ភ្នំពេញៈ វាមានការពិបាកដែរ ចំពោះជនបរទេសមកពីបស្ចិមប្រទេស ដែលចង់ស្វែងរកស្បែកជើងសម្រាប់តម្រូវជើងពួកគេពាក់ ព្រោះថា ភាគច្រើនវាមានទំហំតូចជាងជើងពួកគេ។
Monday, 27 August 2012
ភ្នំពេញ ប៉ុស្ដិ៍
ហាងលក់ និងកាត់ស្បែកជើង ស៊ីផល ដែលជាអាជីពប្រចាំត្រកូលនោះ កំពុងទទួលបានការពេញនិយមពីបរទេស។ រូបថត ភ្នំពេញ ប៉ុស្ដិ៍
តែឈប់បារម្ភទៅពួកគេអាចស្វែងរកកន្លែងហាងកាត់ស្បែកជើងមួយបាន នៅឯរាជធានីភ្នំពេញសម្រាប់កាត់ស្បែកជើង។
ហាងកាត់ស្បែកជើងនោះមានយីហោថា «ស៊ីផល ឬ Beautiful Sy Phal» ដែលមានអតិថិជនជាច្រើនបានចាប់អារម្មណ៍ទីនោះ។
ហាងនេះមានបើកជូននូវសេវាកម្មលក់ស្បែកជើងបុរសនិងស្រ្តីទៀតផង។ ហាង ស៊ីផល មានជាងកាត់ស្បែកជើងនិងដេរស្បែកជើងនេះចំនួនប្រហែលជា២០នាក់។
សមាជិកក្រុមគ្រួសារនេះបានបើករកស៊ីអស់រយៈពេលជាង៣០ឆ្នាំមក ហើយ បន្ទាប់ពីបានឆ្លងផុតពីរបបខ្មែរក្រហមមក។ ពួកគេមានជំនាញខាងស្បែកជើងនេះ ដោយបានយកស្បែកគោ ចៀម ក្រពើ និងជួនកាលស្បែកពស់ថ្លាន់មកធ្វើជាវត្ថុធាតុដើមសម្រាប់កាត់ជា ស្បែកជើង តម្រូវតាមទំហំ ម៉ូដ និងចំណង់ចំណូលចិត្តរបស់ភ្ញៀវ។ ចំពោះភ្ញៀវដែលមានបញ្ហាជើងមិនស្មើ ឬប្រអប់ជើងធំតូចជាងគ្នាបន្តិចនោះ ក៏ស្វែងរកសេវានេះដែរ។
លោក អាយ ស៊ីសុភាព ជាម្ចាស់ហាងបាននិយាយថា៖ «ហាងយើងមានបើកបម្រើតាំងពីមុនឆ្នាំ១៩៧០មកម្ល៉េះ។ តែយើងបានខកខានរកស៊ីនៅក្នុងសម័យកាលខ្មែរក្រហម។ លុះមកដល់ឆ្នាំ១៩៨០ យើងបានចាប់ផ្តើមបើកអាជីវកម្មនេះម្តងទៀត។ យើងក៏មិនចង់ផ្អាកការងាររកស៊ីទេ ព្រោះវាជាមុខរបរតពីដូនតាមក»។
គួរបញ្ជាក់ថា ហាងនេះ ទើបតែទទួលបាននូវប្រជាប្រិយភាពពីសំណាក់ភ្ញៀវបរទេសនៅឆ្នាំ១៩៩៧ ប៉ុណ្ណោះ នេះបើយោងតាមលោក អាយ ស៊ីសុភាព។
តែទោះជាយ៉ាងនេះក្តីហាងកាត់ស្បែកជើងនេះមានទីផ្សារក្នុងស្រុក ចង្អៀតនៅឡើយ ដោយគេពុំទាន់អាចបំពេញគ្រប់តម្រូវការបាន។
ហាង ស៊ីផល មានទីតាំងស្ថិតនៅផ្លូវ ២៧៣ ហើយបើយោងតាមលោក ស៊ីសុភាព អាជីវកម្មនៅហាងមានការមមាញឹកច្រើនជាពិសេសនៅចុងសប្តាហ៍។ គេសង្កេតឃើញភ្ញៀវមកជាវនៅទីនេះមានទាំងខ្មែរ និងបរទេស។
ម្ចាស់ហាងបន្តថា៖ «ភ្ញៀវរបស់យើងភាគច្រើនគឺជាជនបរទេស គឺមានប្រហែលជា៧០ភាគរយឯណោះ»។
លោកបន្តថា៖ «តែអតិថិជនក៏មានការផ្លាស់ប្តូរដែរនាពេលថ្មីៗនេះ ដោយយើងបានកត់សម្គាល់ឃើញថា ប្រជាជនកម្ពុជាដែលនិយមទិញស្បែកជើងនៅផ្សារនោះបានផ្លាស់ប្តូរ ឥរិយាបថជាបណ្តើរៗហើយដែរ ដោយពួកគេចាប់ផ្តើមមានទំនោរដូចជនបរទេសដែរ»។
ស្បែកជើងធ្វើពីស្បែកសត្វក្តី និងជ័រក្តី ភាគច្រើនយកមកពីប្រទេសថៃ ដែលអាចជ្រើសពណ៌ជាច្រើនផងដែរ។
ម្យ៉ាងទៀតអតិថិជនតែងតែនាំយកស្បែកជើងចាស់របស់ពួកគាត់មកធ្វើ ជាគំរូសម្រាប់ការមកកាត់នៅហាងរបស់យើង។ តែពេលខ្លះក៏យើងត្រូវធ្វើម៉ូដដោយខ្លួនឯងដែរ។ ចំពោះការកាត់ស្បែកជើងនេះអាចចំណាយពេលពី៣ ទៅ ៥ថ្ងៃទើបបាន។
ស្បែកជើងបុរសអាចកាត់ក្នុងតម្លៃ ៣០ដុល្លារ ខណៈស្បែកជើងនារីអាចជាវបានក្នុងតម្លៃចាប់ពី ១៧ ដុល្លារ ដល់២២ដុល្លារ។
លោក ស៊ី សុភាព បានបង្ហើបប្រាប់ថា៖ «ប្រសិនបើពួកគេចង់បានស្បែកជើងធ្វើពីស្បែកពស់ថ្លាន់ ឬស្បែកក្រពើវិញនោះ តម្លៃក៏កើនលើសពីស្បែកគោធម្មតាដែរ គឺចាប់ពីបី ទៅ បួនដងព្រោះវាជាស្បែកសត្វពិបាករក។ តែខ្ញុំគិតថាវាមានគុណភាពល្អដូចគ្នា»៕ PR