ច័ន្ទ 07 ឩសភា 2012
ទស្សនាវដ្តីសារព័ត៌មានសេរី
តំណាងរាស្រ្តគណបក្សប្រឆាំងចំនួន៣រូបកាលពីពេលថ្មីៗនេះ បានស្វះស្វែងរកការអន្តរាគមន៍ពីក្រសួងការបរទេសកម្ពុជា ដើម្បីឲ្យមានការដោះលែងពលរដ្ឋខ្មែរក្រោមដែលត្រូវអាជ្ញាធរយួនឃុំឃាំងដោយអយុត្តិធម៌។
លោក ចៅហេន សកម្មជនខ្មែរក្រោមកំពុងព្យាបាលនៅមន្ទីរពេទ្យដោយ ជើងជាប់ខ្នោះ
ក្នុងលិខិតដែលចុះហត្ថលេខារួមគ្នាដោយលោក យន្ត ថារូ , លោក ឡុង រី និងលោក សុខ អ៊ុំស៊ា អ្នកតំណាងរាស្រ្តគណបក្សប្រឆាំងសមរង្ស៊ី ផ្ញើទៅលោក ហោ ណាំហុង រដ្ឋមន្រ្តីការបរទេសកម្ពុជា តាមរយៈលោក ហេង សំរិន ប្រធានរដ្ឋសភាជាតិ បានលើកឡើងថា លោក ចៅ ហេន សកម្មជនសិទ្ធិមនុស្សខ្មែរកម្ពុជាក្រោមដែលបានតវ៉ាទាមទារដីធ្លីរបស់ខ្លួនដែលអាជ្ញាធរយួនបានរឹបអូស ត្រូវសមត្ថកិច្ចយួនចាប់ឃុំឃាំងយ៉ាងយុត្តិធម៌ ដោយតុលាការខេត្តមាត់ជ្រូកកាត់ទោសទៅតាមអ្វីដែលអាជ្ញាធរយួនចង់បាន រហូតដល់២ឆ្នាំ។ ដោយបន្តថា ទោះបីយ៉ាងណាក៏ដោយ ឥឡូវនេះលោក ចៅ ហេន បានជាប់ពន្ធនាគារជាង១ឆ្នាំរួចហើយ ម្យ៉ាងវិញទៀតសុខភាពរបស់គាត់មានជំងឺយ៉ាងទម្ងន់និយាយមិនបាននៅក្នុងពន្ធនាគារ។
លិខិតរបស់អ្នកតំណាងរាស្រ្តបានបញ្ជាក់ថា ជាទូទៅពិធីបុណ្យផ្សេងៗរបស់ប្រទេសយួន គឺតែងតែមានការលើកលែងទោសដល់ទណ្ឌិត និងពិរុទ្ធជន ដូចជានៅថ្ងៃទី៣០ ខែមេសា ដែលជាថ្ងៃបុណ្យជាតិដ៏ធំរបស់ប្រទេសយួន ដែលបានឈ្នះសង្រ្គាមពីសហរដ្ឋអាមេរិក។ ដូច្នេះ លោក ចៅ ហេន បើគិតទាំងការជាប់ពន្ធនាគារ ទាំងការលើកលែងទោស មកដល់ពេលនេះគួរត្រូវបានដោះលែងឲ្យមានសិទ្ធិសេរីភាព។ ពិសេសទៅទៀតនោះ លោក ចៅហេន គឺជាជនជាតិដើមខ្មែរកម្ពុជាក្រោម ដែលគួរត្រូវបានលើកកម្ពស់ និងលើកស្ទួយ ព្រមទាំងអធ្យាស្រ័យ មិនត្រូវគាបសង្កត់ធ្វើទារុណកម្មរូបគាត់ដោយអំពើព្រៃផ្សៃ អមនុស្សធម៌ដូចសព្វថ្ងៃនេះទេ។
ដោយសារតែហេតុផលទាំងនេះ អ្នកតំណាងរាស្រ្តបក្សប្រឆាំងទាំងបីរូបបានស្នើឲ្យក្រសួងការបរទេសកម្ពុជា ចាត់វិធានការទៅស្ថានកុងសុលខ្មែរប្រចាំទៅទីក្រុងព្រៃនគរ ឲ្យជួយអន្តរាគមន៍ទៅអាជ្ញាធរយួន ដើម្បីដោះលែងលោក ចៅ ហេន ឲ្យមានសេរីភាពឡើងវិញ ដើម្បីជាឧត្តមប្រយោជន៍ នៃប្រជាពលរដ្ឋខ្មែរយើង ក្នុងនាមប្រទេសភូមិផងរបងជាមួយគ្នា ដូចស្ថានទូតយួនប្រចាំនៅប្រទេសកម្ពុជាបាននិងកំពុងជួយដល់ជនអន្តោប្រវេសន៍គេនៅកម្ពុជាសព្វថ្ងៃ៕