ភ្នំពេញ: លោក សម រង្ស៊ី ខ្លួនឯង ចូលមកបំភ្លឺផ្ទាល់ ចំពោះក្រុមប្រឹក្សានៃគណៈមេធាវី នៃ ព្រះរាជាណាចក្រកម្ពុជា នៅថ្ងៃទី៩ ខែតុលា ឆ្នាំ២០១២ ទាក់ទងទៅនឹងដីកាស្ថាពររបស់សាលាឧទ្ធរណ៍ ចំពោះដីកាចូលជាស្ថាពរ បញ្ជាក់ពីនីតិសម្បទា របស់បុគ្គល (សម រង្ស៊ី ) មានទោស ជាទណ្ឌិត។
ថ្ងៃទី 8 តុលា 2012
ដោយ: រតនា
CEN
ពេលណាក្លាយខ្លួន ជាទណ្ឌិត មានទណ្ឌកម្មពីខាងគណៈមេធាវី ហើយទណ្ឌកម្ម ដែលត្រូវដាក់លើលោកសមរង្ស៊ីនោះ មិនទាន់ដឹងថា ក្រុមប្រឹក្សានៃគណៈមេធាវី នៃព្រះរាជាណាចក្រកម្ពុជា ត្រូវដាក់កំរិតណាទេ ពីព្រោះអាស្រ័យ ទៅលើការសម្រេចរបស់ក្រុមប្រឹក្សានៃគណៈមេធាវី ដែលជាឆន្ទះនៃការសម្រេចចិត្ត។
លោក ជីវ សុងហាក់ ប្រធាននៃគណៈមេធាវី នៃព្រះរាជាណាចក្រកម្ពុជា បានមានប្រសាសន៍តាមទូរស័ព្ទ នៅរសៀលថ្ងៃទី៨ ខែតុលា ឆ្នាំ២០១២ ថា លោក សម រង្ស៊ី មានសិទ្ធិ ប្រើមេធាវីរបស់គាត់ ចូលមកការពារ នៅចំពោះមុខក្រុមប្រឹក្សានៃគណៈមេធាវី នៃព្រះរាជាណាចក្រកម្ពុជា នៅថ្ងៃទី៩ ខៃតុលា ឆ្នាំ២០១២ បានហើយចំពោះការឆ្លើយដោះសារពីសំណាក់មេធាវី លោក សម រង្ស៊ី ចំពោះមុខក្រុមប្រឹក្សាគណៈមេធាវី គឺត្រូវស្ថិតនៅក្នុងការពិចារណា។
លោក ជីវ សុងហាក់ បានមានប្រសាសន៍បន្តថា៖ការសម្រេចចោទប្រកាន់ឬយ៉ាងចំពោះលោកសមរង្ស៊ី បន្ទាប់ពីមេធាវីឬគាត់ចូលធ្វើការ បំភ្លឺ ចំពោះក្រុមប្រឹក្សា គណៈមេធាវី ត្រូវមានសម្លេង៥០%បូក១ដែរ នៅក្នុងចំណោមសមាជិកក្រុមប្រឹក្សាគណៈមេធាវីចំនួន ២៧នាក់។
លោកបន្តថា៖ “នៅក្នុងច្បាប់បាននិយាយថាអ្នកដែលត្រូវតុលាការចោទប្រកាន់ត្រូវព្យួរឈ្មោះបណ្តោះអាសន្ន។ អីចឹងអស្រ័យទៅលើក្រុមប្រឹក្សា បើក្រុមប្រឹក្សាសម្រេចយ៉ាងណា យើងអនុវត្តតាមចឹង”។
លោក ជួង ជូងី ដែលធ្លាប់តែជាមេធាវីប្រចាំ របស់ លោក សម រង្ស៊ី បានមានប្រសាសន៍តាមទូរស័ព្ទ នៅរសៀល ថ្ងៃទី៨ ខែតុលានេះថា៖ លោកពុំត្រូវបានលោក សម រង្ស៊ី ឬគណបក្ស មកពឹងពាក់លោកជាផ្លូវការ ឲ្យធ្វើជាមេធាវីការពារក្តី ជូនលោក សម រង្ស៊ី ដើម្បីចូលទៅការពារ នៅចំពោះមុខក្រុមប្រឹក្សាគណៈមេធាវី នៅថ្ងៃទី៩ ខែតុលាឡើយ។
លោកមេធាវីបានបញ្ជាក់ “ខ្ញុំអត់បានទទួលការពឹងពាក់ទេ ខ្ញុំអត់ឃែ រឿងហ្នឹងផង”។
លោក យឹម សុវណ្ណ អ្នកនាំពាក្យ នៃគណបក្សសមរង្ស៊ី នៅរសៀល ថ្ងៃទី៨ ខែតុលានេះ មិនអាចទាក់ទងបានទេ។
លោក សម រង្ស៊ី មេធាវីមិនប្រកបវិជ្ជាជីវៈ អត្តលេខ១០៨ និងជាប្រធានគណបក្សសង្គ្រោះជាតិ ដែលឈ្មោះជាទណ្ឌិតនោះ ប្រឈមនឹងការលុបឈ្មោះ ចេញមេធាវី ចេញពីបញ្ជីសមាជិកគណៈមេធាវី នៃព្រះរាជាណាចក្រកម្ពុជា។
កាលពីថ្ងៃទី២១ ខែកញ្ញា ឆ្នាំ២០១២ ចុះហត្ថលេខាដោយលោក ជីវ សុងហាក់ ប្រធានគណៈមេធាវី នៃព្រះរាជាណាចក្រកម្ពុជា បានចេញលិខិតកោះលោកសមរង្ស៊ី ឲ្យចូលខ្លួនមកបំភ្លឺ ដោយផ្ទាល់ដល់ក្រុមប្រឹក្សា នៃគណៈមេធាវី នៃព្រះរាជាណាចក្រកម្ពុជា នៅថ្ងៃទី៩ ខែតុលា ឆ្នាំ២០១២។
សូមបញ្ជាក់ថា៖ ក្រុមប្រឹក្សានៃគណៈមេធាវីសម្រេចលុបឈ្មោះ លោក សម រង្ស៊ី ចេញពីសមាជិកគណៈមេធាវី នៃព្រះរាជាណាចក្រកម្ពុជា ដោយយោងតាមមាត្រា៥៩ នៃច្បាប់ស្តីពី លក្ខន្តិកៈមេធាវី និងយោងតាមមាត្រា៦ នៃក្រមសីលធម៌មេធាវី។
លោក សម រង្ស៊ី បច្ចុប្បន្នជាប្រធានគណបក្សសង្គ្រោះជាតិ ដែលឈ្មោះជាទណ្ឌិត តាមរយៈដីកាស្ថាពរ សាលាឧទ្ធរណ៍ ដែលតម្កល់ សាលក្រម របស់សាលាដំបូងខេត្តស្វាយរៀង កាលពីដើមឆ្នាំ២០០៩ ជាមួយគ្នានោះ សម្តេច ហេង សំរិន ប្រធានរដ្ឋសភាជាតិ បានសម្រេច លុបឈ្មោះ លោក សម រង្ស៊ី ចេញបញ្ជីឈ្មោះ សមាជិកសភា នីតិកាលទី៤ និងពីបញ្ជី អ្នកតំណាងរាស្ត្រ មណ្ឌលកំពង់ចាម ជាស្ថាពរផងដែរ។
មានឥស្សរជនយោបាយ នៅក្នុងប្រទេសកម្ពុជាមួយចំនួនដែលបានចុះបញ្ជី ជាសមាជិកនៃគណៈមេធាវី នៃ ព្រះរាជាណាចក្រកម្ពុជា ប៉ុន្តែមិនប្រកប វិជ្ជាជីវៈមេធាវី មានដូចជា សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី នៃប្រទេសកម្ពុជា មានអត្តលេខ ៣៥០.លោកឧបនាយករដ្ឋមន្ត្រី សុខ អាន អត្តលេខ៣៤៨. លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ អត្តលេខ៣៤៨. និង លោកយូ ហុកគ្រី អតីតសហរដ្ឋមន្ត្រីក្រសួង មហាផ្ទៃអត្តលេខ១១០៕