ស្ទឹងត្រែង: ប្រជាសហគមន៍អេកូទេសចរណ៍ឃុំព្រះរំកិល ស្រុកថាឡាបរិវ៉ាត់ បង្ហាញនូវក្តីបារម្ភយ៉ាងខ្លាំង ដោយពួកគាត់អះអាងថា ចំនួនសត្វផ្សោតនៅតំបន់នោះថយចុះ។ ប៉ុន្តែអាជ្ញាធរ និងក្រុមអភិរក្សខេត្តស្ទឹងត្រែងបញ្ជាក់ថា ចំនួនសត្វផ្សោតដ៏កម្រនេះ កើនឡើងគួរឱ្យកត់សម្គាល់ មិនដូចការលើកឡើងរបស់សហគមន៍នោះទេ។
ថ្ងៃទី 21 សីហា 2012
ដោយ: សេសាន
CEN
ភ្ញៀវទេសចរបរទេស ដែលបានចូលមកទស្សនា ដល់ខេត្តស្ទឹងត្រែង
លោក ផយ វណ្ណា អាយុ៤៥ឆ្នាំ ជាអ្នកបើកទូកជូនភ្ញៀវទេសចរនៅភូមិអន្លង់ស្វាយ ឃុំព្រះរំកិល ស្រុកថាឡាបរិវ៉ាត់ បាននិយាយឱ្យដឹងថា លោកក៏បារម្ភខ្លាំងណាស់ដែរ ចំពោះសត្វផ្សោតថយចុះ។ ព្រោះពីមុនបរិមាណរបស់វាមាន១៥ក្បាល ហើយបានថយចុះមកត្រឹមប្រាំបីក្បាលប៉ុណ្ណោះក្នុងឆ្នាំ ២០១២ នៃអន្លង់មួយនេះ។
លោក ផយ វណ្ណា បញ្ជាក់ទៀតថា មូលហេតុដែលនាំឱ្យថយចុះនៃសត្វផ្សោតទាំងនេះ ដោយសារក្នុងសហគមន៍មានបទល្មើសខុសច្បាប់កើនឡើង។ បទល្មើសទាំងនោះ រួមមាន ឆក់ត្រី គប់គ្រាប់បែក បំពុលដោយជាតិគីមី និងដាក់មងក្បែរកន្លែងតំបន់អភិរក្ស។ ម្យ៉ាងទៀតក្នុងរដូវប្រាំង អាកាសធាតុប្រែប្រួល កើនកម្តៅ ធ្វើឱ្យផ្ទៃទឹកដុះស្លែថ្ម និងចរន្តទឹកខុសពីធម្មតា ក៏ជាឧបសគ្គដល់ការរស់នៅរបស់ផ្សោតទាំងនោះដែរ។
.jpg "សហគមន៍អេកូទេសចរណ៍ឃុំព្រះរំកិល ស្រុកថាឡាបរិវ៉ាត់ បារម្ភពីសត្វផ្សោតថយចុះ នាំឱ្យបាត់ភ្ញៀវចូលទស្សនា")
លោកផយវណ្ណាបញ្ជាក់ថា លោកក៏មានតួនាទីជាអនុប្រធានសហគមន៍នេសាទនៅភូមិអន្លង់ស្វាយ ឃុំព្រះរំកិលហ្នឹងដែរ។ រាល់ការប្រជុំជាមួយក្រុមប្រឹក្សាឃុំម្តងៗ កន្លងមក រូបលោកតែងតែលើកឡើងអំពីបទល្មើសនេសាទខុសច្បាប់។ ប៉ុន្តែគ្មានអ្នកចាប់អារម្មណ៍ចំពោះការលើកឡើង ឬ ក៏ទប់ស្កាត់បទល្មើសទាំងនោះទេ។ លោកបញ្ជាក់ថា ពេលខ្លះអ្នកប្រព្រឹត្តបទល្មើសនោះក៏មានពាក់ឯកសណ្ឋានជាសមត្ថកិច្ច ទៅទៀត គឺថាពិបាកនឹងទប់ស្កាត់បទល្មើសណាស់។
.jpg "សហគមន៍អេកូទេសចរណ៍ឃុំព្រះរំកិល ស្រុកថាឡាបរិវ៉ាត់ បារម្ភពីសត្វផ្សោតថយចុះ នាំឱ្យបាត់ភ្ញៀវចូលទស្សនា")
គួរបញ្ជាក់ឱ្យដឹងផងដែរថា សត្វផ្សោតទឹកសាបត្រូវបានគេចាត់ទុកជាសត្វដ៏កម្រលើលោក មានតែប្រទេសបីទៅបួនប៉ុណ្ណោះក្នុងតំបន់ទឹកសាប។ ដូច្នេះការបារម្ភរបស់សហគមន៍ ខ្លាចវាបាត់បង់ គឺជាបញ្ហារមួយ។ យោងតាមការសិក្សាមួយទៀតក៏បារម្ភថាប្រសិនជាប្រទេសឡាវ ពិតជាសាងសង់ទំនប់សាយ៉ាបូរី នៅផ្នែកខាងលើនៃដងទន្លេមេគង្គមែននោះ វាអាចនឹងប៉ះពាល់ជីវចម្រុះដល់ប្រទេសកម្ពុជា ដែលស្ថិតនៅតំបន់ទន្លេមេគង្គក្រោម។ ក្នុងនោះក៏ប៉ះពាល់ទៅលើសត្វផ្សោតផងដែរ។
.jpg "សហគមន៍អេកូទេសចរណ៍ឃុំព្រះរំកិល ស្រុកថាឡាបរិវ៉ាត់ បារម្ភពីសត្វផ្សោតថយចុះ នាំឱ្យបាត់ភ្ញៀវចូលទស្សនា")
លោក យាន យុទ្ធី ប្រធានសាខាអភិរក្សសត្វផ្សោតខេត្តស្ទឹងត្រែង បាននិយាយឱ្យដឹងថា ចំនួនសត្វផ្សោតមានប្រហែល ៨០ក្បាល រស់នៅក្នុងខេត្តស្ទឹងត្រែង ចាប់តាំងពីឆ្នាំ២០០៦ មកដល់ឆ្នាំ២០១២។ ក្នុងនោះវារស់នៅតាមអន្លង់ជ្រៅៗទាំងបួនរួមមាន អន្លង់ឈើទាល (អន្លង់ស្វាយ) ឃុំព្រះរំកិល ស្រុកថាឡាបរិវ៉ាត់ព្រំដែនឡាវ។កោះសំពាយ កោះកូនសត្វ និងអន្លង់ត្បូងខ្លា កោះជ្រឹម ស្រុកសៀមបូក ព្រំប្រទល់ ខេត្តស្ទឹងត្រែង ជាប់ស្រុកសម្បូណ៌ខេត្តក្រចេះ។
លោក យាន យុទ្ធី បញ្ជាក់ថា ឆ្នាំ២០១២នេះសត្វផ្សោតកើតកូនបានបួនក្បាល បន្ថែមទៀតហើយ។ មូលហេតុដែលនាំឱ្យបរិមាណផ្សោតចេះតែកើនឡើងបែបនេះ ដោយសារមានការអភិរក្ស និងហាមឃាត់មិនឱ្យអ្នកនេសាទទៅដាក់មង នៅកន្លែងរបស់វា។ មងគឺជាបញ្ហារសំខាន់ណាស់នាំឱ្យសត្វផ្សោតងាប់ ងាយផុតពូជបំផុត។
លោក ម៉ៅ ធនិន អភិបាលរងខេត្តស្ទឹងត្រែង បញ្ជាក់ថា សត្វផ្សោតមានការកើនឡើងដោយសារអាជ្ញាធរបង្កើនការទប់ស្កាត់បទល្មើសនេសាទ។ ណាមួយទៀតត្រីក្នុងឆ្នាំ២០១២ មានបរិមាណច្រើនគឺជាប្រភពចំណីរបស់សត្វផ្សោតទាំងនោះរស់បន្តពូជតទៅទៀត។គោលដៅទៅមុខអាជ្ញាធរនឹងខិតខំថែរក្សាការពារបង្កើតតំបន់អភិរក្សនោះដើម្បីទាក់ទាញភ្ញៀវទេសចរឱ្យចាប់អារម្មណ៍ចូលមកទស្សនាកាន់តែច្រើន។កាលណាមានភ្ញៀវមកលេងច្រើន ធ្វើឱ្យប្រាក់ចំណូលក៏កើនឡើង។ ជីវភាពប្រជាពលរដ្ឋក្នុងសហគមន៍ក៏ផ្លាស់ប្តូរដែរ។
លោក ផយ វណ្ណា អ្នកបើកទូកជូនភ្ញៀវទេសចរនិយាយអះអាងថា ចំនួនភ្ញៀវទេសចរបរទេសបានចាប់អារម្មណ៍ខ្លាំងក្នុងការចូលទស្សនាសត្វផ្សោត នៅអន្លង់ស្វាយ។ ភ្ញៀវបរទេសទាំងនោះភាគច្រើនជិះទូកមកពីដីឡាវមើលផ្សោតផុសក្នុងដីខ្មែរ រួចវិលត្រឡប់ទៅស្នាក់នៅប្រទេសឡាវវិញ។ បញ្ហាមួយនេះធ្វើឱ្យខ្មែរយើងបាត់ប្រាក់ចំណូលមួយយ៉ាងធំ។
អ្នកភូមិឯទៀតបានរិះគន់អាជ្ញាធរឃុំព្រះរំកិលថា ផ្លូវក្នុងសហគមន៍ខូចខ្លាំង បែកភក់ ក្លាយជាថ្លុកក្របីដេក គ្មានអ្នកជួសជុល…អ៊ីចឹងហើយបានជាគ្មានភ្ញៀវចូលមកលេង ឬ ក៏ស្នាក់នៅ។ ឃុំព្រះរំកិល មានភូមិចំនួន៤។ កន្លងមកក្នុងភូមិតែមួយមានប្រជាពលរដ្ឋ ប្រមាណជាង១០០គ្រួសារ បាននាំគ្នាប្រមូលលុយក្នុងមួយគ្រួសារ ១៥.០០០រៀល ឱ្យទៅឃុំជីកដីធ្វើផ្លូវនោះ។ បន្ទាប់ពីធ្វើផ្លូវរួចមក ចូលដល់រដូវធ្លាក់ភ្លៀង រថយន្តអ្នកភូមិ បើកកាត់ចុះឡើង ផ្លូវក៏ខូចឡើងវិញ។
អ្នកស្រីញូ រ៉ាវី ជាម្ចាស់ផ្ទះស្នាក់នៅរបស់សហគមន៍អេកូទេសចរណ៍ម្នាក់ក្នុងចំណោមផ្ទះទាំងអស់មាន១១កន្លែង បានបញ្ជាក់ថា ក្រោយពីមានខាងអង្គការម្លប់បៃតង ជួយជ្រោមជ្រែងចុះបង្ហាត់បង្រៀនពីរបៀបទាក់ទាញភ្ញៀវ។ពេលនោះភ្ញៀវបរទេស ទាំងភ្ញៀវខ្មែរ មកស្នាក់នៅផ្ទះគាត់មិនសូវលស់ថ្ងៃ។គាត់អាចចម្អិនមុខម្ហូបជូនភ្ញៀវតាមកុម្ម៉ង់បានមិនថាជាខ្មែរ ឬក៏បរទេសទេ។ ដោយឡែកការស្នាក់នៅផ្ទះអ្នកស្រីវិញ ក្នុងមួយយប់សម្រាប់មនុស្សម្នាក់មានតម្លៃស្មើ៣ដុល្លារ។
អ្នកស្រី ញូ រ៉ាវី បញ្ជាក់ថា រូបគាត់បានប្រាក់ចំណូលច្រើនពីលំហូរចូលភ្ញៀវទេសចរ មកលេងទឹកធ្លាក់សុភ័ក្រមិត្ត និងទស្សនាអន្លង់ផ្សោត ស្ថិតក្នុងភូមិ ឃុំ រួចហើយមក ស្នាក់នៅក្នុងផ្ទះរបស់គាត់៕ S