ថ្ងៃទី 6 កក្កដា 2012
ដោយ: សុខ ភក្តី
CEN
ភ្នំពេញ: មន្ត្រីជាន់ខ្ពស់រដ្ឋាភិបាល បានឲ្យដឹងថា ថ្ងៃរម្លឹកខួប ៤ ឆ្នាំ នៃការចុះបញ្ជីប្រាសាទព្រះវិហារ ជាសម្បត្តិបេតិកភណ្ឌពិភពលោក ថ្ងៃ៧កក្កដា ឆ្នាំ២០០៨-ថ្ងៃ៧កក្កដា ឆ្នាំ២០១២ ឆ្នាំនេះ រដ្ឋាភិបាល នឹងមិនរៀបចំពិធីរម្លឹកខួបអ្វីទេ។ មូលហេតុ មកពីមន្ត្រីរដ្ឋាភិបាលជាប់រវល់រៀបចំកិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធជាច្រើនទៀត។
លោក ផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្ត្រី បានឲ្យដឹងថា “យើងកំពុងតែរវល់គ្រប់ជ្រុង។ រាជរដ្ឋាភិបាល គឺរវល់ជាមួយនឹងការប្រជុំរដ្ឋមន្ត្រីការបរទេសអាស៊ាន។ ចំណែកអ្នកដែលពាក់ព័ន្ធរឿងវិស័យបេតិកភណ្ឌ រវល់នៅក្រៅប្រទេសមួយចំនួន។ ម្លោះហើយ យើងទាំងអស់គ្នា កំពុងតែរវល់។ ដូច្នេះរាជរដ្ឋាភិបាល មិនបានត្រៀមលក្ខណៈធ្វើអ្វីធំដុំនៅឡើយទេ”។
កាលពីថ្ងៃទី១៣មិថុនា ឆ្នាំ២០១២ លោក ជុច ភឿន រដ្ឋលេខាធិការក្រសួងវប្បធម៌ និងវិចិត្រសិល្បៈ និងជាប្រធានអាជ្ញាធរជាតិព្រះវិហារ បានមានប្រសាសន៍ថា រដ្ឋាភិបាលមានគម្រោងនឹងជួបជុំប្រារព្ធពិធីសាទរទ្រង់ទ្រាយធំ ដូចរៀងរាល់ឆ្នាំ នៅថ្ងៃ៧កក្កដា ដែលឆ្នាំនេះ ជាខួបលើកទី៤ នៃការដាក់បញ្ចូលប្រាសាទព្រះវិហារ ទៅក្នុងបញ្ជីបេតិកភណ្ឌពិភពលោក។ យើងធ្វើរូបភាពធំ ដូចរៀងរាល់ឆ្នាំ នៅសារមន្ទីរតេជោ នៅសាអែម ជើងភ្នំប្រាសាទព្រះវិហារ ក្រោមអធិបតីភាពរបស់លោកឧបនាយករដ្ឋមន្ត្រី សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ដែលជាអ្នកទៅចុះបញ្ជីប្រាសាទព្រះវិហារ ទៅក្នុងបញ្ជីបេតិកភណ្ឌពិភពលោក។
យ៉ាងណាក៏ដោយ មូលនិធិកេរតំណែលខ្មែរ ដែលមានលោកខៀវកាញារីទ្ធ រដ្ឋមន្ត្រីក្រសួងព័ត៌មាន និងជាអ្នកនាំពាក្យរដ្ឋាភិបាល ជាប្រធានកិត្តិយសមូលនិធិនេះ នឹងជួបប្រជុំ នាព្រឹកថ្ងៃទី៧ ខែកក្កដា ឆ្នាំ២០១២ ដើម្បីលើកឡើងពីខួប ៤ ឆ្នាំ នៃការចុះបញ្ជីប្រាសាទព្រះវិហារ ចូលក្នុងសម្បត្តិបេតិកភណ្ឌពិភពលោក៕