ព្រហស្បតិ៍ 14 មិថុនា 2012
ទស្សនាវដ្តីសារព័ត៌មានសេរី
កាសែតជប៉ុនល្បីឈ្មោះមួយឈ្មោះ Asahi Shimbun បានចុះផ្សាយកាលពីថ្ងៃពុធថា កប៉ាល់ដឹកទំនិញមួយគ្រឿងដែលចុះបញ្ជីប្រទេសកម្ពុជា បានដឹករថយន្ត៤គ្រឿងសម្រាប់បាញ់កាំជ្រួចមីស៊ីលរបស់ចិន ទៅឲ្យកូរ៉េខាងជើងកាលពីឆ្នាំទៅ។
រថយន្តដឹកមីស៊ីលរបស់កូរ៉េខាងជើងបង្ហាញក្នុងព្យុះហយាត្រាថ្មីៗនេះ
តាម Asahi Shimbun ដែលយោងទៅលើប្រភពផ្សេងៗ នៃរដ្ឋាភិបាល ជប៉ុន អាមេរិក និងកូរ៉េខាងត្បូង បានរាយការណ៍ថា ផ្កាយរណបឈ្លបយកការណ៍របស់សម្ព័ន្ធមិត្តទាំងបីនេះ បានតាមដានថតការដឹកជញ្ជូនយានយន្តទាំង៤គ្រឿងសម្រាប់បាញ់កាំជ្រួចមីស៊ីលនៅលើកប៉ាល់ដឹកទំនិញមួយគ្រឿងឈ្មោះ Harmony Wish ដែលចុះបញ្ជីនៅប្រទេសកម្ពុជា បានធ្វើដំណើរចាកចេញពីកំពង់ផៃសៀងហៃប្រទេសចិននៅថ្ងៃទី០១ ខែសីហា ឆ្នាំ២០១១ ហើយបានទៅដល់ Nampho នៅឆ្នេរសមុទ្រខាងលិចប្រទេសកូរ៉េខាងជើងនៅថ្ងៃទី០៣ ខែសីហា ឆ្នាំដដែល។ ប៉ុន្តែរដ្ឋាភិបាលទីក្រុងវ៉ាស៊ីនតោន តូក្យូ និងសេអ៊ូល មិនបានធ្វើការផ្សព្វផ្សាយរឿងនេះទេ ដោយសង្ឃឹមថា ប្រទេសចិននឹងដាក់គំនាបទៅលើកូរ៉េខាងជើង ដើម្បីបញ្ចុះបញ្ចូលប្រទេសនេះឲ្យសុខចិត្តចូលរួមតុចរចាឡើងវិញស្តីពីកម្មវិធីនុយក្លេអ៊ែរ និងលះបង់ការពិសោធន៍សាកល្បងកាំជ្រួចនុយក្លេអ៊ែរលើកទី៣របស់កូរ៉េខាងជើងនោះ។
សូមរំលឹកថា នៅឆ្នាំ២០០៦ និង២០០៩ អង្គការសហប្រជាជាតិបានសម្រេចដាក់ទណ្ឌកម្មចំនួនពីរលើកប្រឆាំងនឹងប្រទេសកូរ៉េខាងជើង បន្ទាប់ពីប្រទេសនេះបានពិសោធសាកល្បងកាំជ្រួចមីស៊ីលរបស់ខ្លួន។ សេចក្តីសម្រេចរបស់អង្គការសហប្រជាជាតិនោះ គឺហាមមិនឲ្យផ្ទេរសព្វាវុធធុនធ្ងន់ទៅឲ្យកូរ៉េខាងជើង រួមទាំងបច្ចេកវិទ្យាណាដែលអាចផ្សំជាធាតុផលិតអាវុធនុយក្លេអ៊ែរបាន ព្រមទាំងសម្ភារៈផ្សេងៗទៀតដែលជាប់ទាក់ទងនឹងការបង្កើតអាវុធនុយក្លេអ៊ែរ៕