ភ្នំពេញៈ នៅ​ទីបំផុត​ប្រិយមិត្ត​នឹង​បាន​ឃើញ​មុខ​បេក្ខជន​ជម្រុះ​វគ្គ​ពាក់​កណ្ដាល​ ផ្ដាច់ព្រ័ត្រ​៥០​នាក់ ដែល​នឹង​បង្ហាញ​ខ្លួន​ក្នុង​ព្រឹត្តិការណ៍​រៀបចំ​ដោយ​ Hiruscar និង Cambodia Fashion Week។

បេក្ខជន បេក្ខនារីជាតិ និង​អន្តរជាតិ​ក្នុង​ចំណោម​៥០​នាក់ ដែល​ចូលរួម​ក្នុង​វគ្គ​ប្រកួត​ដើរម៉ូដពាក់កណ្ដាល​ផ្ដាច់​ព្រ័ត្រ​។

Thursday, 23 August 2012
ឈឹម ស្រីនាង
ភ្នំពេញ ប៉ុស្តិ៍

បេក្ខជន បេក្ខនារី​វគ្គ​ពាក់​កណ្ដាល​ផ្ដាច់ព្រ័ត្រ​នេះ​ត្រូវ​បាន​ជ្រើសរើស​ដោយ​ គណៈកម្មការ​រួម​មាន​អ្នក​អង្គ​ម្ចាស់ សោមា នរោត្តម តារា​ចម្រៀង ណុប បាយ៉ារិទ្ធិ និង​តារា​ចម្រៀង​ ឈិត សុវណ្ណបញ្ញា ជាដើម។

ម្ចាស់​ជ័យ​លាភី​ពី​ការ​ប្រកួត​នឹង​ទទួល​បាន​ប្រាក់​រង្វាន់​១០០០​ដុល្លារ​ពី Hiruscar និង​ផលិតផល​ថែរក្សា​សម្ផស្ស បំបាត់​សម្្លាក និង​កោសិកា​ខូច​ជា​ច្រើន​មុខ​ដែល​មាន​ប្រភព​ពី​ប្រទេស​ស្វ៊ីស។

ផលិតផល Hiruscar និង Cambodia Fashion Week ដែល​ជា​អ្នក​រៀបចំ​កម្មវិធី​នេះ បាន​ពាំនាំនូវ​វត្តមាន​តារា​ម៉ូដែល​ជាតិ និង​អន្តរជាតិ ក្នុង​គោល​បំណង​ផ្សារ​ភ្ជាប់​វិស័យ​ម៉ូដ​សម្លៀក​បំពាក់ និង​វិស័យ​សម្ផស្ស ក៏​ដូច​ជា​បើកទំព័រ​ប្រវត្តិសាស្ត្រ​ថ្មី​ជាមួយ​នឹង​ទស្សនៈ​ថា «តារា​ម៉ូដែល​ដែល​ស្រស់ស្អាត​ក៏​អាច​មាន​ស្នាម​សម្លាក​បាន​ដែរ»។ ការ​ជ្រើសរើស​តារា​ម៉ូដែល​លើក​នេះ​មិន​រឹត​បន្តឹង​ទៅ​លើ​ការ​មាន​សម្លាក​ ឬ​ក៏​អត់​នោះ​ទេ សំខាន់​ឲ្យ​តែ​ពួក​គេ​មាន​សមត្ថភាព។ បេក្ខជន បេក្ខនារី​​ជម្រុះ​វគ្គ​ផ្ដាច់​ព្រ័ត្រ​១០​នាក់​នឹង​មាន​ឱកាស​គ្រង​នូវ​ សម្លៀក​បំពាក់​ស្នាដៃ​ពី​អ្នក​រចនា​ម៉ូដ​ល្បីៗ និង​បាន​ដើរ​លើ​ឆាក​បង្ហាញ​ម៉ូដ Cambodia Fashion Week នៅ​ខែ​ធ្នូ​ខាង​មុខ​នេះ។ ទន្ទឹម​នឹង​នោះ អ្នក​ឈ្នះ​វគ្គ​ផ្ដាច់ព្រ័ត្រ​នឹង​ក្លាយ​ជា​តារា​ម៉ូដែល​ប្រចាំ​ផលិត​ផល Hiruscar។

នៅ​ថ្ងៃ​ទី​២៥ ខែ​សីហា​ខាង​មុខ​នេះ ប្រិយមិត្ត​អាច​ចូលរួម​ទស្សនា និង​ថត​រូប​ជាមួយ​តារា​ម៉ូដែល​សំណព្វ​របស់​ខ្លួន នៅ​រោង​កុន​លេជិន ស៊ីណេម៉ា។ ក្រៅពី​ការ​ដើរ​បង្ហាញ​ម៉ូដ​សម្លៀក​បំពាក់​ប្រណីតៗ នា​ថ្ងៃ​នោះ​ផង​ដែរ ក៏​មាន​កម្មវិធី​បង្ហាញ​ក្បាច់​រាំ​ដ៏​អស្ចារ្យ​ផង​ដែរ។

សម្រាប់​សំបុត្រ​ចូល​ទស្សនា​គឺ​មាន​លក់​នៅ​បណ្ដា​ឱសថ​ស្ថាន និង​ស្ដង់​តំណាង​លក់​ផលិតផល Hiruscar។ ប្រិយមិត្ត​ក៏​អាច​ជាវ​ជា​កញ្ចប់​តម្លៃ ១៥,៩៥​ដុល្លារ ជាមួយ​នឹង​សំបុត្រ​ចូល​ទស្សនា Cambodia Fashion Week ដែល​ជម្រើស​នេះ​ផ្ដល់​ជូន​តែ​នៅ​ហាង​អ៊ុត​សក់ Dollhouse និង Keokjay ប៊ូទិក​ប៉ុណ្ណោះ៕