ដោយ សេក បណ្ឌិត
2012-07-26
វិទ្យុអាស៊ីសេរី
សាលាដំបូងខេត្តកោះកុង កោះហៅតំណាងប្រជាពលរដ្ឋ ៣ភូមិ នៅឃុំជីខលើ ស្រុកស្រែអំបិល ខេត្តកោះកុង និងសាក្សីមួយចំនួនទៀត មកចូលរួមសវនាការនៅថ្ងៃទី២៦ កក្កដា ពាក់ព័ន្ធបណ្ដឹងប្រជាពលរដ្ឋដែលប្ដឹងសុំមោឃភាពលើគម្រោងផ្ដល់ដីសម្បទានសេដ្ឋកិច្ច ដែលស្នើដោយលោកឧកញ៉ា លី យ៉ុងផាត់។
ប្រជាពលរដ្ឋតវ៉ាចំពោះការពន្យារពេលសវនាការរឿងទំនាស់ដី នៅខាងមុខសាលាដំបូងខេត្តកោះកុង កាលពីថ្ងៃទី២៦ កក្កដា ឆ្នាំ២០១២។
Photo: Adhoc
ស្របពេលគ្នានោះ មានអ្នកភូមិដែលកំពុងមានជម្លោះដីធ្លីប្រមាណជាង ២០០នាក់ បានធ្វើដំណើរមកជាមួយ ដើម្បីគាំទ្រតំណាងរបស់គាត់ និងចង់ដឹងពីលទ្ធផលនៃសវនាការ។ ប៉ុន្តែសវនាការនោះមិនអាចដំណើរការបាននោះទេ ហើយត្រូវលើកពេលទៅថ្ងៃក្រោយទៀត។
អ្នកភូមិជីខ ភូមិត្រពាំងកណ្តោល និងភូមិឈូក នៅឃុំជីខលើ ប្រតិកម្មចំពោះការលើកពេលសវនាការរបស់តុលាការ ខេត្តកោះកុង ថាជាចេតនាមិនចង់ដោះស្រាយបញ្ហាជម្លោះដីធ្លីរវាងអ្នកភូមិជាមួយនឹងក្រុមហ៊ុនរបស់លោក លី យ៉ុងផាត់។
ប្រជាពលរដ្ឋបានដាក់ពាក្យបណ្ដឹងនេះតាំងពីឆ្នាំ២០០៧ មក ប៉ុន្តែតុលាការពុំដែលបានកាត់សេចក្តីរកយុត្តិធម៌ជូនប្រជាពលរដ្ឋនោះឡើយ។
ស្ត្រីអ្នកភូមិម្នាក់ឈ្មោះ យន់ ជិ អាយុប្រមាណជាង ៤០ឆ្នាំ មានប្រសាសន៍ទាំងអួលដើមកថា ពលរដ្ឋក្រីក្រព្យាយាមគោរពច្បាប់ ខំធ្វើដំណើរមកពីផ្ទះតាមដីកាកោះរបស់តុលាការទាំងលំបាក ខ្វះលុយកាក់ ទម្រាំមកដល់តុលាការខេត្ត ប៉ុន្តែពេលមក បែរជាតុលាការប្រកាសលើកពេលមិនប្រាប់មុន ដោយសំអាងលើហេតុផលផ្សេងៗ។
លោកស្រី យន់ ជិ៖ «ហេតុអីបានកោះហៅខ្ញុំឲ្យមក ខាងក្រុមហ៊ុនអត់មក មានតែលោកកុហកខ្ញុំ? ឥឡូវខ្ញុំអត់សុខចិត្តទេ ត្រូវតែហៅក្រុមហ៊ុនឲ្យមកដោះស្រាយឲ្យពួកខ្ញុំសុខចិត្តទៅ។ ពួកខ្ញុំណាសុខចិត្តងើបដាំបាយតាំងពីមាន់រងាវ ហូបពីព្រឹករហូតដល់ល្ងាចបាយផ្អូមក៏ហូបដែរ»។
វិទ្យុអាស៊ីសេរីពុំទាន់អាចទាក់ទងមន្ត្រីតុលាការខេត្តកោះកុង បានទេ នៅរសៀលថ្ងៃព្រហស្បតិ៍ ទី២៦ កក្កដា ដើម្បីសុំការបញ្ជាក់ពីហេតុផលនៃការលើកពេលនេះ។ ប៉ុន្តែតំណាងប្រជាពលរដ្ឋបានមានប្រសាសន៍ថា មន្ត្រីតុលាការបានប្រាប់ពួកគាត់ថា ការផ្អាកនេះដោយសារអវត្តមានរបស់មេធាវីខាងភាគីក្រុមហ៊ុន។
មន្ត្រីសិទ្ធិមនុស្សនៃអង្គការលីកាដូ ប្រចាំខេត្តកោះកុង លោក អ៊ិន គង់ជិត មានប្រសាសន៍ថា នេះជាចេតនារបស់មន្ត្រីតុលាការដែលពុំមានឆន្ទៈក្នុងការបញ្ចប់រឿងក្តីនេះ៖ «វាអាចជាហេតុផលរបស់តុលាការ ពីព្រោះតុលាការមើលឃើញថា រឿងក្តីរបស់ប្រជាពលរដ្ឋនេះអាចមានប្រៀបឈ្នះលើភាគីម្ខាងទៀត អ៊ីចឹងគាត់រកវិធីយ៉ាងម៉េចមិនឲ្យប្រជាពលរដ្ឋបានទទួលផលប្រយោជន៍ពីរឿងក្តីរបស់ពួកគាត់»។
លោកបន្តថា ពេលនេះសមល្មមសម្រាប់តុលាការដែលត្រូវបញ្ចប់រឿងក្តីនេះហើយ ពីព្រោះការលើកពេលសវនាការនេះបានធ្វើឡើងជាច្រើនដងមកហើយ ហើយក្នុងរយៈពេលប្រមាណមួយឆ្នាំចុងក្រោយនេះ តុលាការបានសម្រេចលើកពេលពី ៣ ទៅ ៤ដងមកហើយ។ ចំពោះការបាត់បង់ដីធ្លី និងជម្លោះក្នុងរឿងនេះចេះតែបន្លាយពេលយូរទៅៗ ធ្វើឲ្យបាត់បង់ពេលវេលាធ្វើស្រែចំការ និងខាតបង់ប្រាក់កាសជាច្រើនរបស់ពលរដ្ឋ។
លោក អ៊ិន គង់ជិត៖ «វាធ្វើឲ្យប៉ះពាល់ដល់ភាពក្រខ្សត់របស់ពួកគាត់ ធ្វើឲ្យជីវភាពរបស់គាត់កាន់តែក្រខ្សត់ទៅៗ អ៊ីចឹងយើងស្នើឲ្យតុលាការកុំឲ្យចេះតែលើកពេលតទៅទៀត»។
ក្រសួងកសិកម្មរុក្ខាប្រមាញ់ និងនេសាទបានធ្វើកិច្ចសន្យាផ្ដល់ដីសម្បទានសេដ្ឋកិច្ចឲ្យក្រុមហ៊ុនពីរ កាលពីខែកក្កដា ឆ្នាំ២០០៦។ ក្រុមហ៊ុនទី១ កោះកុង ស៊ូហ្គើ (Koh Kong Sugar) បានទទួលដីទំហំ ៩.៧០០ហិកតារ និងក្រុមហ៊ុនមួយទៀតឈ្មោះ កោះកុង ផ្លេនថេស៊ិន (Koh Kong Plantation) បានទទួលដីទំហំ ៩.៤០០ហិកតារ។ ប៉ុន្តែអ្នកដែលសុំដីសម្រាប់ក្រុមហ៊ុនទាំងពីរនោះ មានឈ្មោះអ្នកទទួលខុសត្រូវតែមួយ គឺលោកឧកញ៉ា លី យ៉ុងផាត់។
ករណីនេះខុសនឹងមាត្រា ៥៩ នៃច្បាប់ភូមិបាល ដែលបានកំណត់ត្រឹមតែមួយម៉ឺនហិកតារសម្រាប់ដីសម្បទានទៅបុគ្គលម្នាក់។ ជាងនេះទៅទៀតការផ្ដល់ដីនោះប៉ះលើដីស្រែចំការ និងភូមិរបស់ប្រជាពលរដ្ឋរស់នៅជាច្រើនឆ្នាំមកហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អ្នកមានលុយមានអំណាច ធ្វើអ្វីមិនចេះខុសនោះទេ