អង្គការក្រៅរដ្ឋាភិបាល ដែលធ្វើការងារទាក់ទងនឹងការលើកកម្ពស់ស្ត្រី បានឱ្យដឹងថា នៅប្រទេសកម្ពុជា ស្ត្រីមានតួនាទីយ៉ាងសំខាន់ក្នុងការចូលរួមដឹកនាំសង្គម និងជួយជ្រោមជ្រែងសេដ្ឋកិច្ចគ្រួសារ ដើម្បីកាត់បន្ថយភាពក្រីក្រជាដើម។
ដោយ ហង្ស សាវយុត
2012-10-20
វិទ្យុអាស៊ីសេរី
២៦-កុម្ភៈ-១០: រដ្ឋមន្រ្តីក្រសួងកិច្ចការនារី លោកស្រី អ៊ឹង កន្ថាផាវី ថ្លែងនៅក្នុងសន្និសីទសារព័ត៌មានមួយនៅឯក្រុមហ៊ុន Smart Mobile ក្នុងរាជធានីភ្នំពេញ អំពីគម្រោងការរបស់ក្រសួងនិងក្រុមហ៊ុនដើម្បីអបអរទិវានារីអន្តរជាតិ ៨ មីនា។ RFA/Khe Sonorng
ក៏ប៉ុន្តែ ក្នុងរយៈពេលជាច្រើនឆ្នាំមកនេះ គេនៅតែមើលឃើញស្ត្រីដែលបានចូលរួមក្នុងឆាកនយោបាយ និងការងារសង្គម មានចំនួនតិចនៅឡើយ។
ក្រសួងកិច្ចការនារី កំពុងប្រឹងប្រែងជួយដល់ស្ត្រី ឱ្យបានទទួលការអប់រំខ្ពស់ និងជំរុញពួកគេឱ្យចូលរួមក្នុងនយោបាយ និងកិច្ចការសង្គមកាន់តែច្រើនឡើងៗសម្រាប់ពេលអនាគត។
ក្រុមចលនាស្ត្រីមិនមែនរដ្ឋាភិបាល មកពីបណ្ដាប្រទេសចំនួន៥ មានគម្រោងនឹងជួបប្រជុំគ្នានៅក្នុងខេត្តសៀមរាប នាដើមសប្ដាហ៍ខាងមុខ ក្នុងគោលបំណងធ្វើសន្និសីទថ្នាក់តំបន់លើកទី២ ដើម្បីជួយលើកស្ទួយស្ត្រីឱ្យមានតួនាទីសំខាន់នៅក្នុងសង្គម និងសេដ្ឋកិច្ចកាន់តែច្រើនឡើង។
ក្រុមប្រទេសទាំង៥ នោះ មានកម្ពុជា បង់ក្លាដេស ទីម័រខាងកើត ហ្វីលីពីន និងវៀតណាម។ អ្នកស្រី ពោជ បុប្ផា គឺជាប្រធានផ្នែកយេនឌ័រ និងសិទ្ធិស្ត្រីរបស់អង្គការសន្តិភាព និងអភិវឌ្ឍន៍ ដែលបានមូលនិធិពីប្រទេសអេស្ប៉ាញ។ អ្នកស្រីបានមានប្រសាសន៍កាលពីរសៀលថ្ងៃសៅរ៍ ទី២០ ខែតុលា ថា អង្គការរបស់អ្នកស្រីនឹងរៀបចំសន្និសីទថ្នាក់តំបន់នោះ នៅថ្ងៃទី២៣ ខែតុលា ខាងមុខ ដើម្បីរិះរកវិធីជំរុញស្ត្រីទៅក្នុងវិស័យនយោបាយ និងលើកកម្ពស់សមភាពយេនឌ័រ ក្នុងការចូលរួមវិស័យនយោបាយផង។
អ្នកស្រី ពោជ បុប្ផា បានបញ្ជាក់ថា សន្និសីទនោះនឹងជជែកទៅលើប្រធានបទចំនួន៣ គឺទាក់ទងទៅនឹងភាពដឹកនាំរបស់ស្ត្រី ក្នុងវិស័យនយោបាយ ការអប់រំទៅលើម្ចាស់ឆ្នោត និងការបញ្ចូលស្ត្រីទៅក្នុងកម្រិតអប់រំថ្នាក់ឧត្តមសិក្សា ដោយសារតែបច្ចុប្បន្នគេនៅតែឃើញស្ត្រីតិចតួច បានទទួលការអប់រំថ្នាក់ឧត្តម និងចូលរួមក្នុងឆាកនយោបាយនៅឡើយ។
អ្នកស្រី ពោជ បុប្ផា៖ «ជាក់ស្ដែងនៅក្នុងអាណត្តិទី៣ នៃក្រុមប្រឹក្សាឃុំ គឺមានតែ ៩៥នាក់ទេ ដែលជាប់ស្ត្រីជាមេឃុំ។ ក៏ប៉ុន្តែក្រុមប្រឹក្សាឃុំ គេឃើញមានជាង ២ពាន់នាក់។ ទោះបីជាយើងឃើញថា មានការកើនឡើងក៏ដោយ ប៉ុន្តែទាក់ទងនឹងចំនួនកើនឡើង គឺថាតិចតួចមែនទែន ប្រហែលជា ៤ទៅ ៥%ប៉ុណ្ណោះ ពីអាណត្តិមួយទៅអាណត្តិមួយ»។
កាលពីពាក់កណ្ដាលខែកក្កដា កន្លងទៅ នៅក្នុងកិច្ចប្រជុំមន្ត្រីរដ្ឋាភិបាលជាន់ខ្ពស់ មកពីប្រទេសទន្លេមេគង្គក្រោមចំនួន៥ កម្ពុជាធ្លាប់បង្ហាញក្ដីសង្ឃឹមថា កិច្ចសន្ទនាលើគោលនយោបាយស្ដីពីសមភាពយេនឌ័រ និងការលើកកម្ពស់ភាពអង់អាចរបស់ស្ត្រី នៃក្រុមបណ្ដាប្រទេសចំនួន៥ នោះ អាចជាកត្តា និងជាយុទ្ធសាស្ត្រដ៏សំខាន់ សម្រាប់ស្ត្រីក្នុងតំបន់ ក្នុងការជំរុញឱ្យមានផ្លាស់ប្ដូរផ្នែកសេដ្ឋកិច្ច ការចូលរួមកាន់តែច្រើននៅក្នុងវិស័យនយោបាយ និងការលុបបំបាត់អំពើហិង្សាផ្នែកយេនឌ័រផង។
អ្នកស្រី អ៊ឹង កន្ថាផាវី ជារដ្ឋមន្ត្រីក្រសួងកិច្ចការនារី ធ្លាប់បានមានប្រសាសន៍ក្នុងកិច្ចប្រជុំនោះថា ស្ត្រីមានតួនាទីយ៉ាងសំខាន់នៅក្នុងគ្រួសារ និងសង្គម ប្រសិនបើស្ត្រីទទួលបានការអប់រំទូលំទូលាយ៖ «កាត់បន្ថយអត្រាមរណភាពមាតា លើកតម្កើងសុខភាពស្ត្រីហ្នឹង មានសារសំខាន់ណាស់ ដោយសារតែស្ត្រីជាជនបង្គោលសំខាន់នៅក្នុងរង្វង់គ្រួសារ។ ពេលណាអត់ស្ត្រី បញ្ហាសុខភាព គឺគ្រួសារនឹងអាចមានអស្ថិរភាព»។
ប្រទេសកម្ពុជា បច្ចុប្បន្ន គេដឹងថា ចំនួនប្រជាពលរដ្ឋជាស្ត្រី មានប្រហែលពី ៥២ ទៅ ៥៣% ក៏ប៉ុន្តែ ចំនួនស្ត្រីដែលចូលរួមក្នុងនយោបាយ និងការងារសង្គម គឺមានកម្រិតតិចតួចនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។