ខេត្តប៉លិន: ជំនន់ទឹកភ្លៀង បានឡើងគំរាមកំហែងលិចផ្ទះពលរដ្ឋចំនួន ៦៩ ខ្នង សម្ភារៈប្រើប្រាស់និងចម្ការដំណាំមួយចំនួន កាលពីព្រឹកថ្ងៃទី១៩ ខែកញ្ញា ឆ្នាំ២០១២ នៅក្នុងភូមិចំនួន៣ ក្នុងឃុំស្ទឹងត្រង់ ស្រុកសាលាក្រៅ ខេត្តប៉ៃលិន។ ទឹកជំនន់បានឡើងដោយសារមេឃធ្លាក់ភ្លៀងជាប់ៗគ្នារយៈពេលជាមួយសប្តាហ៍ កាលពីថ្ងៃទី១៣ ដល់ថ្ងៃទី១៩ ខែកញ្ញា ឆ្នាំ២០១២។ ប៉ុន្តែមិនបង្កឲ្យមានមនុស្សស្លាប់ ឬរបួសទេ។
ថ្ងៃទី 20 កញ្ញា 2012
ដោយ: មង្គល
CEN
ជំនន់ទឹកភ្លៀង នៅខេត្តប៉ៃលិន លិចផ្ទះ និងចម្ការដំណាំ នៅភូមិចំនួន៣
លោក កែវ រំដេត មេឃុំស្ទឹងត្រង់ បានឲ្យដឹងថា ប្រជាពលរដ្ឋដែលរងគ្រោះទឹកជំនន់លិចផ្ទះ ៦៩ គ្រួសារ ទាំង ៣ភូមិ គឺភូមិកូនដំរី ចំនួន ១៩គ្រួសារ ភូមិផ្ទះស្បូវ ចំនួន ៣៦គ្រួសារ និងភូមិព្រៃសន្ទះចំនួន ១៤គ្រួសារ។
លោកមេឃុំបានបន្តថា ក្នុងគ្រោះមហន្តរាយទឹកជំនន់នេះបណ្តាលឲ្យខូចខាត ទ្រព្យសម្បត្តិមួយចំនួន ដូចជា ស្រូវចំនួន ២.២០០ គីឡូក្រាម អង្ករចំនួន ៣០០ គីឡូក្រាម ចាន ឆ្នាំង ពាងទឹក ជ្រូក មាន់ទា សម្ភារៈប្រើប្រាស់មួយចំនួនអណ្តែតទៅតាមទឹក និងស្រែលិចអស់ ៤ហិកតា ដំណាំពោតមួយចំនួន។
លោក សំ សារ៉េត អភិបាលរងស្រុកសាលាក្រៅ បានឲ្យដឹងថា មេឃធ្លាក់ភ្លៀងជាប់គ្នា តាំងពីថ្ងៃទី១៣ រហូតដល់ថ្ងៃទី១៩ ខែកញ្ញា ឆ្នាំ២០១២ មិនទាន់រាំង។ ជំនន់ទឹកភ្លៀង បានឡើងគំរាមកំហែងលិចភូមិចំនួនបី ក្នុងស្រុកសាលាក្រៅ បណ្ដាលឲ្យលិចផ្ទះ ៦៩ខ្នង ស្មើនឹង ៦៩គ្រួសារ និងសម្ភារៈអណ្ដែតតាមទឹកអស់មួយចំនួន សត្វពាហនៈ ជ្រូកមាន់ទាបាត់បង់ខ្លះ។ ប៉ុន្តែមិនមានមនុស្សរងគ្រោះថ្នាក់ដល់ជីវិតទេ។
លោកបានបញ្ជាក់ថា ទឹកជំនន់មិនទាន់ឡើងដល់កម្រិតប្រកាសអាសន្នទេ។ ខេត្តប៉ៃលិន មានទីទួលសុវត្ថភាព សម្រាប់ជួយសង្គ្រោះបងប្អូនរងគ្រោះ ដោយទឹកជំនន់ ប៉ុន្តែអាជ្ញាធរកំពុងចុះពិនិត្យស្ថានភាពទឹកជំនន់ និងប្រជាពលរដ្ឋនៅក្នុងស្រុកសាលាក្រៅ ដើម្បីជួយប្រជាពលរដ្ឋឲ្យទាន់ពេលវេលា។
លោកបានផ្តាំផ្ញើដល់ប្រជាពលរដ្ឋ ត្រូវប្រុងប្រយ័ត្ន ក្នុងករណីដែលមានទឹកជំនន់ឡើងលឿនបែបនេះ សូមលោកមេភូមិ មេឃុំត្រូវយកចិត្តទុកដាក់ពីស្ថានភាពទឹកជំនន់ឡើងខ្ពស់ ហើយជម្លៀសជួយប្រជាពលរដ្ឋទៅរកទីទួលសុវត្ថភាព។
លោក នូ សុគន្ធ អនុប្រធានគណៈកម្មការអនុសាខាកាកបាទក្រហមស្រុកសាលាក្រៅ បានឲ្យដឹងថា បន្ទាន់ពីទទួលបានព័ត៌មាននេះ បានរាយការណ៍អំពីគ្រោះទឹកជំនន់ ទៅជូនលោកស្រី បាន ស្រីមុំ អ៊ី ឈាន ប្រធានសាខាកាកបាទក្រហមកម្ពុជាខេត្តប៉ៃលិនហើយ។
ក្រុមការងារថ្នាក់ខេត្តនិងស្រុកបានចុះមកពិន្យិជាក់ស្តែង មានប្រជាពលរដ្ឋចំនួន ៣៣គ្រួសារ ដែលលិចដល់រតផ្ទះ និងខ្លះលិចដល់ជញ្ជាំងផ្ទះ ទទួលរងការខូចខាតធ្ងន់ធ្ងរ។ ចំណែក ៣៦គ្រួសារទៀត គឺគ្រាន់តែលិចក្រោមផ្ទះ រងការខូចខាតស្រាលប៉ុណ្ណោះ។
លោកបានបញ្ជាក់ថា ក្រុមការងារបានស្រង់ទិន្ន័យនេះ រាយការណ៍ជូនលោកស្រី ប្រធានសាខារួចហើយ ដើម្បីនាំយកអំណោយទៅសង្គ្រោះបន្ទាន់ទៅចែកជូន ជួយដល់ពួកគាត់ ដែលទទួលរងគ្រោះធម្មជាតិទាំងអស់គ្នា៕ S
.jpg "ជំនន់ទឹកភ្លៀង នៅខេត្តប៉ៃលិន លិចផ្ទះ និងចម្ការដំណាំ នៅភូមិ៣")
.jpg "ជំនន់ទឹកភ្លៀង នៅខេត្តប៉ៃលិន លិចផ្ទះ និងចម្ការដំណាំ នៅភូមិ៣")
.jpg "ជំនន់ទឹកភ្លៀង នៅខេត្តប៉ៃលិន លិចផ្ទះ និងចម្ការដំណាំ នៅភូមិ៣")