ជាសកម្មជនមួយរូប តស៊ូដើម្បីបុព្វហេតុជាតិ ការពារធនធានធម្មជាតិ ការពារព្រៃឡង់ មិនមែនដើម្បីផលប្រយោជន៍ខ្លួនគាត់ទេ ដើម្បីប្រជាពលរដ្ឋ សម្រាប់ប្រជាជាតិខ្មែរទាំងមូល។
លោកបញ្ជាក់ថា “គាត់(ឈុតវុទ្ធី)គួរតែទទួលបានងារជាវីរៈជន គួរតែមានការសាងសង់រូបសំណាកគាត់ សម្រាប់ទុកជានិម្មិតរូប សម្រាប់គោរពវីរៈភាពរបស់គាត់ និងជាគំរូសម្រាប់អ្នកជំនាន់ក្រោយទាំងអស់”។
ជាមួយគ្នានោះដែរ លោក យ៉ង គឹមអេង បានបញ្ជាក់ថា ការសាងសង់រូបសំណាក លោក ឈុត វុទ្ធី ដែលជាវីរៈជនការពារធនធានធម្មជាតិ ដើម្បីមនុស្សជំនាន់ក្រោយធ្វើពិធីរំលឹកចំពោះគាត់ នៅរៀងរាល់ថ្ងៃ ដែលគេបាញ់សម្លាប់គាត់ ជាការបង្ហាញឲ្យឃើញថា កម្ពុជាមិនត្រូវការហិង្សាទេ កម្ពុជាត្រូវការការដោះស្រាយជម្លោះ បញ្ហាផ្សេងៗដោយអហិង្សា ដោយការនិយាយ ដោយការចរចាគ្នា។
មន្ត្រីជាន់ខ្ពស់គណបក្សហ្វ៊ុនស៊ិនប៉ិច លោក ទេព នន្ទរី បានមានប្រសាសន៍ថា នៅក្នុងទស្សនៈរបស់លោក គួរតែលើកទឹកចិត្តអ្នកដែលមានឧត្តមគតិជាតិ។ លោកបញ្ជាក់ថា “ខ្ញុំឯកភាពសុំឲ្យមានគោរមងារដល់អ្នក ដែលមានឧត្តមគតិជាតិរបៀបនេះ”។
លោក អ៊ូ ច័ន្ទរិទ្ធ មន្ត្រីជាន់ខ្ពស់គណបក្សសិទ្ធិមនុស្ស និងជាអ្នកតំណាងរាស្ដ្រមណ្ឌលខេត្តកណ្ដាល មានប្រសាសន៍ថា លោកគាំទ្រនូវសំណើការសង់រូបជានិម្មិតរូបជូនលោក ឈុត វុទ្ធី។
លោកបញ្ជាក់ថា “គណបក្សសិទ្ធិមនុស្ស គាំទ្រនូវសកម្មភាពរបស់លោក ឈុត វុទ្ធី ព្រោះយើងឃើញថា អ្វីដែលគាត់ធ្វើ គឺការពារផលប្រយោជន៍ជាតិ ប្រជាពលរដ្ឋ ការពារបរិស្ថាន ធនធានធម្មជាតិទាំងអស់។ គាត់ជាមនុស្សមួយក្លាហាន ហ៊ានចូលទៅតទល់ជាមួយអាជ្ញាធរមានប្រដាប់អាវុធបែបនេះ ខ្ញុំសុំសរសើរនូវវីរៈភាពរបស់លោក”។
សូមជម្រាបថា កាលពីម៉ោងវេលាជាង ១២ ថ្ងៃត្រង់ ថ្ងៃទី២៦ ខែមេសា ឆ្នាំ២០១២ លោក ឈុត វុទ្ធី ប្រធានអង្គការការពារធនធានធម្មជាតិ រួមដំណើរដោយកញ្ញា ផន បុប្ជា និងឈ្មោះ អូលេស្យា ប្លុកឃី (ស្រី) ជនជាតិកាណាដា ជាបុគ្គលិកកាសែត ឌឹខេមបូឌា ដេលី បានចុះទៅយកព័ត៌មាននៅទីតាំងក្រុមហ៊ុនទទួលដីសម្បទានសេដ្ឋកិច្ចមួយ នៅភូមិកោះប៉ោ ឃុំបាក់ខ្លង ស្រុកមណ្ឌលសីមា ខេត្តកោះកុង ត្រូវបានសន្តិសុខការពារក្រុមហ៊ុន ហាមឃាត់ ហើយក៏មានអន្តរាគមន៍ពីមន្ត្រីកងរាជអាវុធហត្ថខេត្ត ចុះទៅកន្លែងកើតហេតុ។
ក្រោយមក ក៏មានការប្រទាញប្រទង់គ្នា ធ្វើឲ្យមានការផ្ទុះអាវុធបណ្តាលឲ្យ លោក ឈុត វុទ្ធី ស្លាប់ នៅនឹងកន្លែងដោយសារគ្រាប់កាំភ្លើងបាញ់ចូលក្នុងឡានធ្លាយត្រូវជង្គង់ប្លាតទៅចំពោះ (ស្លាប់ក្នុងឡាន)។ ក្នុងព្រឹត្តិការណ៍នោះ ប៉េអឹម ឈ្មោះ អ៊ិន រតនា ក៏ត្រូវស្លាប់ ដោយត្រូវ ២គ្រាប់ ១គ្រាប់ចំពោះ ១គ្រាប់ទៀតចំគល់ដោះខាងឆ្វេង ស្លាប់នៅនឹងកន្លែងក្បែរឡានលោក ឈុត វុទ្ធី។
កាលពីថ្ងៃទី៣០មេសា ឆ្នាំ២០១២ សម្តេចនាយករដ្ឋមន្ត្រី បានចុះហត្ថលេខា បង្កើតគណៈកម្មការចម្រុះ ដើម្បីបន្តការស៊ើបអង្កេតបន្ថែមទៀត ទៅលើហេតុការណ៍ ដែលកើតឡើង លើឃាតកម្មលោកឈុតវុទ្ធី និងប៉េអឹម អ៊ិត រតនា នៅខេត្តកោះកុង៕