នៅព្រឹកថ្ងៃព្រហស្បតិ៍នេះ រដ្ឋសភា បានបើកកិច្ចប្រជុំ និងអនុម័តដោយឯកច្ឆ័ន្ទ លើសមាសភាព គ.ជ.ប. ដោយសំឡេងគាំទ្រ ៨៧ លើ ៨៧ សំឡេង។ សមាសភាព គ.ជ.ប. ចំនួន ៩ រូប ដែលរដ្ឋសភា បានប្រជុំបោះឆ្នោត អនុម័ត នៅព្រឹកមិញ មានការផ្លាស់ប្តូរសមាជិក ២ រូប តែបេក្ខភាពប្រធាន នៅតែជាលោក អ៊ឹម សួស្តី និងអនុប្រធាន គឺលោកស្រី ស៊ីន ជុំបូ ដូចអាណត្តិកន្លងមក។ សមាសភាពប្រធានដដែលនេះ នាំឲ្យគណបក្សប្រឆាំង សមរង្ស៊ី និងគណបក្សសិទ្ធិមនុស្ស បានធ្វើពហិការ មិនចូលរួមប្រជុំរដ្ឋសភា នៅព្រឹកមិញឡើយ។
ថ្ងៃ ព្រហស្បតិ៍ 11 តុលា 2012
ដោយ លី ម៉េងហួរ
RFI
សមាសភាព គ.ជ.ប. ត្រូវបានរដ្ឋសភាអនុម័ត ដោយគ្មានសំឡេងគណបក្សប្រឆាំង © លី ម៉េងហួរ
កិច្ចប្រជុំរដ្ឋសភា នៅព្រឹកថ្ងៃព្រហស្បតិ៍នេះ បានធ្វើឡើងក្រោមអធិបតីភាពរបស់លោក ហេង សំរិន ប្រធានរដ្ឋសភា និងមានសមាជិករដ្ឋសភា ៨៧ រូប ដែលមកពីគណបក្សប្រជាជនកម្ពុជា ហ្វ៊ុនស៊ិនប៉ិច និងគណបក្សជាតិនិយម ( អតីតគណបក្ស នរោត្តម រណឫទ្ធិ )។ ចំណែកសមាជិករដ្ឋសភាគណបក្សសមរង្ស៊ី និងគណបក្សសិទ្ធិមនុស្ស សរុបចំនួន ២៩ រូប បានធ្វើពហិការ មិនចូលរួមប្រជុំទេ ដោយសំអាងថា សមាសភាព គ.ជ.ប. មិនមានការផ្លាស់ប្តូរ ដែលនាំឲ្យគណបក្សប្រឆាំង នៅចោទប្រកាន់ថា គ.ជ.ប. មិនឯករាជ្យ និងមិនអព្យាក្រឹត្យ។
សមាសភាព គ.ជ.ប. ចំនួន ៩ រូប ដែលមានអាណត្តិ ៥ ឆ្នាំ និងត្រូវបានរដ្ឋសភា ប្រជុំបោះឆ្នោត អនុម័ត នៅព្រឹកមិញ គឺលោក អ៊ឹម សួស្តី នៅតែជាប្រធាន និងលោកស្រី ស៊ីន ជុំបូ ជាអនុប្រធាន ដូចអាណត្តិកន្លងមក។
ក្រោយកិច្ចប្រជុំរដ្ឋសភា លោក អ៊ឹម សួស្តី ដែលបានឡើងធ្វើជាប្រធាន គ.ជ.ប. ចំនួន ២ អាណត្តិ មកហើយ ចាប់តាំងពីការបោះឆ្នោតឆ្នាំ២០០៣ បានថ្លែងទៅកាន់ក្រុមអ្នកកាសែត ដោយលោកប្តេជ្ញា បំពេញការងាររៀបចំការបោះឆ្នោត ដោយឯករាជ្យ ស្របតាមច្បាប់កំណត់។ លោក អ៊ឹម សួស្តី ក៏បានបដិសេធ ចំពោះការលើកឡើងថា គ.ជ.ប. រៀបចំការបោះឆ្នោត ដោយមិនឯករាជ្យនោះ។
លោក អ៊ឹម សួស្តី៖"បញ្ហានេះ វាជារឿងដដែលៗទេ ពេលដែលយើងធ្វើពីរអាណត្តិកន្លងមកនេះ យើងធ្វើជាចំហរធ្វើដោយតម្លាភាពធ្វើការពិភាក្សាជាមួយភាគីពាក់ពន្ធ័ទាំងអស់។ ការដែលចោទថា មិនឯករាជ្យមិនអព្យាក្រឹត្យ មិនមែនចោទលើមាត់ទទេទេ គឺត្រូវពិនិត្យមើលលើសកម្មភាព ដែលគណៈកម្មាធិការជាតិរៀបចំការបោះឆ្នោត បានធ្វើដោយឈរលើច្បាប់ តើគណៈកម្មាធិការជាតិរៀបចំការបោះឆ្នោត បានធ្វើអ្វីខ្លះ ?"។
ថ្មីៗនេះ គណបក្សសមរង្ស៊ី និងគណបក្សសិទ្ធិមនុស្ស បានទទូចទាមទារឲ្យក្រសួងមហាផ្ទៃ ផ្លាស់ប្តូរសមាជិក គ.ជ.ប. ដោយរៀបចំជ្រើសរើសបុគ្គលឯករាជ្យ ដើម្បីអ្វីដែលគណបក្សប្រឆាំងអះអាងថា ឲ្យការបោះឆ្នោតជ្រើសតាំងតំណាងរាស្ត្រ នាថ្ងៃទី២៨ ខែកក្កដា ឆ្នាំ២០១៣ ធ្វើឡើងដោយយុត្តិធម៌ និងអាចទទួលយកបានទាំងអស់គ្នា។ គណបក្សសមរង្ស៊ី និងសិទ្ធិមនុស្ស បានព្យាយាមដាក់សំណើជាលិខិត ហើយបានជួបពិភាក្សាផ្ទាល់ជាមួយនឹងតំណាងរដ្ឋមន្ត្រីក្រសួងមហាផ្ទៃ។ ក៏ប៉ុន្តែក្រសួងមហាផ្ទៃ មិនទទួលយកសំណើរបស់គណបក្សប្រឆាំង ចំពោះការផ្លាស់ប្តូរសមាសភាព គ.ជ.ប. ឡើយ។
លោក គង់ គាំ ប្រធានស្តីទី គណបក្សសមរង្ស៊ី នៅតែមានជំនឿថា គណបក្សប្រជាជនកម្ពុជា នឹងពិនិត្យឡើងវិញលើសមាសភាព គ.ជ.ប.។
សមាសភាព គ.ជ.ប. ទាំង ៩ រូបនោះ ត្រូវបានគេដឹងថា មកពីគណបក្សប្រជាជនកម្ពុជា ៥ រូប គណបក្សហ្វ៊ុនស៊ិនប៉ិច ២ រូប និងគណបក្សសមរង្ស៊ី ២ រូប។ ប៉ុន្តែលោក គង់ គាំ បានឲ្យដឹងថា សមាជិក គ.ជ.ប. ២ រូប ទៅពីគណបក្សសមរង្ស៊ី គឺលោក សោម ច័ន្ទឌីណា និងលោក ម៉ៅ សុភារិទ្ធ មិនអាចធ្វើឲ្យមានឯករាជ្យ ឬក៏ធ្វើសេចក្តីសម្រេចចិត្តអ្វីបាន នៅក្នុង គ.ជ.ប. ឡើយ។
យ៉ាងណាក៏ដោយ លោក គង់ គាំ បានឲ្យដឹងថា គណបក្សប្រឆាំង សមរង្ស៊ី និងសិទ្ធិមនុស្ស ក្នុងនាមគណបក្សសង្គ្រោះជាតិ អាចនឹងមិនចូលរួមការបោះឆ្នោតជាតិ នៅឆ្នាំក្រោយឡើយ ព្រោះសមាសភាព គ.ជ.ប. មិនមានការផ្លាស់ប្តូរ៕
———————————————
