តាកែវ: នៅវត្តសោម ឃុំសោម ស្រុកគីរីវង់ ខេត្តតាកែវ កាលពីព្រឹកថ្ងៃទី១២ ខែកុម្ភៈ ឆ្នាំ២០១៣ បានប្រារព្ធពិធីប្រជុំស្តីពី កាបិទផ្សាយជាសាធារណៈនូវឯកសារនៃការវិនិច្ឆ័យ ដែលមានលោក ស្រី បេន អភិបាលនៃគណៈអភិបាលខេត្ត អញ្ជើញចូលរួមជាគណៈអធិបតី។
ថ្ងៃទី 12 កុម្ភៈ 2013
ដោយ: វឌ្ឍនា
CEN
លោក សុក សិត ប្រធានមន្ទីររៀបចំដេនដី នគរូបនីយកម្ម និងសំណង់ ខេត្តតាកែវ បានអោយដឹងថា នៅឃុំសោមចាប់ផ្តើមអនុវត្តវាស់វែង និងប្រមូលទិន្នន័យចាប់ពីថ្ងៃទី២៥ ខែសីហា ឆ្នាំ២០១២ ដល់ថ្ងៃទី៤ វិច្ឆិកា ២០១២ អនុវត្តដោយក្រុមបច្ចេកទេសទី៣ និងក្រុមយុវជនស្ម័គ្រចិត្តទី៩៣ ដែលទទួលបានលទ្ធផលដោយ កំណត់ព្រំ និងវាស់វែងព្រំតំបន់បាន ១៣៧ចំណុច បំពេញសលាកបត្របានចំនួន ៨៨៩ សលាកបត្រវាស់វែង និងគូរក្បាលដីបាន ៨៨៩ បំពេញទម្រង់បែបបទបាន ៨៨៩ បញ្ចូលទិន្នន័យបាន ៨៨៩ និងគូរបានផែនទី ១ផ្ទាំង ដែលមាន ក្រឡាផ្ទៃសរុបក្នុងតំបន់មានទំហំ ៦៥១,៩៤ហិកតា ក្នុងនោះដីប្រជាពលរដ្ឋ ៥៦៦គ្រួសារ កាន់កាប់ផ្ទៃដីទំហំ ៤៨១,២១ ហិកតា មាន ៨១៤ក្បាលដី ក្នុងនោះ ៨០៩ក្បាលដី ជាដីកសិកម្ម និង ៥ក្បាលដី ជាដីលំនៅឋាន។ ចំណែកដីរដ្ឋ មានផ្ទៃដីសរុបទំហំ ១៧០,៧៣ហិកតា មាន៧៥ក្បាលដី ក្នុងនោះមាន ដីព្រៃមាន ៧៤ក្បាលដី មានទំហំ ៦១,៧៦ហិកតា ដីអាងទឹកមាន ១ក្បាលដី ស្មើនឹង ៥,១៤ហិកតា ក្រៅពីនេះផ្ទៃដីទំហំ ១០៣,៨៣ហិកតា ទៀតជា ផ្លូវ ប្រឡាយ អូរ។
លោក សុក សិត បានបន្តថា លទ្ធផលដែលទទួលបានខាងលើ គឺបានមកពីការសហការគាំទ្រ ពីសំណាក់រាជរដ្ឋាភិបាល ក្រសួងរៀបចំដែនដី នគរូបនីយកម្ម និងសំណង់ លោកអភិបាល អភិបាលរងខេត្ត គណៈកម្មាធិការគ្រប់គ្រងដីរដ្ឋខេត្ត ក្រុមការងារដើរដ្ឋ ថ្នាក់ស្រុក អាជ្ញាធរគ្រប់លំដាប់ថ្នាក់នៅក្នុងខេត្ត ពិសេសក្រុមការងារបច្ចេកទេស ប្អូនៗយុវជនស្ម័គ្រចិត្តសម្តេចតេជោ នាយកលរដ្ឋមន្ត្រី។
នៅក្នុងឱកាសនោះលោក ស្រី បេន អភិបាលនៃគណៈអភិបាលខេត្តបានមានប្រសាសន៍ថា ថ្ងៃនេះគឺជាលើកទី ២ សម្រាប់ស្រុកគីរីវង់ ដែលបានប្រារព្ធពិធីប្រជុំប្រកាសបិទផ្សាយជាសាធារណៈនូវឯកសារនៃការវិនិច្ឆ័យ ក្នុងដំណើរការនៃការអនុវត្តនូវបទបញ្ជាលេខ ០១ ប.ប របស់រាជរដ្ឋាភិបាលដ៏មានសារៈសំខាន់ ។
លោកស្រី បេន បានមានប្រសាសន៍ទៀតថា យោងតាមសេចក្តីណែនាំលេខ ១០៨ សណន/កគដ ចុះថ្ងៃទី ២០ កក្កដា ២០១២ ស្តីពីការធ្វើអត្តសញ្ញាណកម្មដីធ្លី អត្តសញ្ញាណកម្មប្រជាពលរដ្ឋ និងការចេញប័ណ្ណកម្មសិទ្ធ។ នីតិវិធីតម្រូវអោយធ្វើការបិទផ្សាយជាសាធារណៈនូវឯកសារជាទិន្នន័យដែល មន្ត្រីបច្ចេកទេសសម្របសម្រួលបាន និងរៀបចំគ្រប់បែបបទមកដាក់បិទផ្សាយជាសាធារណៈជូនអ្នកពាក់ព័ន្ធ និងអ្នកមានប្រយោជន៍ពិនិត្យ ដើម្បីបញ្ជាក់ពីភាពត្រឹមត្រូវ ថ្ងៃនេះរហូត ដល់ថ្ងៃទី១៣ ខែមីនា ២០១៣ ជាថ្ងៃបញ្ចប់ការបិទផ្សាយជាសាធារណៈ ហើយឯកសារដែលបានបិទផ្សាយនេះនឹងក្លាយជាផ្លូវការតាមច្បាប់។ បន្ទាប់ពីចប់ការបិទផ្សាយជាសាធារណៈនេះ គណៈកម្មាធិការរដ្ឋបាលនឹងធ្វើរបាយការណ៍ នៃការបិទផ្សាយជាសាធារណៈជូនគណៈកម្មាធិការគ្រប់គ្រងដីរដ្ឋថ្នាក់ខេត្ត រួមនិងអនុក្រឹត្យ របស់រាជរដ្ឋាភិបាល ក្នុងការផ្តល់កម្មសិទ្ធិជូនប្រជាពលរដ្ឋ គឺចេញប័ណ្ណកម្មសិទ្ធ។
ដោយហេតុថា ការបិទផ្សាយជាសាធារណៈជាឱកាសចុងក្រោយ ដូច្នេះលោកអភិបាលខេត្ត សូមអំពាវនាទៅបងប្អូនជាអ្នកមានដី និងគ្រប់ស្ថាប័ន គ្រប់អង្គភាព ដែលមានជាប់ពាក់ព័ន្ធ នឹងក្បាលដីទាំងអស់ស្ថិតនៅ ក្នុងតំបន់ ធ្វើការវិនិច្ឆ័យ នៃភូមិទួលពង្រ ភូមិស្រែកែស ភូមិព្រាល ភូមិថ្មី ភូមិពីងពង់ ភូមិសោម ភូមិដើមរំដែល និងភូមិដើមអង្កោល ឃុំសោម ស្រុកគីរីវង់ អញ្ជើញចូលរួមដើម្បីបញ្ជាក់ពីភាពត្រឹមត្រូវ របស់ទិន្នន័យផង និងសិទ្ធិ ស្របច្បាប់របស់ខ្លួនដែលនឹងទទួលបានក្នុងអនាគតដ៏ខ្លីខាងមុខ អោយបានគ្រប់ៗគ្នា ក្នុងរយៈពេល ៣០ថ្ងៃ តាមកាលបរិច្ឆេទ ដែលបានកំណត់ក្នុងសេចក្តីជូនដំណឹង។
លោក ស្រី បេន បានបញ្ជាក់ថា រាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កំពុងយកចិត្តទុកដាក់យ៉ាងខ្លាំង ចំពោះការងារដីធ្លីនេះ ព្រមទាំងបានខិតខំអនុវត្តនូវកម្មវិធីដែលរួមមាន ការចុះបញ្ជីដីធ្លី និងការរៀបចំស្ថាប័នទាក់ទង នឹងសុវត្ថិភាព នៃសិទ្ធិលើដីធ្លី សំដៅសម្រេចនូវគោលដៅរបស់ជាតិ សម្រាប់ការអភិវឌ្ឍន៍សេដ្ឋកិច្ច និងកាត់បន្ថយនូវភាពក្រីក្រ អភិវឌ្ឍន៍សេដ្ឋកិច្ចសង្គមប្រកបដោយចីរភាព និងសុខដុមនីយកម្ម៕