ភ្នំពេញ: ប្រធានអង្គការយូនីសេហ្វថ្មីប្រចាំនៅព្រះរាជាណាចក្រកម្ពុជា លោកស្រី រ៉ាណា ផ្លាវ័រ កាលពីថ្ងៃទី១៣ ខែសីហាឆ្នាំ២០១២ បានប្រគល់លិខិតតែងតាំង និងទទួលស្គាល់លោកស្រីជាផ្លូវការ ជូនលោក អ៊ុច បូររិទ្ធិ រដ្ឋលេខាធិការ នៃក្រសួងការបរទេស និងសហប្រតិបត្តិការអន្តរជាតិ។ នេះបើយោងតាមសេចក្ដីប្រកាសព័ត៌មានរបស់អង្គការយូនីសេហ្វប្រចាំនៅកម្ពុជា កាលពីថ្ងៃទី១៣ ខែសីហា ឆ្នាំ២០១២។
ថ្ងៃទី 14 សីហា 2012
ដោយ: លីនណា
CEN
លោក អ៊ុច បូររិទ្ធិ រដ្ឋលេខាធិការ នៃក្រសួងការបរទេស និងសហប្រតិបត្តិការអន្តរជាតិ និងលោកស្រី រ៉ាណា ផ្លាវ័រ ប្រធានអង្គការយូនីសេហ្វថ្មីប្រចាំនៅព្រះរាជាណាចក្រកម្ពុជា
ភ្នំពេញ: ប្រធានអង្គការយូនីសេហ្វថ្មីប្រចាំនៅព្រះរាជាណាចក្រកម្ពុជា លោកស្រី រ៉ាណា ផ្លាវ័រ កាលពីថ្ងៃទី១៣ ខែសីហាឆ្នាំ២០១២ បានប្រគល់លិខិតតែងតាំង និងទទួលស្គាល់លោកស្រីជាផ្លូវការ ជូនលោក អ៊ុច បូររិទ្ធិ រដ្ឋលេខាធិការ នៃក្រសួងការបរទេស និងសហប្រតិបត្តិការអន្តរជាតិ។ នេះបើយោងតាមសេចក្ដីប្រកាសព័ត៌មានរបស់អង្គការយូនីសេហ្វប្រចាំនៅកម្ពុជា កាលពីថ្ងៃទី១៣ ខែសីហា ឆ្នាំ២០១២។
សេចក្ដីប្រកាសព័ត៌មានបានលើកឡើងថា ក្នុងនាមរាជរដ្ឋាភិបាលកម្ពុជាលោក អ៊ុច បូររិទ្ធិ បានទទួលស្គាល់ពីទំនាក់ទំនង់ដ៏ជិតស្និទ្ធ និងជាយូរមកហើយរវាងអង្គការយូនីសេហ្វ និងរដ្ឋាភិបាល។
លោករដ្ឋលេខាធិការបានមានប្រសាសន៍ថា អង្គការយូនីសេហ្វ ជាដៃគូដ៏មានទំនុកចិត្តបំផុត ដោយបានឆ្លងកាត់តាំងពីសម័យកាលដ៏លំបាកលំបិន រហូតដល់បច្ចប្បន្នកាល។
បន្ទាប់ពីជំនួបនោះមក លោកស្រី រ៉ាណា ផ្លាវ័រ បានមានប្រសាសន៍ថា “ខ្ញុំមានសេចក្តីរីករាយណាស់ ដែលមានឱកាសនេះដើម្បីបម្រើស្ត្រី និងកុមារកម្ពុជា និងអនុវត្តន៍ការងារដើម្បីបំពេញសិទ្ធិនានារបស់ពួកគេ។ ដោយឡែក គឺខ្ញុំរំពឹងថា នឹងបន្តកិច្ចប្រតិបត្តិការ និងកិច្ចសហប្រតិបត្តិការយ៉ាងជិតស្និទ្ធរបស់អង្គការយូនីសេហ្វ ជាមួយរាជរដ្ឋាភិបាលកម្ពុជា និងបណ្តាដៃគូនានាដទៃទៀត ដោយកសាងលើផលជោគជ័យនានា សំដៅកាត់បន្ថយអត្រាមរណភាពកុមារ និងស្ត្រីជាមាតា ព្រមទាំងលើកកម្ពស់លទ្ធភាពដល់មនុស្សគ្រប់រូបឲ្យទទួលបានការអប់រំសម្រាប់ទាំងអស់គ្នា”។
លោកស្រី ផ្លាវ័រ បានកត់សម្គាល់ថា “សមិទ្ធផលគួរឲ្យចាប់អារម្មណ៍របស់កម្ពុជា មកទល់នឹងសព្វថ្ងៃនេះ លើគោលដៅអភិវឌ្ឍន៍សហស្សវត្សរ៍ និងតួលេខកើនឡើងរបស់ជាតិ គឺជាការបង្ហាញមួយឲ្យឃើញនូវការប្តេជ្ញាចិត្តដ៏ខ្លាំងក្លារបស់រាជរដ្ឋាភិបាល កំណើនវិនិយោគ និងភាពម្ចាស់ការរបស់រាជរដ្ឋាភិបាលសម្រាប់កិច្ចអភិវឌ្ឍន៍ អាចសម្រេចបានជាមួយនឹងកិច្ចសហការរបស់ដៃគូ”។
លោកស្រីផ្លាវ័របានមានប្រសាសន៍ថា “កិច្ចគាំទ្រដែលកំពុងប្រព្រឹត្តប្រកបដោយវឌ្ឍនៈភាព លើការអនុវត្តអនុសញ្ញា ស្តីពីសិទិ្ធកុមារ នឹងនៅតែជាអាទិភាពមួយដដែល” ហើយលោកស្រីបានមានប្រសាសន៍បន្ថែមទៀតថា “ខ្លួនខ្ញុំផ្ទាល់ ក៏ដូចជាអង្គការយូនីសេហ្វដែលជាដៃគូមួយដ៏ខ្លាំងក្លានិងស្វាហាប់នឹងខិតខំប្រឹងប្រែងជួយគាំទ្ររាជរដ្ឋាភិបាលបង្កើនលទ្ធភាព និងគុណភាពសេវាកម្មនៅថ្នាក់ក្រោមជាតិ ការពារកុមារពីជំងឺនានា តាមរយៈការធើ្វឲប្រសើរឡើងផ្នែកអាហារូបត្ថម្ភ និងអនាម័យ ព្រមទាំងរក្សាកុមារឲ្យមានសុវត្ថិភាពនៅជាមួយក្រុមគ្រួសារពួកគេ ដើម្បីចៀសឲ្យផុតពីការទៅរស់នៅតាមមណ្ឌលនានា”។
មុនពេលមកកាន់មុខតំណែងជាប្រធាននៅទីនេះ លោកស្រី ផ្លាវ័រ ធ្លាប់បានកាន់មុខតំណែងជាប្រធានអង្គការយូនីសេហ្វ ប្រចាំនៅប្រទេសម៉ុងហ្គោលី (ពីខែសីហាឆ្នាំ ២០០៩ មកដល់ខែមិថុនាឆ្នាំ ២០១២)។នៅទីនោះ ក្រោមការដឹកនាំរបស់លោកស្រី កុមារ និងស្ត្រីម៉ុងហ្គោលី បានទទួលការគាំទ្រសង្គ្រោះអាយុជីវិតក្នុងរដូវរងាត្រជាក់បំផុតមួយកន្លងមកកាលពីឆ្នាំ ២០០៩ និងឆ្នាំ២០១០ ជារដូវរងាត្រជាក់បំផុតដែលធ្លាប់កើតមានរួចមកហើយកាលពី ៥០ ឆ្នាំមុន និង តំបន់ដាច់ស្រយាលទទួលបានសេវាសុខភាពសារវន្ត តាមរយៈយុទ្ធសាស្ត្រ “ចុះទៅដល់គ្រប់ស្រុក” ឬហៅកាត់ថា “រ៉េដ”។ យុទ្ធសាស្ត្រនេះត្រូវបានវាយតម្លៃថាជាជោគជ័យមួយក្នុងការលុបបំបាត់ឧបសគ្គដែលរារាំងការផ្តល់សេវាកម្ម តាមរយៈ អង្គភាពសុខភាពស្រុកដែលបានទទួលការបណ្តុះបណ្តាល។
ក្នុងនាមជាប្រធានអង្គការយូនីសេហ្វប្រចាំនៅប្រទេស ប៊ែលីស្ស នៅអាមេរិកកណ្តាល (ពីខែសីហាឆ្នាំ ២០០៥ មកដល់ខែ កក្កដាឆ្នាំ ២០០៩) លោកស្រី ផ្លាវ័រ ធ្លាប់បានអនុវត្តន៍ការងារជាច្រើនដោះស្រាយជាមួយការគំរាមកំហែងនានា ដែលរារាំងដល់ការសម្រេចគោលដៅអភិវឌ្ឍន៍សហស្សវត្សរ៍ រួមមានភាពក្រីក្ររបស់កុមារ និងបញ្ហានានាពាក់ព័ន្ធនឹងការរស់រាន គុណភាពនៃការអប់រំអន់ ស្ថានភាព (ប្រ៉េវ៉ាឡង់) ខ្ពស់នៃមេរោគអេដស៍ នៅអាមេរិកកណ្តាល កម្រិតអំពើហិង្សាខ្ពស់ និងភាពមិនអើពើយកចិត្តទុកដាក់លើមនុស្សវ័យក្មេងជាច្រើន។ ដោយមានការប្តេជ្ញាចិត្តចំពោះសិទិ្ធមនុស្ស និងចំពោះការសម្រេចបានលទ្ធផលច្បាស់លាស់ពិតប្រាកដសម្រាប់ស្ត្រី និងកុមារ គឺលោកស្រី ផ្លាវ័រ បានអនុវត្តន៍ជំនាញនិងភាពប៉ិនប្រសប់របស់ខ្លួនកៀរគរថវិកាញ៉ាំងឲ្យមានអភិក្រមមួយនៅអង្គការយូនីសេហ្វដែលគាំទ្រជាពិសេសដល់ប្រជា-ពលរដ្ឋដែលងាយរងគ្រោះបំផុត និងប្រជាពលរដ្ឋដែលគេមិនអើពើយកចិត្តទុកដាក់។
លោកស្រី ផ្លាវ័រ បានចាប់ផ្តើមចូលបម្រើការងារដំបូងជាមួយអង្គការយូនីសេហ្វនៅក្នុងឆ្នាំ ១៩៩៤ ក្នុងនាមជាទីប្រឹក្សា ជំនាញ និងបន្ទាប់មកបានចូលបម្រើការងារក្នុងអង្គភាពរៀបចំកសាងផែនការ វាយតម្លៃ និងប្រាស្រ័យទាក់ទងនៅទីក្រុងញ៉ូវយ៉ក និងនៅការិយាល័យអង្គការយូនីសេហ្វប្រចាំតំបន់ សម្រាប់អាមេរិកឡាទីន និងការីប៊ៀន។ លោកស្រីមានបទពិសោធន៍ការងាររយៈពេលជាង ១០ ឆ្នាំជាមួយអង្គការយូនីសេហ្វ លើវិស័យអភិវឌ្ឍន៍កុមារ និងសិទិ្ធនៅក្នុងប្រទេសអូស្ត្រាលី និងអង់គ្លេស ដែលក្នុងនោះរួមមានវិស័យនីតិកម្ម ការអនុវត្តគោលនយោបាយ និងការជំរុញលើកទឹកចិត្តវិនិយោគលើការងារថែទាំរបស់សហគមន៍ និងកិច្ចគាំទ្រដល់កុមារ និងមនុស្សវ័យជំទង់ ដែលពិការ និងដែលមានបញ្ហាប្រឈមផ្នែកអភិវឌ្ឍន៍លូតលាស់។
លោកស្រី ផ្លាវ័រ ជាពលរដ្ឋអូស្ត្រាលី និងមានបរិញ្ញាទោផ្នែកខាងគ្រប់គ្រងធុរកិច្ចពាណិជ្ជកម្ម បរិញ្ញាត្រីផ្នែកខាងការងារសង្គមកិច្ច (កម្រិតឧត្តម) និងបរិញ្ញាត្រីផ្នែកខាងមនុស្សសាស្ត្រ ជាមួយវិស័យចិត្តវិទ្យា និងអប់រំ ផងដែរ។ លោកស្រីបានរៀបអាពាហ៍ពិពាហ៍ និងមានបុត្រពីរនាក់៕ S