ដោយសារជីវភាពក្រីក្រ ប្រជាពលរដ្ឋនៅតំបន់ជនបទមួយចំនួនមានបំណងធ្វើចំណាកស្រុកទៅប្រទេសក្រៅ ជាពិសេស គឺប្រទេសថៃ ដើម្បីរកប្រាក់ជួយលើកកម្ពស់ជីវភាពគ្រួសារ។
ដោយ មណ្ឌល កែវ
2012-11-06
វិទ្យុអាស៊ីសេរី
មានប្រជាពលរដ្ឋខ្លះបានប្រថុយប្រថានធ្វើចំណាកស្រុក ដោយខុសច្បាប់ ឯខ្លះទៀត បានយកដីធ្លីស្រែចម្ការទៅបញ្ចាំ ដើម្បីយកប្រាក់មកចំណាយក្នុងការធ្វើបែបបទស្របច្បាប់ តាមរយៈក្រុមហ៊ុនបញ្ជូនពលករទៅបរទេសមួយចំនួន។ ប៉ុន្តែ ការចេញទៅធ្វើការនោះ មានពេលខ្លះត្រូវគេបោកប្រាស់ ឬកុហក ឬពន្យារពេល។
នៅឯខេត្តកំពង់ឆ្នាំង ក៏មានករណីនេះកើតឡើងដែរ។
ប្រជាពលរដ្ឋជាច្រើននាក់ ដែលមានបំណងធ្វើចំណាកស្រុកទៅរកការងារធ្វើនៅប្រទេសថៃ ដោយស្របច្បាប់តាមរយៈក្រុមហ៊ុនអ៊ឹង រិទ្ធី គ្រុប ក្នុងខេត្តកំពង់ឆ្នាំង បានចោទប្រកាន់ថា ក្រុមហ៊ុនបានប្រព្រឹត្តខុសកិច្ចសន្យាក្នុងការបញ្ជូនពួកគាត់ទៅធ្វើការ។
បុរសអ្នកភូមិឈ្មោះ អែម សុវណ្ណារិទ្ធ ជាប្រជាពលរដ្ឋនៅភូមិស្វាយគយ ឃុំពន្លៃ ស្រុកបរិបូណ៌ ខេត្តកំពង់ឆ្នាំង គាត់បានឲ្យដឹងនៅព្រឹកថ្ងៃទី៦ ខែវិច្ឆិកា ថា គាត់បានចុះឈ្មោះ និងបង់ប្រាក់ឲ្យក្រុមហ៊ុនអ៊ឹង រិទ្ធី គ្រុប ខេត្តកំពង់ឆ្នាំង រយៈពេលជាង ៤ខែហើយ តែក្រុមហ៊ុននៅមិនទាន់បញ្ជូនគាត់ចេញទៅធ្វើការទៀត។ គាត់ថា ក្នុងកិច្ចព្រមព្រៀងរបស់ក្រុមហ៊ុន បានបញ្ជាក់ថា បន្ទាប់ពីការចុះឈ្មោះ និងបង់ប្រាក់រួចរយៈពេលយ៉ាងយូរបំផុត ៣ខែ ក្រុមហ៊ុននឹងបញ្ជូនពលកររូបនោះចេញធ្វើការ តែឥឡូវគាត់រង់ចាំជាង ៤ខែហើយ នៅមិនទាន់បានចេញទៅទៀត។
ពេលគាត់ទៅសួរសាខាក្រុមហ៊ុននៅឃុំពន្លៃ ថាថ្ងៃណាទើបគាត់បានចេញទៅធ្វើការ គេឆ្លើយថាមិនប្រាកដដែរ ធ្វើឲ្យគាត់អស់សង្ឃឹមយ៉ាងខ្លាំង។ គាត់ថា គាត់បានខ្ចីប្រាក់ពីធនាគារបង់ឲ្យក្រុមហ៊ុន ឥឡូវធនាគារសង្ខើញចង់រឹបអូសដីស្រែគាត់ជារៀងរាល់ថ្ងៃ៖ «ខ្ញុំរង់ចាំរហូតដល់ខែ១១ ហើយខ្ញុំបានទូរស័ព្ទជាច្រើនដងទៅសួរក្រុមហ៊ុន តែគេពុំព្រមទទួលទូរស័ព្ទខ្ញុំទេ។ ខ្ញុំក៏ទៅសួរសាខានៅពន្លៃ បញ្ជាក់ថា ខែ១១ ហ្នឹង ខ្ញុំបានទៅ ឬអត់ ប្រធានសាខាក្រុមហ៊ុនអ៊ឹង រិទ្ធី គ្រុប នៅពន្លៃ គេឆ្លើយថាគេអត់ដឹងទេ គេឲ្យសួរទៅលោក សុខ ឧត្តម ជាប្រធានប្រចាំខេត្ត…»។
យ៉ាងនេះក្ដី តំណាងក្រុមហ៊ុនអ៊ឹង រិទ្ធី គ្រុប ប្រចាំខេត្តកំពង់ឆ្នាំង គឺលោក សុខ ឧត្ដម បានពន្យល់ថា ការយឺតយ៉ាវនេះបណ្ដាលមកពីកន្លងទៅនេះ ប្រទេសថៃ ជួបវិបត្តិនយោបាយ និងគ្រោះទឹកជំនន់។ លោកសំណូមពរឲ្យពលករដែលមិនទាន់បានចេញទៅធ្វើការនៅប្រទេសថៃ បន្តការអត់ធ្មត់។ លោកថា ពលករដែលបានចុះឈ្មោះទាំងអស់ហ្នឹង បានចេញទៅធ្វើការក្នុងពេលដ៏ឆាប់ខាងមុខនេះ៖ «វាអីចេះបង! ដោយនៅប្រទេសថៃ គេផ្លាស់ប្ដូរនាយករដ្ឋមន្ត្រី ដល់អ៊ីចឹងទៅ អ្នកកាន់ការងាររបស់គេ ក៏ត្រូវផ្លាស់ប្ដូរដែរ នេះម្យ៉ាង។ ម្យ៉ាងទៀត ថ្មីៗនេះមានទឹកជំនន់ប៉ុន្មានខេត្តនៅថៃ ដល់អ៊ីចឹង រោងចក្រខ្លះអត់ដំណើរការទេ ដល់ទៅគេចង់បញ្ជូនពលករយើងត្រឡប់មកវិញផង។ តែសម្រាប់ក្រុមហ៊ុនខ្ញុំ គឺនៅតែបញ្ជូនចេញរហូត។ ខ្ញុំទទួលខុសត្រូវបង ចំពោះឈ្មោះគាត់ គឺខ្ញុំបានបញ្ជូនទៅថៃ ហើយរង់ចាំតែធ្លាក់វីសា (Visa) មក គឺគាត់បានចេញហើយ។ ហើយម្យ៉ាងទៀត គឺក្រុមហ៊ុនខ្ញុំទទួលខុសត្រូវទាំងស្រុង បើអ្នកដែលមិនបានចេញទៅធ្វើការ គឺខ្ញុំប្រគល់លុយវិញមិនឲ្យបាត់មួយសេនទេ»។
មន្ត្រីសម្របសម្រួលសមាគមអាដហុក ការពារសិទ្ធិមនុស្សខេត្តកំពង់ឆ្នាំង លោក សំ ច័ន្ទគា មានប្រសាសន៍ថា យោងតាមច្បាប់ស្ដីពីកិច្ចសន្យា ភាគីក្រុមហ៊ុនត្រូវតែទទួលខុសត្រូវផ្ដល់សំណងរាល់ការខូចខាតដែលកើតចេញពីការធ្វើខុសកិច្ចសន្យានោះ។
មាត្រា១២១ នៃច្បាប់ស្ដីពីកិច្ចសន្យា និងការទទួលខុសត្រូវក្រៅកិច្ចសន្យា ចែងថា ជនណាបានធ្វើឲ្យមានការខូចខាតដល់អ្នកដទៃ ដោយកំហុសរបស់ខ្លួន ជននោះត្រូវជួសជុលការខូចខាតនោះ។ ទោះបីការខូចខាតកើតមកអំពីអំពើប្រព្រឹត្តដោយចេតនា ដូចជាការធ្វេសប្រហែស ឬការខ្វះការប្រុងប្រយ័ត្នក្នុងការត្រួតមើលថែទាំក៏ដោយ ក៏ជនល្មើសត្រូវតែជួសជុលការខូចខាតនោះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។