សុក្រ 04 ឩសភា 2012
ទស្សនាវដ្តីសារព័ត៌មានសេរី
សហជីពសេរីកម្មករ នៃព្រះរាជាណាចក្រកម្ពុជានៅថ្ងៃទី០៤ ខែឧសភានេះ បានផ្ញើលិខិតមួយច្បាប់ទៅរដ្ឋមន្រ្តីក្រសួងបរិស្ថាន ដោយស្នើឲ្យមានការចាត់មន្រ្តីជំនាញដើម្បីពិនិត្យបរិស្ថាននៅក្នុងបរិវេណរោងចក្រញូអាតឃីតមានទីតាំងនៅស្រុកអង្គស្នួល ខេត្តកណ្តាល ដែលត្រូវរាយការណ៍ថា មានបរិស្ថានមិនល្អ។
កម្មករដួលសន្លប់ដោយសារបរិស្ថានមិនល្អនៅក្នុងរោងចក្រកន្លងមក
លិខិតដែលចុះហត្ថលេខាដោយលោក ជា មុនី ប្រធានសហជីពសេរីកម្មករ ផ្ញើទៅលោក ម៉ុក ម៉ារ៉េត រដ្ឋមន្រ្តីក្រសួងបរិស្ថានបានលើកឡើងថា នៅក្នុងបរិវេណរោងចក្រញូអាតឃីត មានទីតាំងស្ថិតនៅភូមិត្រពាំងភូមិ ឃុំពើក ស្រុកអង្គស្នួល ខេត្តកណ្តាល មានធុំក្លិនរបៀបក្លិនចំណីត្រី ជះស្អុយចូលមកក្នុងអគារ C របស់រោងចក្រ ដែលធ្វើឲ្យកម្មករ កម្មការិនីកំពុងបម្រើការងារពិបាកទ្រាំក្នុងការដកដង្ហើម។ ហើយលើសពីនេះ នៅកន្លែងបោកគក់របស់រោងចក្រ ក៏មានជះក្លិនស្អុយភាយចេញពីក្នុងលូសំអុយ ធ្វើឲ្យកម្មករ កម្មការិនី បម្រើការងារនៅក្នុងបរិវេណនោះពិបាកទ្រាំក្នុងការដកដង្ហើមផងដែរ។
លិខិតបានបញ្ជាក់ថា ក្លិនស្អុយនេះ បានបង្ហាញពីកខ្វក់បរិស្ថាននៅបរិវេណរោងចក្រញូអាតឃីត ដែលធ្វើឲ្យប៉ះពាល់យ៉ាងធ្ងន់ធ្ងរដល់សុខភាពកម្មករ កម្មការិនី ដែលកំពុងបម្រើការងារនៅក្នុងរោងចក្រនេះ៕