ថ្ងៃទី 6 កក្កដា 2012
ដោយ: CEN
កិច្ចប្រជុំគណៈកម្មាធិការបេតិកភណ្ឌពិភពលោក នៅប្រទេសរុស្ស៊ី
(រូបថត៖ ទីស្តីការគណៈរដ្ឋមន្ត្រី)
ភ្នំពេញ: គណៈប្រតិភូកម្ពុជា ដែលបានអញ្ជើញចូលរួមក្នុងសម័យប្រជុំពេញអង្គលើកទី៣៦ នៃគណៈកម្មាធិការបេតិកភណ្ឌពិភពលោក ដែលបានប្រព្រឹត្តទៅចាប់ពីថ្ងៃទី២៤ ខែមិថុនា រហូតដល់ថ្ងៃទី០៦ ខែកក្កដា ឆ្នាំ២០១២ នៅទីក្រុង St. Petersburg សហព័ន្ធរុស្ស៊ី បានប្រកាសថា កម្ពុជានឹងធ្វើជាម្ចាស់ផ្ទះរៀបចំកិច្ចប្រជុំលើកទី៣៧ និងជាប្រធាននៃគណៈកម្មាធិការបេតិកភណ្ឌពិភពលោក នៅឆ្នាំ២០១៣។
សេចក្តីប្រកាសរបស់ទីស្តីការគណៈរដ្ឋមន្ត្រី បង្ហាញថា ក្នុងឱកាសសម័យប្រជុំនៃគណៈកម្មាធិការ យូណេស្កូ នៅប្រទេសរុស្ស៊ី គណៈប្រតិភូបានជួបពិគ្រោះយោបល់ជាមួយលោកជំទាវ Eleonora Mitrofanova ប្រធានគណៈកម្មាធិការបេតិកភណ្ឌពិភពលោក និងបានពិភាក្សាការងារជាមួយប្រធានគណៈប្រតិភូ និងឯកអគ្គរដ្ឋទូតទាំងអស់នៃបណ្ដាប្រទេសជាសមាជិកគណៈកម្មាធិការ និងគណៈប្រតិភូសំខាន់ៗមួយចំនួនទៀត ដែលមិនមែនជាសមាជិកគណៈកម្មាធិការ ព្រមទាំងគណៈប្រតិភូតំណាងឲ្យស្ថាប័នសំខាន់ៗរបស់យូណេស្កូ ដើម្បីចលនាស្វែងរកការគាំទ្រដល់កម្ពុជា ដែលបានដាក់ពាក្យស្នើសុំធ្វើជាម្ចាស់ផ្ទះរៀបចំកិច្ចប្រជុំលើកទី៣៧ នៃគណៈកម្មាធិការបេតិកភណ្ឌពិភពលោក។
សេចក្តីប្រកាស បញ្ជាក់ថា ជាលទ្ធផល នៅថ្ងៃទី៤ ខែកក្កដា ឆ្នាំ២០១២ គណៈកម្មាធិការបានសម្រេចជាឯកច្ឆន្ទលើបេក្ខភាពរបស់ព្រះរាជាណាចក្រកម្ពុជាដើម្បីធ្វើជាម្ចាស់ផ្ទះរៀបចំកិច្ចប្រជុំលើកទី៣៧ និងជាប្រធាននៃគណៈកម្មាធិការបេតិកភណ្ឌពិភពលោក នៅឆ្នាំ២០១៣។
សេចក្តីប្រកាសដដែល ក៏បានលើកឡើងថា ការកំណត់យកទីក្រុងភ្នំពេញ និងសៀមរាប ជាទីកន្លែងសម្រាប់រៀបចំកិច្ចប្រជុំលើកទី៣៧ បន្ទាប់ពីទីក្រុងប្រាស៊ីលយ៉ា ទីក្រុងប៉ារីស និងទីក្រុង St. Petersburg មានន័យថា គណៈកម្មាធិការ បានផ្តល់កិត្តិយសដ៏ធំធេងដល់ប្រទេសកម្ពុជា និងផ្តល់តម្លៃដ៏ថ្លៃថ្លាដល់អារ្យធម៌របស់យើង ដែលមានអាយុកាលរាប់ពាន់ឆ្នាំមកហើយ។ នេះគឺជានិមិត្តរូបដ៏មានសារសំខាន់បំផុត ដែលចូលរួមចំណែកពង្រឹងនិងពង្រីកកិត្យានុភាពរបស់ព្រះរាជាណាចក្រកម្ពុជានៅលើឆាកអន្តរជាតិ។
សេចក្តីប្រកាសដដែល បានលើកឡើងថា ជាការពិតណាស់ សេចក្តីសម្រេចនេះ គឺជាការបញ្ជាក់ឡើងវិញនូវការទទួលស្គាល់ដល់៖
១.កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបីតេជោ ហ៊ុន សែន ដែលបានយកចិត្តទុកដាក់ក្នុងការលើកកម្ពស់តម្លៃវប្បធម៌ជាតិ និងការការពារបេតិកភណ្ឌវប្បធម៌ ជាពិសេសតំបន់បេតិកភណ្ឌអង្គរ និងព្រះវិហារ។
២.តួនាទីយ៉ាងសកម្មរបស់កម្ពុជានៅក្នុងកិច្ចការអន្តរជាតិ ជាពិសេសក្នុងការងារអង្គការយូណេស្កូ និងគណៈកម្មាធិការបេតិកភណ្ឌពិភពលោកដែលកម្ពុជាបានចូលជាសមាជិកអស់រយៈពេល៣ឆ្នាំកន្លងមក។
៣.សមត្ថភាពរបស់កម្ពុជាលើការថែរក្សាស្ថិរភាពនយោបាយ និងការងារការពារសន្តិសុខនិងសុវត្ថិភាពក្នុងការរៀបចំសន្និសីទកម្រិតអន្តរជាតិ និងការទទួលបដិសណ្ឋារកិច្ចដល់ភ្ញៀវអន្តរជាតិ។
សេចក្តីប្រកាស ក៏បានលើកឡើងថា ជាងនេះទៀត ការសម្រេចផ្តល់កិត្តិយសដល់កម្ពុជាធ្វើជាម្ចាស់ផ្ទះ ជាការបញ្ជាក់នូវជំនឿទុកចិត្តរបស់សហគមន៍អន្តរជាតិ មកលើកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការសម្រេចបាននូវសមិទ្ធផលដ៏ធំធេង លើវិស័យនយោបាយ សេដ្ឋកិច្ច និងវប្បធម៌។
សេចក្តីប្រកាស លើកឡើងថា នៅក្នុងកិច្ចប្រជុំពេញអង្គលើកទី៣៧ របស់គណៈកម្មាធិការបេតិកភណ្ឌពិភពលោកនេះ កម្ពុជានឹងទទួលស្វាគមន៍ភ្ញៀវអន្តរជាតិប្រហែល ៨០០នាក់ រួមមាន អ្នកការទូត និងអ្នកជំនាញខាងបេតិកភណ្ឌវប្បធម៌ និងធម្មជាតិដែលមកពីទ្វីបទាំង ៥ នៃពិភពលោកទាំងមូល តំណាងឲ្យវប្បធម៌នៃបណ្តាប្រទេស ១៨៩ ដែលជារដ្ឋសមាជិកអនុសញ្ញាឆ្នាំ១៩៧២ ស្តីពីការការពារបេតិកភណ្ឌវប្បធម៌និងធម្មជាតិពិភពលោក ក្នុងចំណោមសមាជិកទាំង១៩៥ នៃអង្គការយូណេស្កូ។
សេចក្តីប្រកាស ក៏បានលើកឡើងថា នេះគឺជាអង្គពិធីជាសាកលមួយ ដែលប្រជាជាតិនៃពិភពលោកទាំងមូលជួបជុំគ្នា ដើម្បីពិភាក្សា និងផ្លាស់ប្តូរទស្សនៈ និងបទពិសោធន៍គ្នា សំដៅជំរុញការអភិរក្ស និងអភិវឌ្ឍន៍បេតិកភណ្ឌប្រកបដោយចេរភាព និងសម្តែងនូវការគោរពដល់បេតិកភណ្ឌរបស់មនុស្សជាតិ៕ S